¹ Habele gumwe mtu gwa Lama, Msufi, gwa sii gya tubandagulu twa Eflaimu, chinalyage gugitilwe Elkana, mwaana gwa Yelohamu, mwaana gwa Elihu, mwaana gwa Tohu, mwaana gwa Sufu, Gweflaimu. ² nage gubele na baachi babili; china lwa gwa mtangi gugitilwe Hana, na china lya gwa bubili gugitilwe Penina; nage gugo Penina gubale na baana, alakini Hana gushibele na baana. ³ Na gugo mtu gubele hugya uhuma m mbuga gyage mwaa wa mwaa, yulu ya utambikila, na umtangila Mlume gwa basolokoto nyama uya Shilo. na baya baana babili ba Eli, Hofni na Finehasi, bibuli bya Mlume, babele uya. ⁴ Na luya lusugu helihiile Elkana helitangile nyama, umma mmachage Penina ibaa, naubaha baana bage bose, bawalubaga na bawamisiha bisunyi byabo. ⁵ alakini Hana gubele humma bibaa nyendo chibili; yulu gubele hummunda abisa Hana, inangwa Mlume gubele mmambe gumo. ⁶ bibyo mmachi nage gubele humsagacha abisa, na umchigilicha, yulu Mlume gubele mmambe gumo. ⁷ Iyaka mlumyage guitile bibyo mwaa wa mwaa, haya guya mmachana helibele hugya u ndu gya Mlume, noo biya byelibele humsagacha; bino, wa bibyo, gee gubele hulila, nangu uya iliwa. ⁸ Elkana mlumyage gumsambile, Hana, ulihulilila ii? Yulu yai ushihuya iliwa? Yulu yai mtima gobe guli na manyongotela? Wi wii! Nene nishi msoga uhima baana umi oli gogwe? ⁹ Haho Hana gugimanine, habahwile uuya na unywa uya Shilo. Nage Eli ibuli, gubele mshame wisuba yage ha ikwa ya lubunga lwa Mlume. ¹⁰ Gugo mmachana gubele na inyokolo mnda luhuda lwage, gumsabile Mlume gulilile abisa. ¹¹ Gulibindile, guganine, Ee Mlume gwa basolokoto, nambo gogwe wilola asusu a mgichi gobe, na ukengelecha, na ushingibichi nene mgichi gobe, na upa nene mgichi gobe mwaana gwa mlumyana, haho na nene noo handimma Mlume gugo mwaana masugu mose ma mwego gwage, na abego ashimmyila mnda mswe gwage. ¹² Na haya heligililile usaba u mbele wa Mlume, Eli gumlingamine anywa age. ¹³ Bibyo Hana gubele hudogoma mnda mtima gwage; milomo gyage ka noo gibele humoneya nahi guli hodogoma, liidi lyage lishihulichiwe; wa bibyo gugo Eli gumlangile gwaolwa. ¹⁴ Haho Eli gumsambile, Wi wii! Ubi na bolwa ndaa na mengo nai? Leya koo malwa mobe. ¹⁵ Hana gumgaile, guganine, Pande! mlumyanyi, nene nili mmachana mine gwina mtima gwa inyokolo, nene nisanywa ibugu ao malwa, nene nahongololwa luhuda lwanyi u mbele wa Mlume. ¹⁶ Ushimlangile mgichi gobe uba mmachana gushilingye atu; bululi yulu ya bwingi bwa usuma wa mtima gwanyi na manyongotela manyi noo byadi hudogoma ndaa na hano. ¹⁷ Haho Eli gugaile, guganine, Ugye na talala; na Abetcha a Isilaeli uugiluche nahi usimba olihusaba. ¹⁸ Nage guganine, Mgicho gobe na gamone ugitabichiwa u meeso mobe. Bibyo gugo mmachana gugile lwage, nage gulile iliwa, na yenyi yage ishibele na mshina iyaka. ¹⁹ Bagimanine halwelo pe, basabile wa Mlume, hanyuma gagiwile nauhiya u ndu gyabo uya Lama, Elkana gummanine mmachage Hana nage Mlume gummengeleche Hana. ²⁰ Hene hawilile mengo, Hana guswalile gumo na ubuta mwaana gwa mlumyana; gumgitile china lyage Samwele, guganine, Bululi nimsabile wa Mlume. ²¹ Hanyuma guya mtu, Elkana, na bato bose ba mndu mwage, bagimene na ugya umtangila Mlume nyama gya mwaa, na ulibindila wge. ²² Haho Hana gushigile, yulu gumsambile mlumyage, Nene nishigya, ndaa na byileiwa mwaana ukoka mabele, haho noo handimlusha, yulu gaamoneye u mbele wa Mlume, gashame uya masugu mose. ²³ mlumyage Elkana gumsambile, Bino ubeita nahi byawamona bisoga; heemba na byolimlecha mabele; Mlume na gawiliche inywa yage ka. Bibyo guya mmachana guhembile, gumkokiche mwanage, ndaa na byelimleiche mabele; ²⁴ Nage helibele gwahuhwa umleecha mabele, gugile hamwechi nage, na ng'ombe chitatu, na ahindi amwechi a buusu, na mdibi gwa ibugu, gumlushishe u ndu gya Mlume, uya Shilo; na guya mwaana gubele mwaana gwa alela. ²⁵ Nabo bagishinjiche giya ng'ombe, bamlushishe mwaana wa Eli. ²⁶ Guganine, Ee mlumyanyi, nene noo guya mmachana mine gugimanine hoka nobe hano, nibele humsaba Mlume. ²⁷ Nisabile nahewe guno mwaana; Mlume gupele lusabo lwanyi lwandimsabile; ²⁸ bululi bwa bibyo na nene namma Mlume gugu mwaana; mengo me mose mene melibi na mwego melihewa na Mlume. Nage gumtangile Mlume uya.