¹ Ga matuf', ibumb' chiata ya bandu bichiwibunga honga, ndebana indu ya ulya, Yesu biguwitgana mitwana yaji na ubasotlwela naha: ² Niumwena chiï ibumbu binsonya; baté nami matuf' gasatu kuu ndebana indu ya ulyaha. ³ Mim' ubagalush' na zala ndebam'mona busumuinu mwi zila; sababu bashali bafumizi ula. ⁴ Mitwana biyiboy naha ndetuna indu ya ulya, bamkuuta ayi munu mu buönono? ⁵ Yesu biguubihujya: nuna mikati yinga? boh' naha musambu. ⁶ Bigubakaisha hasi, na ubugula yeya mikati musambu, biguufwekusha Vili nyambi, biguyisesgula na ubaha mitwana yagabi bandu; bibaugaba bandu. ⁷ wali honga tusamachi tusehe, Yesu haguufwekusha Vilinyambi, biguubaha bagabi bandu. ⁸ Bibaulya na kwiuta na ubisiga, biba byaüsagala bibiukongolubu na wiyujya bibugu musāmbu. ⁹ Báulya bali bufwiilu bwa bandu eluf' yina. Yesu biguwilagena nabu. ¹⁰ Ibiguutibila mu bwatu na mitwana yaji, bamwēnda ku isambu ya Dalmanuta. ¹¹ Bafalisayu wii, bibatemut' mbaa na Yesu, na kumheha bibaumhajya gwabatele ijelee imfuma higulu. ¹² Yesu bigumon asungu mwi tima, biguuboy naha : njiayi inumhajyila iyuijyu, a banu bandu ba lelu? Lujila ninusotlwela, ndenumuhubu iyuijyu nasi njiimu. ¹³ u manyuma ga yeya, bigubalea, iutibil mu bwatu, bayiti ye n'ghongo. ¹⁴ Mitwana bâuvulmijya ushala mikati; bana mukati gugum' bob' mu bwatu. ¹⁵ Yesu bigubasahwila nan'gha, nwilole buose na bya ugagisha bya bafalisayu na bya Helode. ¹⁶ Mitwana bibatemwiboyena naha, gumboya bebyu sababu ndetuna mikati. ¹⁷ Haguuyua bebyu, Yesu bigubaboya naha : njiayi inumboya naha ndenuna mikati? Ndenwachiuyua? Ndenumhujya? ¹⁸ Nuna tim' lyumini? Banu na mesu, ndenum'mona? Banu na maushu mehe ndenum'hujya? Honga, ndenumninga? ¹⁹ Hanaukalaga mikati yitanu u bandu eluf yitanu, nwawiyujya bibugu binga bya biba byausagala? Bo' naha umi na bibili. ²⁰ hanaugaba mikati musambu u bandu eluf' yina, nwawiyujya bibugu binga bya biba? Bo naha musambu. ²¹ Bigubasotlwela : ndenwachiuhujyeu? ²² Bibawenda u Betsaida; na bibaumvwila na mbof', umwilendela naha gwamulengejye. ²³ Biguuwata mbof' ku uboo na wenda naji umbamba ya jyaati; biguumsinga mata u mesu, umutendeela maboo, na umwihujya hut gumwene indu. ²⁴ bi guulola, je naha: bandu bamumona, bali paa na miti yimwisumuä. ²⁵ Yesu biguumuta honga maboo u mesu; na haguuzingtila honga, biguufua et umona byoso seehe. ²⁶ Yesu biguumtuma u yend' yaji, nang'ha ndushela mu jyaati. ²⁷ Yesu na mitwana yaji bibawijila u majaati ga Kaizali a Filipu, mwi zila biguubihujya: Bamuboya naha nili nani? ²⁸ Bibaumlunga naha : Yowani mubatizi; bamu naha Eliya, banji naha guli jimu mu ba n'ghanga biloto. ²⁹ Bigubihujya: banu nabu numboya naha nili nani? Petlo biguumhindula: guli Kilistu, musingi mag'hani gwa Vili. ³⁰ Yesu bigubakusha ndebasotlwela mundu bebyu. ³¹ Biguubamba ubasahwila naha yipashili mwana gwa bende gwasubi wamehe, gwahanubu na banunu, na bayui ba makuhani na tulani, bamwihaji, na unyuma ya matuf' gasat' jeujulua. ³² gwamibasotlwela yi n'ghanda yoso buhululu. Petlo biguumwitgana ha mbavu na ubamba umukalgenya. ³³ Lakini, Yesu bigalulua na ulola mitwana yaji, bigukandila Petlo: Bebe yugu Shetani galusha u nyuma yami, ndumninga bileglejye Vilnyambi, gumninga bu mundu. ³⁴ I haguwitgana ibumbu ya bandu na mitwana yaji, bigubasahwila naha: hut' mund' gumkeb' undonda, gwasamuni musalab' gwaji gwandamati. ³⁵ Sababu yogwa gumkeb' ushosha buome bwaji, gumbuzimijya, lakini yogwa gumzimijya buome bwaji higulu yami na higulu ya musahu gulegela gumbushosha. ³⁶ Mundu gumkuza faida ayi hutu guukuza alunga mugaza oso na uzimijya buome mwaji? ³⁷ . Mundu guyausinda tima lyaji na ayi? ³⁸ Sababu gooso gumumwena buvu na n'ghanda yami hanu ha alunga mugaza, Mwana gwa bende naji gumwaumona buvu lwemuvwa mu ihumbulu ya shaji na ibumbu ya bamalaika baji.