¹ Booso bâba bali m chiumbu ya bubiha balole bashabu na bulumi byebya bibakumbene usamunubu na inemu guboyela nanghahan zina lya vili na milangilu ndaliyuubu bulomo. ² Na bâba baklistu bana basha na bulumi ndebabalelu, hamubili gwa nanghahan bateli babutui; babatele mulimu na kuila hamubili gwa nanghahan baklistu na biheg'shene na baleg'lejye utaha bilegela. Shula bî bindu na baboye babitahi. ³ Hutu mundu gumwiyigisha mulangilu yibiha, na ndaleg'lejye nag'handa ya paha ya Mwanana gwetu Yesu Klistu na milangilu yimwilondena utoa, ⁴ gwijili na bunumbu , ndejili indweu, na guli na bubiha bwa nyuhujya ya mahoto na esu, luba, umwen'jyana na unghini-nghita, ⁵ mbaa yishi umu na umu ya bandu bashi na mbati ya uhujy'nena, ndana lujila, na bamwininga nanghahan butoe ni sulu ya ubaha indu. ⁶ Ibyoho, sulu yiata ya indu ili samba na butoa buli munda mwa witaba: ⁷ nguboya nanghahan ndetwauv'gaya indu mu alunga-mugaza, na yili hululu nanghahan ndatum'galusha na yooso; ⁸ hutu bôbo tuli na bilyashi na bilamba, bitukumbene. ⁹ Bâba baleg'lejye witelejya bamwilua mu ubelubu, mu bwama na mu bulundu bushwali bwa buhala na libiha na limwatibijya bandu mu mwiibenga na muuzimina. ¹⁰ Wilondena na esu â falanga falanga ni sulu ya bubiha booso; na bamu, bayikuza bazimina ula na hali lwitabu, na bawisumbula boho banindu mu usuba ushwali. ¹¹ Bêbe, mundu gwa Vili, tina byebya bindu, na kweba sambu, utoa, lwitabu, ivulu, ulejya, utalala. ¹² Lwaha lugoze lwa lwitabu byabuose, kwata buome bwa milumbu, bugwawit'ganubu, hamubili gwabu gwabajya mu mesu gabu û bashula bashali. ¹³ Nikulanga, uluebu lwa Vili gumwihana buome uli bindu booso, na uluebu lwa Yesu Klistu, gwataha ubajya wabuose uluebu lwa Ponso Pilato, gwakwati misii, ¹⁴ na gwakai gushi na bala, gushi na indu yaukal'genyubu, vuu na byebya bimwabalua Mwanana gwetu Yesu Klistu, ¹⁵ gumwatungijyubu hululu sehé lugumbu lwaji na guli bilegelana jehe bunga î tang'yele, jyege gwa tusheke tooso, na Mwanana gwa mianana, jehe bunga gwali na mubili gushi gwa ufa, ¹⁶ guli mu muchee gushi gwa ulabijya, gushi na mundu nigu jimu gugumona na gushi bugel'jyelu bwa ugumona, wele jehe î um'kuzia inemu na buswata bwa milumbu, Amina! ¹⁷ Laga uli tundonye twa yiyinu mia ndabakai na wibajya na ndebataha ukuugila wabu mu bunji bwa bindu byabu bishimulonda, nguboya nanghahan batahi ukuugila wabu mwa Vili, gum'tugabwila bindu na byahi guboya nanghahan tukai na limwenye. ¹⁸ Balagi batahi bya buose, bakai undonyi mu milimu ya buose, nyini ya uhana, ¹⁹ na bayibumbili hamubili gwa mutufu gamuviyaga kabwalala atulizubu mu musii gumini. ²⁰ O Timoteo, bia bukumu, kaa ula na ng'handa ya inini na yishi na mulingu, ²¹ na mahoto ga uyua ushijilubu uli mulimu gwa bamu, bausumbula lwitabu û mungongo. Buneme bwakai nenu!