¹ Ahumbwa otano abomali lihili lande. Ienia monoto molongoiya likolo mokuya la mbume. Wamohekelia pungola e liwela lilindake. ² Adhukolia liwela lilindake, milungu mitelia likolo la enge liwela nda milungu ma misa minge misungu, liwusa wuse elimanali la ehoho koto la milungu e liwela laho. ³ Ndondo e milungu wapepe wahumbia, wayandjia la mbume, wawahekelia okumu wungo oengani la okumu wungo wodjei gake la eho ala la mbume. ⁴ Wawaaselia ate watikele obe la isokisoki wa mbume, te la migono miikima, te la mote moikima, ase ndji wato wango wadjangi kpaka e Mwengei la mbanda djau. ⁵ Ehekeleni aleti la iwo ate watiwole wato, ase wawaenese odjidji ndebo itano koto monga mokokela iwo ekodja nda monga mokokelaka gake inga etwa moto. ⁶ La mango masio, wato wakoluka logo, ase watitota logo, wakodja la ehoha e logo ate wague, ase logo ekotila lihele lau. ⁷ Wango wapepe wakwani la punda djinge iwongelani la kindo. Likolo la mito mau wadjei la magbaka makwani la wolo, koto mbanda djau ikwani la mbanda e wato. ⁸ Wadjei la sue ikoani nda sue dja wali koto maino mau makoani la maino ma Simba. ⁹ Wadjakali la ngwa ikoani la ngwa dja ibende, koto modudu mo mambulu mau, makwani la modudu mo mokolo e wapunda wango wakotilaka obangu la wita. ¹⁰ Wadjakali la mikondo koto la wikuseli nda wagake, okulu djau eenesake wato odjidji ndebo itano idjei la mikondo mau. ¹¹ La mito mau, edjaali nda likumu, ahumbwa o liwela lilindake. La Ebele kombo ende Abadona, la Geleki kombo ende Apoliona. ¹² Magba mango ma liwoso maetia. Dhenga magba male mageli mbuse eho. ¹³ Ahumbwa o motoba abomia lihili lande, iokia moli mwesi mopumbia ndondo e ndjeka inéi djinge idjakali likolo e etumbeli e wolo liwoso la Mwengei, ¹⁴ easia la ahumbwa o motoba ate, ''Tokola wahumbwa wanei wango wanangani ahue e ewale Epalata.'' ¹⁵ Adhuholali waahumbwa waho wanei, wango wawongelanali la kole e engele eho koto lisio laho koto ndebo eho koto elanga eho, la ooli mwesi e wisuki isato e wato. ¹⁶ Motango mo wato wango wakomaka wita modjakalali miliadee miale e wamiliade. Mungo motango mookali mbai. ¹⁷ Mbai ieneli motango mo wapunda la saki, koto wango wadjakali likolo la djinge punda wakpali wibanyei mikpoto nda langi e misa koto e boloo nda yaseti koto e langi e mosaka nda supulu edjaaki opumbi la minoko mawu. ¹⁸ Eesi e wisuki isato e wato wagbali la madjidji maho masato: Misa, milungu koto supulu enge edjaaki opumbi la minoko mawu. ¹⁹ Okulu e wapunda edjaaki la minoko mau koto la mikondo mau, laate mikondo mau midjaaki nda wandjo koto widjaaki la mito, widjaki oenesi wato odjidji la mito. ²⁰ Wato wango watigbali la djinge odjidji watikukolali mitema la sambo mbembe dja mawo mau, laate watimaeli mauli mindjili, wilima ma wolo, koto e palata, koto e ebende, e libukeli, e mote enge etieneneke, etiokaka, etisombaka. ²¹ Watikukolali mitema laate wadhee ooli, koto tomo djau e milimo mibe, la oseka ewu koto la iwa.