¹ Modhingela ahumbwa e lingomba la Epeso: 'Dhenga sambo iyaasi moto ongo oheli minoto sambo la ewo ende e lilome ongo okosombaka awodja e iyamaleselo wa matambe sambo ma wolo. ² iyewi sambo dja owe la tomo dja owe la okandi motema mo owe. Iyewi ate otiwakandelaka wato wabe motema. Owameki wango wadjaki oyaenesi nda watutiani kaikoase wati watutiani, oeni koto ate wadjei wato wa moleho. ³ Okandi motema koto oeni odjidji la kole e kombo e mbai, koto otiadheelali. ⁴ Ase sambo djinge iwoeni obe sa ndenge edheyi owe libalano la owe e poo. ⁵ Mungola ebete enge ekpali owe kukola motema mo owe koto wongwanela tomo dja owe dja poo. Inga te ndjongo ikodja galagala ilongose emaleselo e lotambe e owe la ebete eho inga otikukole motema. ⁶ Denga ema enge edjei owe la eho: Okotonaka tomo dja lingomba e Nikolausi djinge mbai koto ikotonaka. ⁷ Ongo odjei la matoi aoke sambo djinge ikoasaka elimo la mangomba. Ongo okolonga ikomohekele alake pukapuka e mote mo mokalo mungo modjei la Paladiso e Mwengei.'' ⁸ Modhingela ahumbwa e lingomba e Similuna: Dhenga sambo iyaasi moto o poo koto o gboo, ongo ogbaali koto owongoiya la mokalo: ⁹ Iyewi tomo dja owe, odjidji wa owe, otundake wa owe kaikoase odjei la ogumake. Iyewi wiliko e wato wango wakoasaka ate wadjei Wayuda, kaikoase wati Wayuda. Wadjei nde sinagoga e Etota. ¹⁰ Otiwangake sambo djinge ikoene owe odjidji. Dhenga! Djabulu akowahelesa weeti wato ndondo enu la woyogo laate ino omekeneni koto okototani masio liomu ma magba. Amala ngbii tee la logo, ikohekele lingboka e mokalo. ¹¹ Ongo odjei la matoi aoke djinge sambo ikoasaka elimo la mangomba: Ongo okolonga atiene odjidji wo logo wungo wo wale.'' ¹² Modhingela ahumbwa e lingomba e Pelegame: Denga sambo djinge iyasi moto ongo oiki kpoka enge ewoti ngambo kpaa iyale: ¹³ Mbai iyewi ebete enge ekoyabataka owe, iyewi ate edjei eyabatelo e djabulu. Ase ohelani la kombo e mbai koto owunganiti ogemei atie mbai, inga te la masio mango Atipasi, mototoli mo mbai, ongo omoolali iwo liwoso lanu, ebete eyabati Djabulu. ¹⁴ Ase iyoto la obe e dji sambo: Odjei la wato wango wagemei matiesakoli ma Balama ongo omotomate Balaka abate ema esakelake liwosa la wana wa Isalayele laate walake nama djinge wihekelani mbeka la wilima koto wakele oseka. ¹⁵ Ndenge kikima la owe koto odjei la wato wango wabaliti odhei matiesakoli e ma lingomba e Nikolanusi. ¹⁶ Eho lenge kukola motema mo owe. Inga otikele ndjongo, ikodjaaka galagala, ikosana la iwo kindo e kpoka e ndai e monoko mo mbai. ¹⁷ Moto ongo odjei la matoi aoke sambo djinge ikoasaka elimo la mangomba. Ongo okolonga, ikomohekele ndambo e mana enge eisani koto ikomohekele libukeli libubake koto la libukeli laho kombo eesi eholi edhingani enge moto te moikima ayewiti, longosa ndji moto ongo ototi eho.'' ¹⁸ Modhingela ahumbwa e lingomba la Tiatila: Monga Mwengei, ongo odjei la maiso nda lolemo o misa, koto makolo mande nda motako molangi aasi dji sambo: ¹⁹ Iyewi sambo dja owe, koto libalano la owe koto ogemei wa owe koto otomo wa owe koto edjeeli e owe enangake motema, iyewi koto ate sambo djinge ikokelaka owe sikandjo idjei ngbii oyeti djinge dja poo. ²⁰ Ase djinge ieni mbai obe etie owe: Omodheeli Zezabele, oholo moli ongo oyaumesi motiesakoli. Akotiesakolaka koto akowungesaka tuke dja mbai laate wakele oseka koto walake wilaka winge wihekelani mbeka e wilima. ²¹ Mbai imohekeleli engele laate akukole motema, ase atibalaka okukoli motema ate adhe oseka wonde. ²² Dhenga! Etikali ma keke imolumbe la epe e ekoni, koto iyokese wango wakokelaka eteba la inde odjidji, inga watikukole motema ate wadhee tomo djande. ²³ Ikowaola wana wande la odjidji wo logo, mangomba kpaa makoewa ate idjei ongo okodhendaka ndondolindo la mitema. Ikoputa moto la moto la tomo djande. ²⁴ Ase ikoasaka ndjongo atie wadji wanu wango wadjei la Tiatila, wango wagemeiti matiesakoli maho, wango waewiti olindake o Djabulu, ndenge iwo amene wakoasaka ate, 'itiotaliani meeti mikpali.' ²⁵ Sa nde, enge edjei ino la eho, heleni eho olamu tee ekodja mbai. ²⁶ La ongo okolonga koto la ongo okela tomo dja mbai tee la gboo, ikomoha okumu likolo la miki kpaa. ²⁷ Akosombesa wato la motongo monde mo ebende, wakoyandjana nda teni e mbume, ndenge mbai koto itotali okumu atie Wawa o mbai. ²⁸ Mbai ikomohekele monoto mo boo. ²⁹ Ongo odjei la matoi aoke sambo djinge elimo ekoasaka la mangomba.'''