¹ Wapekelia mokombe nda motongo. La oasi ate, ''Owe amala, pima osungu e ebete mosatu e tepelo e Mwengei koto e etumbeli koto la wato wango wakoyakongoko ongo. ² Lopango enge edjei saa e ebete mosatu e tepelo, dhee eho saa, otipime wosungu woho, laate wahekeli eho wapagano. Iwo wakohoto gbata mosatu la makolo ndebo tuku inei la iwale. ³ Ikotoma watotoli wa mbai waale wakpali makunya ate watiesakole masio koto esi la kama iwale la tuku motoba.'' ⁴ Iwo nde mite miale ma olibe koto wiyamaleselo wa matambe wiale widjei liwoso la kumu o mbume. ⁵ Inga moto abala ate awakele obe, misa mikouma la minoko mau la owoli mitone wau, inga moto aluka ate awakele obe akogba la enge ndenge djongo. ⁶ Wadjei la okulu enangake likolo ate ewongo etilue la masio mango matiesakoli iwo, wadjei la okulu ekukolake malia makila koto e ohekeli ,mbume odjidji e ndenge kpaa la enhele kpaa enge ebali iwo. ⁷ Ango ekosesa iwo litotoli lawu, nama e mbume enge ekotelaka la liwela lilindake ekoasanesa wita, akowalonga, koto akowawola. ⁸ Milonda mau mikodja la lingalala lisungu e liwange (enge eweli iwo la engbundu e Sodomo koto e Ezipito), ongo e mobakali iwo la ekulusu Likumu lau. ⁹ Wato wa miki, la maliye, la minoko, la witondo wakodhenda milonda mawu masio masato la ndambo. Watihekele mboka ate milonda mawu milangesane la mbila. ¹⁰ La wato wango wayabati la mbume wakookaka mwemu iwo amene, wakoemeleke koto, wakotomelana koto makao, laate watiesakoli waho waale wakoeneseke wato wango wayabati la mbume odjidji. ¹¹ Ase mbuse e masio masato la ndambo, elimo e mokalo e Mwengei enge edji atie Mwengei ewalingelali. Wato wango wadjaaki owadhendji wawangali. ¹² Waokia moli mwesi motetelake molongoiya likolo moasia la iwo ate, ''Telani alandjo!'' watelia ongo likolo la lipata, koto mitone mawu wadjaaki owadhengi. ¹³ La engele eho mbume e dudumali koto eesi e esuki liumu e liwange akwali. Odudumi wuho e mbume eolali wato koto sambo, wango watikalali wawangali, wamoganali Mwengei o likolo. ¹⁴ Magba ewale eyeti. Dhenga! Magba esato egeleli sikandjo. ¹⁵ Ahumbwa o sambo abomali lihili lande, miili mitetelake mipumbali ongo likolo, miasali ate, ''Okumu e moki eumia okumu o Likumu lasu koto e Kilisito, akosombesa libele la libela.'' ¹⁶ Mbange tuku iwale la inei, wango wayabataki liwoso la Mwengei, la wangbelengo ewu e okumu, waimbali mbanda sese, wayakongoli la Mwengei. ¹⁷ Waasia ate, ''Tohekeli owe pambo, Likumu Mwengei mototi e okulu kpaa, ongo odjei koto adjaaki, laate ototi okulu e owe osungu koto opotia osombesi. ¹⁸ Maliye wamemelia, koto limemu la owe edjaali, la engele enge ebatani laate wato wagwake wasambesane, koto ohekele liputi la tuke dja owe watiesakoli koto wasatu koto la wango wakotemeiyaka kombo e owe, wato wakeke la wato wasungu, koto obitese wango wakobitesaka mbume.'' ¹⁹ Ebete mosatu e tepelo e Mwengei enge edjei likolo edhuhuanali, koto sanduki e ogemei onde eeneneli ndondo e ebete mosatu e tepelo nde. Ongbungwani epumbali, miili miokanali, koto ngombe egbamali, koto la mbume edhudhumali, ewongo e malanga eluali.