¹ Yuda, motuke mo Yesu kilisto, monango o Yakobo, atie wato wango wawelami; wango wadjei wamanima e libalano la ookani e Mwengei wawa, pe waisami la Yesu kilisto: ² Magba la logoo la libalano etetele mbala la mbala! ³ Wamanima wa libalano, te ndenge ekokelaka mbai mohandjia kpaa laate iyodhingeleni la mokalo enge edjei iso kpaa la eho, iyeni ate edjei la gbondo o odhingeli la o otetelesini ate osaneni kindo e ogemei enge ehamate la wasatu mbala kikima. ⁴ Ikeli ndjongo, edjei laate weeti wato wayalingesi ndondo enu la mamungo mbe, wango wadhingo eenanali tee la gala ate wakotota ehele osambesi, wato waanngo wakomodhendeaka Mwengei, wango wakokukolaka olamu osungo e Mwengei osu la esumbeli mbe pe wakomowunganaka Mwengei, mwalimo moikima, pe likumu lasu Yesu Kilisito. ⁵ Ibali oowongoleli ino, te oyewini dji sambo, ate Mwengei, mbuse okalesi wato la owapumbesi la moki mo Ezipito, mbuse awolesia wato wango watieneseli ogemei. ⁶ Mpe waahumbua wango watiisali eholo ewu e lipotele, kasi wadheli eholo ewu amene eyabatake, awanangi la mikulu ma libela la ebete e molili la olambeli osambesami wo lisio lisungu. ⁷ Ndenge kikima Sodoma la Gomola la miki misukami la djaho, wago wayahekeleli la wondumba nda iwo la olangali la djeeti wikelamu, wahami atie iso nda ndakisa pe wakotota etumbu e misa ma libela. ⁸ Ndji ndjongo, wango wato pe nda eyahi iwo la wasaki, wakobitesaka wenge la mweni pe odhendei wotata la owatangakoli wato wa mwemu. ⁹ Kaiko nde ango Mikayele, ahumwa likumu, adjakali la minga la etota pe adjakali oswameli la loyi e wenge e Moize, atimekali omokwesi la loyi la maloba ma wiliko, kasi aasali ate: Mwengei inde amene aopamele. ¹⁰ Inga te ndjongo, wato waho wakoasaka obe la sambo kpaa watiyewe, kasi wambo kpaa djinge wahelate gbondo saa ndjongo, nda wanama edjangi akili, ndondo e sambo djaho wakoyabumakolaka iwo amene. ¹¹ Magba la iwo! laate wabilei mboka e kaina, pe wayalumbi la mboka ewusake e Balaama la oluki liputi, pe wagwi la maloba mayamalelake e Kola. ¹² Iwo wadjei mabukeli enge iyaisi ndondo e malia la wayenga djanu dja mwemu ango ekolakaka iwo yenga mongindji la ino. Wayengemeni la mapata mango matidjimbisaka ewongo. Edjei mapata madjangi malia, enge ekokeke iyati la iyati la ehoho, mite ma engele egbo e otone; kasi edjangi pukapuka, egwi mbala iyale, ebukwami, ¹³ Mbonge ebe e ewale, enge ekowumesaka sambo mbe, wa djai nda miyoto minge mikosombasombaka, enge wayiseli molili mo libela la libela. ¹⁴ Moto o sambo e liwota enge epoti la Adama, inde Enoka atiesakolali pe la gbondo ewu, engele aasali ate: Dhenda Likumu ageleli la wibiba wande esatu; ¹⁵ La oteni sambo e wato kpaa, pe okwesi wango kpaa wakomodhendjiaka Mwengei la tomo djau kpaa e dhendjiake Mwengei enge ekelali iwo la ndenge e omodhendei Mwengei, pe la sambo kpaa ekondjosake wato wabe, wango wakomodhendjiaka Mwengei, waasali la gbondo e inde. ¹⁶ Edjei wato wango wakondungwanaka, wato wango wakoyasumbuaka la mokalo mowu, wakotutiaka posa djawu, wakopumbisaka sambo dja ogeno, wakoganaka wato laate waluke liputi lawu amene. ¹⁷ Kasi iwo, wamanima wa libalano, mungolani alidji maloba mango watutiani wa Likumu lasu Yesu waasali liwoso; ¹⁸ ndenge wadjakali oasi la ino ate: La masio ma gboo waseki wakodja, wango wakobilia wa posa ewu e sambo edhendiake Mwengei. ¹⁹ Iwo wadjei wato wango wakolingesaka okawani, wato wa wenge, wango wadjanga elimo. ²⁰ Kasi ino, wamanima, wa libalano, ango ekoasonaka ino likolo la ogemei enu enge eeti osatu, pe nda edjei ino owatati la elimo satu. ²¹ Tikalani ndondo e libalano e Mwengei, ango ekolambelaka ino motema magba e Likumu lasu Yesu Kilisito la mokalo mo libela. ²² Wato wango wadjei la kokia wayokelani magba; ²³ Wakalesani pe walokwesani la misa. Kasi djakani owaenelesi weeti motema magba, kelani ndjongo la owangi, ango ekoinaka ino te esindje e ndondo, enge wenge ebati litono. ²⁴ Kaikonde etie inde ongo oengi obanyei ino laate otisakeleni pe omalesi ino odjangi litono liwoso la otwa wonde e libalano lisungu. ²⁵ Atie Mwengei inde amene mokalesi mosu la mboka e Yesu Kilisito Likumu lasu, kembo, osungu, okulu la okumu edjei seko la wiengele kpaa enge eeta pe sikala pe la wiengele kpaa seko. Amina.