¹ La mbuse e masio matano Ananiasi nganga-Mwengei mosungu, ayadimbali la Kaisalia la ndambo e wiloko wa moki, la moaseli mwesi la kombo Teletulusi, wamopundali Polo liwoso e likumu o moki. ² Ango emowelia iwo Polo, Teletulusi apotali omopundi atie likumu o moki, aasia, ''Nda edjei iso la logoo wosungu la owe, koto nda okalambi ekokelanaka la mu moki la kole e mamungwene ma owe ma wongesake sambo liwoso; ³ la wiengele kpaa koto alidji la wiholo kpaa, tokoyambaka eho, Moto o mogano Peliki, la dombwa ehele eyeti osungu. ⁴ Ase ibaliti wohelesi engele ndai la ogani owe, ndjongo iyakongi la owe ate la magba masungu ma owe otooke la ma sambo keke. ⁵ Laate tomoeni oholo moto opele ate adjai huko esungu, akopumbesaka koto minga atie Wayuda kpaa wango wayabati la meki kpaa. Adjei mosombesi e ma lingomba liesi e Wanazaleta. ⁶ Amekali koto obitesi tepelo nde emoheli iso, tolukali omosambesi la obilei pui djasau. ⁷ Ase Lusiasi kumu o wasoda aumali. Amolongosia la mawo masu la otetelake. ⁸ Ase ahia modeko atie wapundi wande laate wadje atie owe. Ango owe amana okomohuela, okoewa womeemene e sambo kpaa djinge ekomopundaka iso. ⁹ Wayuda koto wagemeiyali, waasali ate sambo djaho idjei ndji ndjongo. ¹⁰ Ase ango likumu o moki abandali moto la ohekeli Polo mboka easake, Polo awongosali ate, ''Nda eyewi mbai ate owe odjei mosambesi molamu e mu moki wilanga ngbii, igemei la motema mwesi osambi sambo dja mbai. ¹¹ Oengi oewi owe amene ate opoti lisio liteli mbai la Yelusalema la oyakongi, eyetakiyo masio liomu la maale. ¹² Ango egbotoli iwo mbai la tepelo, itidjaakali obati kokia la moto inga te oboleyi ebiba eesi e wato, la wasinagoga te la gbata. ¹³ Waengiti oenesi omeemene e sambo djinge wakopundaka mbai la eho sikandjo. ¹⁴ Ase ikoyambolaka wu loyi liwoso la owe ate, la odhendeli mboka enge ekowelaka iwo ma lingomba, la ndenge eho nde mbai ikomokelelaka Mwengei o watata wa mbai otomo wosatu, laate ikogemeiyaka sambo kpaa djinge iyaselani la pui, djinge idhingani koto la watiesakoli. ¹⁵ Ibati motema atie Mwengei, motemu mungu wa wato koto wakodjaaka la eho, ate libasi likodja, e wato walamu la wato wabe. ¹⁶ Mbai ikobata motema mo mbai la loyi wuho ate engele kpaa idje la oewi enge ekoenesaka ate ikeliti obe teeti liwoso la Mwengei la liwoso la wato koto. ¹⁷ La mbuse e wilanga ngbii iwongwali ndondo e moki mo mbai okawi makao e motema magba la ohii mbeka. ¹⁸ Ango edjaaki mbai okeli sambo djaho, wagbotoli mbai iyalangesi ndondo e tepelo la ndenge ewongoni, te mongindji la wato ngbii te koto la ewedje. Ase Wayuda wadji e moki mo Azia wadjaakali ango. ¹⁹ Ewongoki la iwo koto odjei ala liwoso la owe la ohelesi mbai, inga waeneli mbai la loyi liesi libe. ²⁰ Inga te ndjongo, pele djinge idjei ala waase iwo amene obe wungo waeneli mbai la eho ango eyamalali mbai liwoso la likita lisungu, ²¹ longosa ndji loyi loesi wungo wodhumbeyali mbai ango eyamalali mbai ndondo ewu ate, ''Ikosambesamaka ndondo enu la loyi e libasi e wato waguake.'' ²² Ase Peliki, ongo oewaali olamu sambo djinge idhengi mboka, aandjali wato ate wadje nbuse. Aasali ate, ''Ango Lusiasi kumu o wasoda akoyadjimba ikotena sambo djanu.'' ²³ Amotomali likumu o wasoda ate wamobanye Polo, ase watimohele miliki ongo la woyogo, atimotekese koto moto tueti e wato wande omogamesi. ²⁴ Mbuse e ma masio, Peliki adjali iwo la moli onde Dulusila, ongo odjaakali Moyuda, amotomi moto okamoweli Polo, amookali koto la loyi lodhendji omogemeiyeli Kilisito Yesu. ²⁵ Ase ango einyali inde sambo dja omeemene, la oyatekesi, la lisambesi wungo wogeleli, Peliki aokali boo, awongwesalii ate, ''Sikandjo kekeyo, ase inga engele eesi ndamu eenane ikoowela alidji.'' ²⁶ Adjaaki koto la molambe ate Polo akomoha wambele, eho lenge adjaakali omoweli mbala la mbala la osololi la inde. ²⁷ Ase la mbuse e mbula iwale Polokisi Pesitusi ayadjimbali la ebete e Peliki, ase nda Peliki abalali ate Wayuda waemele la inde, amotikali Polo anangani la woyogo.