¹ Polo adengali makumu ma likita lisungu, aasali ate, ''Wamanima, isombi liwoso la Mwengei la oewi wolangi tee la lisio la keke. ² Nganga-Mwengei mosungu Ananiasi ahali mboka la wango wadjaki ahue ende ate wamobinge la monoko. ³ Eho Polo aasia la inde ate, ''Mwengei akoobinga, owe etutu enge emunolani mondo, oyabati la osambesi mbai la ookani e pui, la ndenge ekotomaka owe wato ate wabinge mbai? ⁴ Wango wayamalali ango waasali ate, ''Okomotangakolaka nganga-Mwengei mosungu o Mwengei?'' ⁵ Polo aasali ate, ''Wamanima, itiewake ate adjei nganga-Mwengei mosungu. Laate edhingani ate, ''Oengiti oasi obe la kumu e wato wa owe.''' ⁶ Ango eyewali Polo ate ndondo ewu edjakali la Wasadukai koto la Wapalisai, apotali ohumbi pwi ndondo e likita lisungu ate, ''Wamanima, idjei Mopalisai, mana o Wapalisai. Ikosambesamaka la loyi e mwano e libasi e wato waguake.'' ⁷ Ango easia inde ndjongo, likaka eumali ndondo e Wapalisai la Wasadukai, mongindji mokawanali. ⁸ Laate Wasadukai wakoasaka ate libasi liti, ahumbwa koto ati, elimo koto ati, ase Wapalisai wakogemeiyaka sambo djaho kpaa la hoho. ⁹ Ndjongo ondungbiani wotetelake epumbali, wiloko wadji e mongindji e Wapalisai wayamalali, wapotali oasi la mosio mosungu ate, ''Toeniti obe teeti atie oholo moto. Ase inga elimo eesi, te ahumbwa mwesi asololali la inde?'' Totisane la Mwengei. ¹⁰ Ase ango eumia likaka lisungu ndondo ewu, kumu o wasoda awangali ate wakomotenakola Polo wisuki, ndjongo aasali la wasoda ate wayadimbe omolongosi Polo ndondo ewu, wamolingese la monguta mou. ¹¹ La likolo linge libileyi Likumu ayamalali ahue ende, aasali ate, ''Dja la mogalia, laate nda ehekeli owe litotoli lilamu la Yelusalema la sambo djinge idhengi mbai, ndenge kikima koto oengi ohekeli litotoli la Loma.'' ¹² Ango otania wuse, Wayuda wakelia likita libe, walapali koto ate obe ewakwele, inga walaka te wakenga liwoso ate wamoole Polo. ¹³ Edjakali wato oyeti tuku inei nde wakelali linge likita libe la olapi enge enangani la mwano mbe. ¹⁴ Wakeeli atie wanganga-Mwengei makumu la wiloko, waasali ate, ''Toteniga ndai ate totilaka, totikenga koto tee ekomoola iso Polo. ¹⁵ Ndjongo ndi sikandjo, ino la likita lisungu moewisani kumu o wasoda la hoho kole enge inde awongi odjimbeseli ino inde nda odjeini nde la posa e odhendeli loyi londe la ndenge ndamu. Ase liwoso ate aume ahue, iso tokoyawongela laate tomoole.'' ¹⁶ Ase mana o manango o Polo o moli aokali mboli e lisala linge limobatelali iwo Polo, adjaali olingeli la monguta e wasoda la omoewesi Polo. ¹⁷ Polo amowelali mwesi e makumu o wasoda atie inde aasali ate, ''Mokpala oholo mana opele atie likumu o wasoda, la ebili ate adjei la ma loyi e moaselake.'' ¹⁸ La ndjongo, akeeli la inde okamotiki atie likumu o wasoda, aasali ate, ''Polo moto o woyogo aweli mbai atie inde, aongia mbai ate imokpale oholo mana opele atie owe, la ebili ate adjei la ma loyi e oaselake.'' ¹⁹ Kumu o wasoda amohelali ewo, akia kelekele, apotali omohueli iwo waale ate, ''Nde ebali owe oaseli mbai?'' ²⁰ Mana opele oho aasali ate, ''Wayuda waokani ate waonge owe omodjimbe Polo la likita lisunu e ekundu nda wadjei nde la posa e oewi olamu enge emodhendji.'' ²¹ Ase loyi lo kole edjei, owe otibale ate waogemeiyese, laate pele djau oyeti tuku inei wamobateli lisala, walapi koto ate watilaka watikenga koto inga watimooleyo. Wayawongeli sikandjo, wakolambelaka ate liwuna lilongwe atie owe.'' ²² Kumu o wasoda amodheeli ongo mana opele ate ake mbuse e omoaseli ate, ''Otimoewese moto toeti ate ondjaseli mbai.'' ²³ Awawelali waale ndondo e makumu ma wasoda, aasali ate, ''Wongeleni wasoda kama iwale la osombi tee la Kaisalia, la wasoda koto tuku sambo wango wakosombaka la punda, la wasoda koto kama iwale e makonga, la engele e isato e likolo.'' ²⁴ Wongeleni koto wa nama wango wakokpalaka mikpali laate emokpale Polo, emoumese koto Polo olamu atie likumu o moki Peliki. ²⁵ Adhingali ekpata la ehele ndenge: ²⁶ ''Mbai Kolode Lisiasi, atie moto o mogano likumu o moki Peliki, mobale. ²⁷ Wayuda wamoheli oholo moto opele, walukaki ate wamoole, ase mbai idjaali obangu la ebiba e wasoda, imokalesali, laate ioki ate inde adjei Moloma. ²⁸ Nda elukali mbai oewi olamu kole enge edjaakali iwo omopundi, imodjimbali la likita lisungu ewu. ²⁹ Idjaali oewi ate wadjaki omopundi la loyi e pui djau, ase te la loyi enge ewongi la logo inga te la woyogo. ³⁰ Nda endjaseli iwo mbai ate likita liesi libe ekowongelanaka la omokeli moto opele oho obe, imotomi inde atie owe la loga, ihii engbundu atie wapundi wande ate waase mbe djande liwoso la owe.'' ³¹ Wasoda waho wamototali Polo la otutei engbundu enge etotali iwo, wamokpalali la likolo la Atipatilisi. ³² Ekundu eho, wahekeleli mboka la wasoda wango wakosombaka la punda ate wahele mboka mongindji la inde, ase iwo waongwali la monguta e wasoda. ³³ Wasoda wango wakosombaka la punda walingelali la Kaisalia, wamohali likumu o moki ekpata eho, wamoinyali koto Polo. ³⁴ Ango etangali likumu o moki ekpata eho, amohuelali Polo inga adjei moto e nda moki. Ango edjaali inde oewi ate adjei moto o Silisia, ³⁵ Aasali ate, ''Ikooka owe olamu ango ekodja wapundi wa owe. Atomali ate wamobanye la monguta e likumu Elode.''