¹ ''Wamanima la wa wawa, okani osambi wo mbai liwoso lanu sikandjo.'' ² Ango eokia iwo ate akoasaka la iwo la monoko mo Ebele, wadakali alidji bii la oeteli, waasali koto ate, ³ Idjei Moyuda, iwotami la Talasi e Silisia, ase itangi kalasi la mu moki la makolo ma Gamaliela. Itiesanate la otutei okulu e pui e wa tata. Idjakali moto o mogalia la loyi e Mwengei, ndenge ino koto kpaa odjeini la eho la masio ma keke. ⁴ Ibheteleli ehele mboka tee la logo. Idjakali oheli pele la wali la miliki koto owatomi la woyogo, ⁵ nganga-Mwengei mosungu la liboleyani kpaa e wiloko waengi ototoli la loyi e mbai. Itotali koto matanda atie iwo la loyi e wamangbasu wango wadjei la Damasi, ikeeli koto okpali wango wadjakali ongo wahelani la miliki la odji la iwo la Yelusalema laate watote etumbu. ⁶ Idjaaki okii ndjongo, ango eyandongbia mbai ahue e Damasi, ahue e mbile, ngbai esi engalelali mbai. ⁷ Ikuali la mbume, iokali mooli mwesi moasali la mbai ate, 'Saulo, Saulo, ndjoni okoeneseke mbai odjidji? ⁸ Mbai iwongwesali ate, 'owe ndai, Likumu?' Aasali koto la mbai ate, 'Mbai Yesu, o Nazaleta, ongo owe okomoeneseke odjidji.' ⁹ Kaikoase, wato wango wadjaki mongindji la mbai waeneli ngbai eho ase watiokali mooli mungu modjaki oaseli mbai. ¹⁰ Iyasali ate, 'Ikele nde, Likumu?' Likumu aasali la mbai ate, 'Yamala, keke la Damasi, ongo wakoewesa owe sambo kpaa djinge ewongi la owe okeli.' ¹¹ Nda etidjakali mbai oeni ema la loyi e otwa e enge ngbai, iwumali la Damasi, idjaki ogulani la ewo e wango wadjaki mongindji la mbai. ¹² Ongo Ananiasi, moto opele ongo okomowangaka Mwengei la obileyi pui, koto adjaki la matotoli malamu atie Wayuda kpaa wango wayabatali ongo. ¹³ Adjali atie mbai, ayamalali ahue e mbai, aasali la mbai ate, ''Saulo, manima, ene alidji.'' Idjambali maiso la omodhendji ndji la enge engele. ¹⁴ Aasali koto ate, Mwengei o watata wasu awoni owe laate oyewe mwano monde, koto omoene Moto molamu, koto ooke mooli mooli monde. ¹⁵ Laate okodjaa mototoli monde la wato kpaa la sambo kpaa ieni owe la wioki owe. ¹⁶ Sikandjo okolambelaka nde? Yamala, tota patisa, dhumbeya kombo ende laate okpole masumu ma owe. ¹⁷ Mbuse iwongwali la Yelusalema, idjaaki oyakongi ndondo e tepelo, ilengelali la saki. ¹⁸ Imoenia inde akoasaka la mbai ate, ''Kela obangu, pumba galagala la Yelusalema, laate watigemeiya litotoli la owe la loyi e mbai.'' ¹⁹ Iyasali ate, 'Likumu, iwo amene wayewi ate idjaaki olingesi la woyogo wango wakogemeiyaka owa, la owabingi pimbo la wasinagoga djiesi kpaa. ²⁰ Koto ango eswani makila ma Setepano mototoli mo owe, mbai pendja iyamalali ango, idjakali ogemei, la obanyei wisindji wa mokpoto e wango wadjaki omooli. ²¹ Ase aasali la mbai ate, ''Keke, ikootoma lihele atie wapagano.'' ²² Wamookali tee la wungo loyi ndjongo. Wadjambali miili mawu, waasia ate, ''Molongosa moto e ehele ndenge la mbume, laate ationgoli odjei la mokalo.'' ²³ Nda edjaaki iwo ohumbi la olumbi wisindje wau wa mikpoto likolo, la oyandji limungele likolo, ²⁴ kumu o wasoda atomali wasoda ate wamolingese Polo la monguta mo wasoda, aasali koto wamobinge pimbo laate aase, ndjongo akoewa olamu nda kole enge iwo wakopamaka la loyi ende. ²⁵ Ango emolangeya iwo laate wamobinge pimbo, Polo aasali la kumu o wasoda ongo odjaaki ango mine ate, ''Pui ehekeli ino mboka ate obingeni pimbo la moto ongo odjei Moloma ongo okwiti te la loyi loikima?'' ²⁶ Ango eokia likumu o wasoda ndjongo, akeeli atie kumu o wasoda, amoaselali ate, ''Obali okeli nde? Denga ongo moto adjei Moloma.'' ²⁷ Kumu o wasoda ayandongbia ahue, amoaselali ate, ''Yewesa mbai, odjei Moloma?'' Polo aasali ate, ''Eiye.'' ²⁸ Kumu o wasoda awongwesia ate, ''mbai isombi ehele osomi e mana o moki la wambele ngbii.'' Ase Polo aasia ate, ''Ase mbai iwotani nde la eho. ²⁹ Ndji la enge engele, wato wango wabalali omobingi pimbo laate aase, walongwali ahue ende, koto kumu o wasoda apotali owangi ango eyewali inde ate adjei Moloma la ndenge emonangali inde la miliki. ³⁰ Ekundu eho, ango ebalali likumu oewi la omeemene kole enge Wayuda wakomopundaka, amotokolali Polo, atomali ate wanganga-Mwengei wayakokeye la likita lisungu. Amodimbali Polo, amoamalesali ndondo ewu.