¹ Ango ekawania iso la iwo la magba, tototali mboka e ewale, la obangu tosombali toumali la gbata e Kosi, ase ekundu eho la Lode, koto olongoyi ongo tee la Patala. ² Ango egbotoli iso andondoli eesi enge ekokpandaka la Penesia, totelali eho, tokeeli. ³ Mbuse e oeni esi e Sipele, todheeli eho la ewo e liali, tobiliali Sili, toamalali la Tila laate ongo nde andondoli eongoli odjikesi wihoo waho. ⁴ La oluki luki toeneli watutiani, toyabatali ango masio sambo. Ase la mboka e elimo wadjakali omoaseli Polo mbala la mbala ate atike la Yelusalema. ⁵ Ango eseselia iso oengesi masio maho, topumbali koto tokeeli, iwo kpaa la wali la wana wadjaali otiki iso tee la saa e gbata. Tomaali mauli la kondolo, toyakongoli, ⁶ tohanali mobale, iso totelali andondoli, ase iwo wawongwali atie iwo. ⁷ Ango eseselali iso okpandji la Tila, toumali la potolemaisi. Tohekeleli wamangbasu mobale, toyabatali mongindji la iwo lisio liikima. ⁸ Ekundu eho, tokeeli toumali la Kaisalia, tolingelali la monguta mo Pilipo moenesi mboli ndamu, ongo odjakali mwesi e pele sambo e mogano molamu, toyabatali mongindji la inde. ⁹ Moto opele oho adjakali la wana wawali wanei, waseka, wango wadjakali otiesakoli. ¹⁰ Ango edjaaki iso oumoi masio ngbii, motiesakoli mwesi kombo ende Agabusi, alongwali la Yudea. ¹¹ Adjia atie iso, atotali mokaba mo Polo, ayanangali makolo la mawo, aasali ate, ''Elimo satu easi ndjo, 'Moto ongo odjei meemene mu mokaba, Wayuda wakomohela ndjo la Yelusalema, wakomokawa la mawo ma wapagano.''' ¹² Ango eokali iso ndjongo, iso la wato e eholo eho topotali oyatati la inde ate atitele la Yelusalema. ¹³ Polo awongosali ate, ''Okokelakani nde la ilelo koto la ogenesakoli mbai motema? Iyawongeli te saa la loyi ehelanake, ase laate ikogwa la Yelusalema la loyi e kombo e Likumu Yesu.'' ¹⁴ Nda etidjakali inde ogemei, iso togemeiyali eho la dji wingbundu, ''Mwano mo Likumu ekelane.'' ¹⁵ La mbuse e masio maho tohelali wihoo wasu koto totelali la Yelusalema. ¹⁶ Wadji ndondo e watutiani wa Kaisalia wakeeli koto mongindji la iso, la okpali iso atie moto ongo toengali oyabati atie inde Manasona mwesi ndjo, moto o Sipele, mwesi e watutiani wa poo. ¹⁷ Ango eumali iso la Yelusalema, wamangbasu watoyambali la mwemu. ¹⁸ Ekundu eho, Polo alingelali mongindji la iso atie Yakobo, koto wiloko kpaa wadjakali ongo. ¹⁹ Polo awahali mobale, apotali owaewisi ema esi la esi la sambo kpaa djinge Mwengei akelali atie wapagano la mboka ende. ²⁰ Mbuse e owaoki iwo, wapotali omohekeli Mwengei otwa, wamoaselali koto ate, ''Okoeneke, manima, ndenge wato ngbii e wagamei wadjei la ndondo e Wayuda. Iwo kpaa wadjei la mogalia la loyi e pui. ²¹ Waokali ondungwani la loyi e owe ate okotiesakolaka Wayuda wango wayabati ndondo e wapagano ate wamotone Moize, okoaselaka iwo ate watitene wana wau kombeni koto watisombe la otutei wikaleli winge wiyewani. ²² Tokele woni? La omeeemene wakoewa ndji ate odiga. ²³ La ndjongo kela nda ekotiesakola iso owe. Pele inei wadjei la iso ala, wango wadjei la ndai ewu. ²⁴ Tota wango pele, keke oyalangesi mongindji la iwo, putela iwo sambo kpaa, laate wadjengene sue. La ndenge eho, moto kpaa akoewa ate ondunguani wungu waewisali iwo la loyi e owe edjei e moleho, ase ate owe okosombaka alima, owe amene koto okobanyaka pui. ²⁵ Ase la loyi e wapagano wango wagemei, totomi eteneli enge etoti iso ate ewongi watone wihoo winge wihekelani mbeka la wilima, la otoni makila, la wihoo winge wipotoni la pite. ²⁶ Polo akpalali pele djaho ekundu eho, ayalangesali mongindji la iwo. Alingelali la tepelo, la oyewesi masio woni eongoli oeti la loyi e olangesani wuho, tee ango likao e ongoli ehekelani la loyi e moto la moto. ²⁷ Ango epakali masio maho sambo weengi, Wayuda weeti wango walongwali la Azia, ango e moenia iwo Polo ndondo e tepelo, wangalesia wato ngbii, wamobatali mawo. ²⁸ Wadjakali opami, ''Pele dja Isalayele, togamesani iso. dengani moto oholo akoinyaka wato kpaa wiati la wiati ate wadendeye wato wasu, pui la ehele ebete. Aleeti awalingesi Wageleki ndondo e teplo, awumesia ehele ebete esatu onalili. ²⁹ Laate liwoso wamoeneli Tolopimi moto o Epeso la gbata mongindji la inde, eho lenge wadjakali omungoyi ate Polo amolingesi la tepelo. ³⁰ Moki kpaa momemelia, wato kpaa waboleyanali, wamohelali Polo, wamogulia saa e tepelo, wadhihia moluhe mo tepelo la loga. ³¹ Ango edjaaki iwo oluki mboka la omooli Polo, mboli emoumelia likumu o ebiba e wasoda ate Yelusalama kpaa edjei la minga. ³² Mbala kikima atotali wasoda la makumu wamu, ayadjimbali obangu atie iwo. Ango emoenia iwo likumu o wasoda la wasoda wadheeli omobingi Polo. ³³ Likumu o wasoda ayandongbali ahue amopotoli Polo, awatomali ate wamohele la miliki miale. Apotali oluki oewi inga edjei ndai koto nda loyi ekeli inde. ³⁴ Ase wadji e wango wato ngbii wapotali opami la edji loyi, waadji koto la edji loyi. Nda inde amene atiengali oyewi te loyi eesi la omeemene la ehele ewedje, atomali ate wamokpale Polo la monguta e wasoda. ³⁵ Ango eumia inde la eteleli, sambo ebitanali la oeteli, ndjongo wasoda wamokpalali Polo la loyi e ongali o wato ngbii. ³⁶ Laate ngbii e wato waho wadjakali ndji otutei, wadjaki opami, ''Moolani!'' ³⁷ Ango epaki Polo olingeli la monguta mo wasoda, amoaselali likumu oho o wasoda ate, ''iengi ototi mboka la oasi loyi liesi?'' Likumu o wasoda amoaselali ate, ''Okoasaka monoko mo Geleki? ³⁸ Eti owe Moezipito ongo, la masio mayeti apumbesali minga, akpalali la esobe pele koto inei wango wadjakali la wiwuni?'' ³⁹ Polo aasali ate, ''Idjei Moyuda, o Talasi ndondo e Silisia. Idjei mana o moki e gbata enge eyewani olamu. Ndjongo iyakongi la owe pa mbai mboka iase la wato.'' ⁴⁰ Ango likumu o wasoda amohia mboka, Polo ayamalali la witeleli, akelelali wato elembo la ewo ende. Ango elingelali logoo, aasali la iwo la monoko mo Ebele. Aasia ate,