¹ Ango etitimali ewedje, Polo awelali watutiani, mbuse e owahekeli mogalia la owahekeli mobale e okawani, apumbali la oki la Masedonia. ² Mbuse e okpandji winge gbata la ohekeli mogalia la wango wadjakali ongo la sambo ngbii, adjaali la Geleki. ³ Mbuse oetesi ndebo isato ongo, nda Wayuda wamokelelali likita ango edjakali inde ahue e oki la andondoli la Sili, atotali mwano e wongwake la Masedonia. ⁴ Wango wadjakali osombi mongindji la inde edjakali , Sopatela mana o Pilusi mo Yabeloya, Alisitalaka la Sekundusi wato wa Tesaloniki, Gayusi mo Yadeleba, la Timoteo, koto la Tisiki, la Tolopimi, wato wa Azia. ⁵ Iwo wakeeli liwoso, wadjakali otolambeli iso la Toloasi. ⁶ Ase iso tolongwali la Pilipi, tototali mboka e ewale mbuse e masio e makoke mango matikundaka, todjaali atie iwo la Toloasi mbuse e masio inga matano. Ongo toetesali masio sambo ⁷ La lisio la yenga, ango egbotonoli iso la olaki okoke, Polo apotali owatiesakoli, laate abalali oki ekundu eho, agulali matiesakoli mande tee la etete. ⁸ Matambe ngbii madjakali la mwange e likolo ongo eyaboleyali iso. ⁹ Mana opele mwesi, kombo ende Etisi, ayabatali la lininisa, adjakali la ilo. Ango Polo adjakali oguli matiesakoli mande, ilo emogulali, akwali olongoyi ngbalando esato e monguta tee la mbume, wamolongosia ndji aguiga. ¹⁰ Polo ayadjimbali la mbume, ayalumbali likolo lande, amolingali koto la mawo, aasali ate, ''Otiyasumbweni, laate molimo monde modjei ndondo ende.'' ¹¹ Atelali alidji likolo, abukia okoke, alakia. Mbuse e okpomi engele ndai tee otani o wuse, ase akeeli. ¹² Wamototali palanga oho la mokalo, wabondesanali koto. ¹³ Toetali sikala liwoso ongo edjakali andondoli, tokeeli la andondoli tee la Asosi. Toanali omototi Polo, la oengani la tomani djande, laate abalali okeli okendo la makolo. ¹⁴ Ango andongbanali la iso la Asosi, tomolingesali la andondoli, ase tokeeli la Mitilena. ¹⁵ Ango elongwali iso ongo ekundu eho, towumali ngambo enge edhendani la Kiosi. Ase ekundu eho toyamalali ma keke la Samosi, mbuse e lisio laho, toumali la Mileta. ¹⁶ Laate Polo atibalali oyamali la Epeso, la ebili ate atienge oetesi engele ndai la Azia; laate adjakali okeli galagala la oumi la Yelusalema lisio e yenga e Patekote inga akodja la nano. ¹⁷ Ongo la Mileta atomali wato la Epeso, la oweli wiloko wa lingomba. ¹⁸ Ango eumali iwo atie inde, aasali la iwo ate, ''Oyewini olamu ndenge, opoti lisio la poo enge ehotoli mbai mbume e moki mo Azia, idjakali mongindji la ino engele kpaa. ¹⁹ Imokelelali Likumu nda motuke la elimo eyatitimesake, la po, la omekani enge eumelali mbai la loyi e makita mbe e Wayuda. ²⁰ Itiyatekisali oyinyei ino sambo kpaa djinge idjakali la kole inga otiesakoli ino la wibete e wato kpaa koto la munguta la monguta, ²¹ itotololi Wayuda la Wageleki olamu olamu sambo djinge idhendji okukoli motema atie Mwengei koto omogemeiyeli Likumu lasu Yesu. ²² Dhenga sikandjo, ihelani la elimo, ikokeeke la Yelusalema, inga te ate iyewiti nda sambo djinge ikoumela mbai ongo, ²³ longosa ndji ehele, moki la moki elimo satu edjei mbala la mbala ototoleli mbai ango ekoasaka eho ate, miliki la wodjidji ekolambelaka mbai. ²⁴ Ase itidhendelaka molimo mo mbai ate edjei la kole ngbii atie mbai, ema e kole nde iengese la mwemu obangu wo mbai la otomo wungo itotali atie Likumu Yesu, la ohekeli litotoli olamu la loyi e mboli ndamu e magba masungu ma Mwengei. ²⁵ Dhenga sikandjo, iyewi ate ino kpaa wango itiesakolalini okumu, otieneni kine mbanda e mbai. ²⁶ Iototini ino watotoli la lisio la keke ate ilangi la makila ma wato kpaa. ²⁷ Laate itiatekisali oyewisini ino mwano kpaa mo Mwengei. ²⁸ Okakebeni la kole e ino amene, koto la kole e lingomba kpaa enge elimo satu e obatini ino wabanyei la ndondo eho. Laate obanyeni liboleyani e Mwengei enge inde asombali la makila ma mana onde moikima. ²⁹ Iyewi ate mbuse e oki wo mbai, mbwa mbe dja mitulu wakolingela ndondo enu, watikelela koto lingomba sambo ndamu. ³⁰ Ndondo enu pele wakoyamala, wakotiesakola sambo dja moleho la oguli watutiani wabileye iwo. ³¹ Eho lenge otilangaleni ilo. Otiosaneni ate wilanga wisato likolo la wuse idjakali oaseli mwesi la mwesi la po. ³² Sikandjo ikoodhekeni la mawo ma Mwengei koto la engbundu e magba masungu mande, engbundu enge eengi omayi ino koto ohekeli ino lisango ndondo e wango wasatisani. ³³ Itinonali palata e moto, te wolo, te wisindje koto. ³⁴ Ino amene oewini ate ma mawo maengesali wihoha wa mbai koto e wango wadjaki mongindji la mbai. ³⁵ Ienesini ino la sambo kpaa ate la okeli otomo otetelake ndenge eho nde oongini ogamesi wango wadjei wato wamageni, koto otiosaneni wingbundu wa Likumu Yesu, ango inde amene aasali ate,''Mwemu mokawake moeti mototake.'' ³⁶ Mbuse e oseseli oasi djinge sambo, amaali mauli mongindji la iwo kpaa, ayakongali. ³⁷ Iwo kpaa watobiali la wilelo nee, wamokweleli Polo la kingo, wamombomboli la magba. ³⁸ Waokali magba masungu la engbundu enge aasali inde ate watiene kine mbanda ende alidji. Ndjongo wakeeli omotiki la andondoli.