¹ Ango edjakali yo Apolo la Kolito, Polo aumali la Epeso mbuse e okpandji la mboka enge eyeti miki, agbotonoli la wadji watutiani ongo. ² Polo aasali la iwo ate, ''ototalini elimo satu ango egemeiyalini ino?'' Iwo wamowongweselali ate, ''Tookaki yo ate elimo satu ekodjaaka.'' ³ Polo aasia la iwo ate, ''Ototini nda patisa?'' Wamoongweselia, ''Patisa e Yoani.'' ⁴ Polo aasali ate, ''Yoani apatisali la patisa enge edjei elembo ekukolake motema, adjakali oaseli wato ate, wamogemeiyele moto ongo ogeleli mbuse ende, iyenyei ate omogemei Yesu.'' ⁵ Ango eokali iwo ndjongo wapatali la kombo e Likumu Yesu. ⁶ Ango Polo awatambelia iwo mawo, elimo satu edjimbelali iwo, wapotali okpomi la minoko madji koto la otiesakoli. ⁷ Iwo kpaa wadjakali pele inga liomu la iwale. ⁸ Ango elingelali Polo la sinagoga, aasali la mohandja la oumoyi e ndebo isato, adjakali oasani la wato la djinge idhendji wokumu wo Mwengei la owagemeiyesi wango wadjakali omooki. ⁹ Ase weeti wadjaaki ndji otetelesi mitema mau, watidjakali koto ogemei, la ndenge wadjakali oaseli obe la loyi e mboka liwoso la wato ngbii, Polo alongwali atie iwo awakatolali la watutiani. Apotali otisakoli la kalasi e Tilanusi. ¹⁰ Akelali ndjongo wilanga wiale, ndjongo wato kpaa wango wadjaki oyabati la moki mo Azia waokali engbundu e Likumu, Wayuda la Geleki. ¹¹ Mwengei koto adjakali okeli tomo sungu e okulu la mawo ma Polo, ¹² wadjakali ototi mambusu la wisindji wa otomo e wenge wande, la owakpaleli wato wa wikoni, wikoni wau widjakali osili, milimo mibe koto idjakali opumbi. ¹³ Ase Wayuda wadji wango wadjakali osombasombi, wango wadjakali opumbesi milimo mibe, wamekali koto otoli komnbo e Likumu Yesu atie wango wadjakali la milimo mibe, waasia, ''Ikootomakani la kombo e Yesu ongo okomotiesakolaka Polo.'' ¹⁴ Kaikoase, ndjenga sambo e moto mwesi kombo ende Sekeba nganga Mwengei likumu Moyuda, wadjakali okeli ndjongo. ¹⁵ Ase elimo mbe ewongoselali iwo ate, ''Imoyewi Yesu, imoyewi koto Polo; ase ino wandai?'' ¹⁶ Moto ongo odjaaki la elimo mbe awahumbwelelali iwo kpaa, ahotokolali wesi la wesi la iwo, awaetali la okulu, ndjongo watilali la monguta muho lingbengbele, wakondjokonoli. ¹⁷ Loyi luho loewanali la wato kpaa, Wayuda la Wageleki wango wadjakali oyabati la Epeso; mbangi ewalingelali iwo kpaa, kombo e Likumu Yesu edjakali ndji ototi mogano. ¹⁸ Ngbii ndondo e wango waumali wagemei wadjakali odji olumboli la oyewesi tomo djau la hoho. ¹⁹ Ngbii e wango wadjakali okeli tomo dja malando, wakokeyali wahala wau ebete eikima, watumbali eho la maiso ma wato kpaa. Watangali motio moho kpaa waenali ate eengali la motio e wadjenge wa palata koto tuku itano. ²⁰ La ndenge esi e okulu, engbundu e Mwengei edjakali obeki la olongi. ²¹ Mbuse e djinge sambo, Polo aanali la motema monde ate, mbuse e okpandji Masedonia la AKaya, akoke Yelusalema, aasali, ''Mbuse e oumi ongo iengi koto oeni Loma.'' ²² Polo atomali wato waale ndondo e wango wadjakali omokeleli la masedonia, Timoteo la Elasita, ase inde amene atikalali ma engele ekeke la moki mo Azia. ²³ La enge engele minga misungu mipumbali ongo la Epeso la loyi e mboka. ²⁴ Laate moto mwesi kombo ende Demetiliusi, motuli mo Palata, la otomo wonde emaake minguta mikeke e oyakongi e Alatemisi, adjakali olingeseli wato wa tomo wa otata wadjenge ngbii. ²⁵ Awaboleyali koto la wango wadjakali okeli la wihoo e ndenge eho, aasali ate, ''Pele, oyewini olamu ate ogumake wosu ekolongwaka la wu otomo. ²⁶ Okoenekeni koto okookakani ndenge Polo oho, te ndji la Epeso ase wiholo pene e kpaa la moki mo Azia, agemeiyesi wato ngbii. Awatomia wagemeiye eeti mamungo, aasia, ''Wamwengei wango watulani la mawo wati wamwengei. ²⁷ Wuko etisuke ndji la wungo loyi ate otomo wungo wosu wokosila mogano, ase alidji ate tepelo e mwengei-moli mosungu Alatemisi ekotolono ema pamba, te wosungu wonde wungo moki kpaa mo Azia la mbume djinge wato wayabati ekoyakongaka, etikali ma keke eume pamba.'' ²⁸ Ango eokia iwo ndjongo, nda etumali iwo koto la limemu, wato waho wapotali opami, waasia, ''Alatemesi o Waepeso adjei mosungu.'' ²⁹ Gbata kpaa etumali la minga, iwo kpaa wayasuali la ebete e wiyoka, wakpalali la oteteli mongindji la iwo Gayusi la Alisitalakisi, Wamasedonia, wiino wa Polo la okendo. ³⁰ Polo abalali olingeli ndondo atie wato waho, ase watutiani watimohali mboka. ³¹ Wadji wiloko wa Azia, wango wadjaaki wiino wande, wamotomelali mwendji la omwaseli ate atilingese mokalo monde la huko la ebete e iyoka. ³² Wadji wadjakali opami la loyi eeti, koto wadji loyi eeti, laate liboliani lidjakali la minga, ngbii ndondo e wu watiewali nda ema eyaboleyi iwo. ³³ Iwo kpaa wamototali Alezandela ndondo e ngbii e wango wato, Wayuda wamohilali liwoso. Alezandela akelali elembo la ewo ende, abalali osambi la loyi e inde amene liwoso la wato waho. ³⁴ Ase ango eyewia iwo ate inde adjei Moyuda, iwo kpaa wapamali moli sa mwesi ahue e wiengele wiale ate, ''Alatemisi e Waepeso adjei mosungu.'' ³⁵ Ango modhingi sambo e gbata adakisali ngbii e wango wato bii, aasali ate, ''Pele dja Epeso, ndai ndondo e wato atiewe ate gbata e Waepeso edjei mobanyei e tepelo e Alatemisi mosungu koto la elima enge ekwali tee ongo likolo? ³⁶ Ndjongo, nda sambo djaho eengiti obatani kokia, ewongi ate ogbuteseni mitema, otikeleni koto sambo la obangu. ³⁷ Laate okpalitini wato wango wadjei wato wayiwa la watepelo, wati koto wato wango wakomotangakolaka mwengei osu o moli. ³⁸ Eho lenge, inga Demetiliusi la wato wa tomo dja mawo wango wadjei mongindji la inde wadjei la loyi e moto mwesi ndjo, masio masambake madjei, makumu koto wadjei. Wadje opundani. ³⁹ Ase inga okolukakani ema eeti oyeti wungo, eho ewongi otenani la liboleyani nda ehahani iso. ⁴⁰ Laate todjei la huko e opundani ate todjei wato wa ewedje la loyi e keke, nda eti la ema teeti enge eengi otohekeli iso mboka e oenesi kole e ehele liboleyani e ewedje. Ango esisali inde oasi djinge sambo, aongoli liboleyani liandjane.