¹ La enge edhendi owongoi e likumu lasu Yesu kilisito, la obondani wosu atie inde, tokoyangongaka la ino, wamangbasu, ² otiadheleni galagala la ekeleli elamu e ino pe otidjeni motema likolo la liloba liesi linge lieneni, te la mboli esi enge esumbani la monoko, te la okpengbeite esi nda elongoyi atie iso la oasi ate lisio e Likumu edjiga. ³ Moto tweti atiokoseni te nda ndenge. Laate ekokiti odji inga owungi edjakiyo alidji mobuki pui aenenekiyo, inde mana obitani. ⁴ Akoamalelaka pe oyamalesi likolo o moto kpaa ongo owelami mwengei inga ema e oyakongi, tee oyabati la tepelo e Mwengei, pe oyaenesi la hoho ate adjei mwengei. ⁵ Owosanya ate, ango edjaakiyo mbai mongindji la ino idjaaki owaseli ino djinge sambo? ⁶ Pe sikalandjo oyewini ema enge ekohelaka mboka, laate inde aenesame engele eengi la inde. ⁷ La eho liisani ebukake pui enge epotiga okeli otomo. ⁸ La engele eho mobuki pui akoenene, inde ongo Likumu Yesu akola la elimo e monoko monde alidji akowumisa ema pamba la oenesi owongo e inde. ⁹ Kasi odjei e mobuki pui eokani la otomo dja mondjili mongindji la tomo kpaa e okulu pe wihaleli dja moleho pe la sambo kamwake mango makoeneseke sambo djinge makodjaka, ¹⁰ Pe la ekosako enge elongoyi la sambo kpaa enge edjangi omeemene la loyi e wango wakobitanaka libela, nda liputi la ndenge watieneseli ate wabali omeemene laate wakale. ¹¹ Eho lenge Mwengei adheyi tomo ewusisanake ekelame atie iwo, laate wagemeye moleho ¹² laate iwo kpaa wasambesame la loyi ate watindjimali omeemene, kasi wayemelali la sambo edjangi omeemene. ¹³ Kasi iso, tokoki omohekeli Mwengei dombwa engele kpaa la loyi enu, wamangbasu wango Mwengei awabali, laate Mwengei owonali ino tee la lipoteli la kole e mokalo la ndenge esati ino la elimo pe la mboka e ogemei wonu ndondo e meemene. ¹⁴ La ngbondo eho nde inde aowelali ino la mboka e mboli ndamu enge ekotiesakolaka iso, la ototi otwa e Likumu lasu Yesu Kilisito. ¹⁵ La eho, wamanima, amalani ngbi pe helanani la ekaleli enge totiesakolali ino, la monoko pe la madhingo. ¹⁶ Alidji, Likumu lasu Yesu Kilisito inde amene pe Mwengei sangbasu, ongo otobalali iso pe ahekeleli libondjisi e libela la oani e olamu la mboka e magba masungu, ¹⁷ wabondese mitema manu pe wahekele ino otetelake la otomo kpaa ndamu pe la liloba kpaa ndamu.