¹ Ngali ne abi fano: te kpara le na lila Eklezia, imbila ba imakayi jo kitima. ² Malila ka Eklezia ale ba engi ngbo jo kpara, ale ba otsiangi de osisitingo bili de, engingbo de worose bili, engbo kpara na too de, tano engbo kpara na ngala de jo makina, dengi ngbo kpara nato kobo; ³ Engbo kpara na ndjo fande de; na ndjandja de; nabho de; engbo na toso na kose de, ta engbo kpara na gungo. ⁴ Ale ba elila engo kangu bakpe bakana malingita, tengi koko odjadji jojo. ⁵ Kokorode te kpara kpe mbila de nalila engili kangu, feyiye lingita na lila Eklezia ka Eme? ⁶ Kparano ingingbo diri eyi lengo na to de, te angbo ba de engi koto moro na ndjele engiza borodo bakana gbongwa emakayi ete. ⁷ Anga ba ingingbo de ngala go djila na nani kilidje, toka otsiangi kokorode de ingi te go matek ka Gbongwa. ⁸ Oyile ka Eklezia aleba ingingbo kpara na ngala odjidji ngali kaye de; ondjondjo nedjo fande de, ogegele kose nasiti makina de. ⁹ Aleba oto teye nalila ongo namale nashudhayi, bakana de siti makina ekokoto gosa guma, ¹⁰ Ayo ba olewuo fekendji, ano te olingitano, ozatawo go kitima na Eklezia. ¹¹ Owaraye aleba engingbo ohiye ngala; idji ele ka o kpara de, engingbo na toso de, taso engingbo kpara na lingita go ngo nde. ¹² Oyi le go Eklezia ayo ba engingbo de worose bili; nakoko odjadji kawuo de nalila ingili kawuo go jo metere, ¹³ Onono omemele jo kitima kawuo etokpa go Eklezia de ongbo seke na ngala, de imaka makina nalongo na male de ono tangbodi no go mabite ka Yezu Kirisitu. ¹⁴ Ma hete femo waraga ne, made makina mano sidi natsiamo sitinga kini, ¹⁵ Anga bane te malifila, waraga ne eshudha femo enene alingita ba de modhoko esuga ka okpara na Eklezia ka Eme na makowho, no ingi bakana mbaraza na été tongo Eme eshudha feyi. ¹⁶ Afano, engo na mawo ne ileyi de gondjo ndemini, angbengbe pima! Kokorode, Kirisitu emeyi natsia teye na kote ka okpara; Sipiritu Santu ka Eme akowho engi; ohi nde edje pangbanga kangi, go eto ndemini okpara ole dengu, de Eme eto fengu ngala go kpé.