¹ Abagula bali muli mwe, bayumvagye ihano mbahîre nie mugula* akâbo. Nâni ndi wakuyalîza omwanzi gw'amalibuko ga kristu; nayish'ihâbwa nâni ecani cigabi okw'irenga lyabonekane: ² mukombêre nka bangere obuso Nnâmahaga amuhâga, mubulange n'obulonze bwinja nk'oku Nnâmahanga analonzize, c'arhali kukâkola erhi n'omurhima gurhabiri kwo. Mukâjira omukolo gwinyu, arhali omu kucîfinja okuba n'enfaranga, cikone omu kucîhâna okunali. ³ Murhalonzagya okurhambula n'emisi abo bantu Nnâmahanga abahâga mpu mubalange, cikone mube lwiganyo lw'obwo buso. ⁴ Erhi mwankajira ntyo, amango Yezu, olya osima balungere bage, ayishi ha ngasi ye ishungwe, n'amango Lungere aciyalagaza, mwahâbwa ishungwe ly'obukuze lirya lirhâkatubâla ciru n'ehitya. ⁵ Kwo n'okwo ninyumwe bana b'emisole, mugombe oku bashosi. Ninyu mweshi, mube birhôhye lyo mokâkolerana, bulya Amandiko gadesire mpu "Nnàmahanga kulahira alahira ebi ab'obucîbone bajira, cikone anajirire aminja abacîrhôhya." ⁶ Mube n'obwirhôhye omu kuboko kwa Nnâmahanga kw'obuhashe, lyo amu yinamula omu mango atwaga. ⁷ Mumurhûle kwo amalibuko ginyu gwoshi, bulya kukombêra abakombêra. ⁸ Mulange bwinja olugero lwinyu, munabe masu! Omushombanyi winyu Shetani, adwirhe akoyakoya anali aluluma nka ntale, mpu alonze oyu amirangusa. ⁹ Musimike omu bwemere muna muhagalike, bulya mumanyire oku bene winyu, bali ngasi hoshi omw'igulu lyoshi, bâgezire muli malibuko ga mwene ago. ¹⁰ Cikone hano muba mwamâlibuka mango masungunu, Nnâmahanga wa ngasi lukogo, olya wamuhamagalaga mpumuje omw'irenge lyage ly'ensiku n'amango omu kulungana haguma na Kristu, yene amushâshula, amuzibuhya, amuhe n'emisi abul'inamudêkereza omu musingi muzibu. ¹¹ Mâshi obuhashe bube bwage ensiku n'amango! Bibe ntyo. ¹² Mmuyandikire ebi binwa bisungunu omu njira ya Silvano, ola mwene winyu mbona okwanine okucîkubagirwa. Njijire ntyo nti lyo mmuhanûla nampamîrize okw'olwo lwo lukogo lw'okuli lwa Nnâmahanga: mulusêre mwo bwenene. ¹³ Omurhwe gw'Abakristu bali e Babeli, bamulamusize, na mugala wani Marko. ¹⁴ Mulamusanye omukununugurhana, kununugurhana kwa buzigire bw'ecinyabuguma. Mâshi omurhûla gube hagupa na ninyu mweshi mwe muli bantu ba Kristu