¹ Ebetania, kuyerekeza okumusozi gw'Emizeituni Yesu arhuma babiri omu b'egirizwa bage, ² ababwira mugende omuchishagala chiri embere zerhu. Hano mugera mw'echo chishagala, mwabona omwana gw'epunda oshwekerwe nta muntu osaga mugendako. mugushwekule,mumunderhere. ³ Hakajira owakubaza mpu chichi chirhumire mwajira ntyo? Mumushubize ntya: Nahano amulonzeze, hanaho ayirikula muyilerhe hano. ⁴ Abegirizwa babere bageraho bashimana omwana gw'epunda gushwekerw'embug hofi n'olunvi, ahaburhambi bw'enjira, bagushwekula. ⁵ Baguma mu balala babiri baliri halala bababwira: Bichi mwamajira? Chirhumire washwekul'eyi punda? ⁶ Babashubiza nka kula Yesu ababwiraga. Babaleka bachigendera. ⁷ Balerhera Yesu eyo punda; bayikabula kw'e mishangi yabo, Yesu ayikala kwela punda. ⁸ Olubaga lwasasa emishangi yab'omunjira, n'abandi amarhabi ge mirhi eri kwe bibabi bachag'omumashwa. ⁹ Abaliri embere za Yesu n'abalimukulikir' enyuma bayama bwenene: Ayagirwe! Agishwe, oyinjire okuzino lya Nahano! ¹⁰ Bugishwe, obwami bwayinjire, obwami bwa Daudi, darha werhu! Ayagirwe,ayagirw'emalunga. ¹¹ Yesu aja omu Yerusalemu omukanyamuzinda. Aber'abona okw'ebichanji byamulekere, achijira e Betania, haguma nabalala ekumi nababiri. ¹² Bucha bwa sezi, achimala rhenga omu Betania, Yesu ayunv'enzara; ¹³ Alangira, embere zage hale, omurhi g'omuzabibu gugwerhe ebibabi, aji lola nkaba akabona kw'ekintu. Aber'ahika kugo, abul'amalehe bulala birhali bihe by'amalehe. ¹⁴ Yesu aderh'ekinwa, avuma gula murhi, mpu ntaye ohir'akalya okumalehe gawe! N'abegirizwa bage baliri bayunva. ¹⁵ Bagera Eyerusalemu, Yesu aja omu Kanyamuzinda. Arhondera kulibisya balala bahanzaga baguza na balala bahanzaga bagula omu Kanyamuzinda. Aheny'ameza ga balala bahindul'efranga oku zindi, anahenya ebichumbi bya balala bakazaga guz'enguku. ¹⁶ Chiro arhalekaga n'omuguma wakahek'akantu kurheng'omu Kanyamuzinda. ¹⁷ Ayigiriza n'okuderha: Kabirhayandikirwe okw'enju yani yehamagalwe nju y'amahuno y'ebihugo byoshi? Aliko mwa yijirire lukunda lwa bezi. ¹⁸ Abadahwa bakulu n'abandisi, babere babiyunva balonza gurhe bakamuyirha, chaliko bayubaha bulala olubaga lwoshi lwali lwayunvirh'enyigirizo zage. ¹⁹ Egolo lya bere, Yesu arheng'omukizungu. ²⁰ Esezi, abegirizwa bage bagera, babona gula murhi go muzabibu gwa yumire guhika n'okumizi. ²¹ Petro ayibuk'ebyageraga, Abwira Yesu: Mwigiriza, lola gula muzabibu wavumaga, gwayumire. ²² Yesu ababwira: Mube n'obwemere ku Nyagasani. ²³ Mbabwirire n'obwalagale, nka muguma akabwira ogu musozi: Rheng'ahala ochikabule mulira nyanja. Nkakabiyemera buzira ngangane omumurhima gwage, aliko abe n'obwemere okubyakagalika,yenabone okubyajirika. ²⁴ Chechirhumire mbabwirire: Byoshi mwakahuna omukusalira, mube n'obwemere okumwamalire kubibona, mwenabibone byajirika. ²⁵ Amango wakayimanga kurhalira nkawakagwarh'echibazo n'omuntu rhanga omubabalire, y'o darha werhu we mbingu akubabalira okubyaha. ²⁶ Aliko, nkab' orhakababalirana, darha werhu we mbingu naye arhankarhubabalira ebyaha byerhu. ²⁷ Ashubij'e Yerusalemu, Yesu abere aherhe achilambagiz'omu Kanyamuzinda, abadahwa bakulu n'abandisi, n'abashamuka bagan'emundali, ²⁸ bamubwira: okubuhashe bwa nde oherhe wajir'ebi bintu? na nde okuher'obuhashe bokubijira? ²⁹ Yesu ababwira: Nani nababaz'echibazo: Mumbwire nani nababwira okubuhashe bwa nde ndi nakol'ebi bintu. ³⁰ Obubatizo bwa Yohana bwarhengag'e mbingu chang'oku bantu? Mushubize. ³¹ Aliko baganiza bonyine okubonyine, rhukaderha mpu bwarhengag'embingu, arhubwira mpu charhumaga murhamuyemera? ³² na rhukaderha mpu bwarhengag'e mwa bantu..., bayubaha olubaga, bulala abantu boshi baliyemerere Yohana nka mulebi. ³³ Nabo bashubiza Yesu: Rhurhamenyere. Yesu naye ababwira: Nani ntababwira ngahe obuhashe bwani burhenga, n'okumisi yande njir'ebi bintu.