¹ Yakobo mukozi wa Nyamuzinda na wa Nahano Yesu Kristu, endamuso zani zihikir'amashanja ekumi na mabiri gashandezwe. ² Mubirhole nka chintu ch'obushagaluke bunene beneberhu amarhangulo aga n'aga muherhe mwageramo. ³ Mumeny'okw'erhangulo ly'obwemere bwenyu ly'okubalerher'okuchihangana. ⁴ Mulek'obukomerere bukol'akasi mulimwabo, yimukula n'okuba n'obushinganyanya buzira kubulirwa n'echintu. ⁵ Aliko eyihakaba muguma wenyu olonzez'obwenge, abuheme Nyamuzinda yehana byoshi buzira kulondola, buzira kusidaka naye amuha. ⁶ Aliko aheme n'obwemere buzira ngangane, bunol'oherh'engangane ashushanyizwe n'omulaba g'omunyanja guli gwahekwa eyi n'eyi n'omuhusi. ⁷ Oyu muntu arhakengeraga mpw'abon'echishubizo emwa Nahano. ⁸ Ali muntu wa mirhim'ebiri, w'okuhindamuka hindamuka omunjira zage. ⁹ Eyi hakaba beneberhu b'abakene, basime nk'okubali, ¹⁰ n'oli mugale asime obwirhonzi Nyamuzinda amuhere bulala nj'agera nkabwaso buli omwishwa. ¹¹ Ezuba eyilikaliha, lyana yumy'emirhi, n'obwaso bwanahungumuka n'obwinja bwage bwanahweraho. Kona kuguma n'omugale ola ochisimis'omu mikolo yage. ¹² Ali munya ragi olala oly'alember'erhangulo, bunol'enyuma ly'okulilembera, ahabwa eshungwe ly'akalamo lyalaganywaga kubalala basima Nyamuzinda. ¹³ Ntaye okwanene aderhe akasanzi arhangwirwe: "Mpw'elirhangulo lyarhengaga e'mwa Nyamuzinda", bunola Nyamuzinda arharhangulwa nabubi na yenine arharhangula muntu. ¹⁴ Ngasi muntu anarhangulwa n'enyifinjo zage yenine zanamurhebeka n'okumuheka hale. ¹⁵ Ahanyuma enyifinjo elizikula, zanaburh'echaha, n'echaha elichikula chanaburh'olufu. ¹⁶ Mumenye mwakachirhebeka beneberhu basimwa. ¹⁷ Ngasi mpano nyinja, ngasi mpano ekwanene erhengera enyanya, emwa darha w'obuche. Muli yewe murhali mwizimya changw'ejichu chokuhindamuka hindamuka. ¹⁸ Nyamuzind'alondwere okurhuh'akalamo kugerer'omwazi g'okuli yi rhuba fula omubilemwa byage. ¹⁹ Bene berhu basimwa, mumeny'oku ngasi muntu abe duba omu kuyunva, aliko arhabaga duba okuderha n'okugaya. ²⁰ Bunol'oburhe b'omuntu burhayukiriza obulonza bwa Nyamuzinda. ²¹ Chechirhumire, mukabule hale ezinga lyoshi n'obubi bubazungulukire, murhol'obwirhonzi omwazi gwarhwerwagwa muli mwabo n'ogwakachungul'emirima yenyu. ²² Mukeng'omwazi gwa Nyamuzinda, murhanahwerag'omukuyunva konine mukachirhebeka n'obukenge bwenyu mwenine. ²³ Bulala ely'omuntu akayunv'omwazi, buzira kuguhir'omubijiro, ashushanyizwe n'omuntu walemag'alola eshusho lyage omuchiyo. ²⁴ Analol'eshusho lyage na hano agenda anayibirira hanaho gurhe alishushire. ²⁵ Aliko, oshimbulir'amarhegeko gashinganyanya bwinjabwinja, rhegeko ly'omurhula, anagenderer'okulikenga, arhachiba munviriza konine, agishwa enyanya z'okuhir'omwazi omubijiro. ²⁶ Ely'omuntu akachishog'edini, akagambwa kurhegeka n'olulimi lwage, aherhe arhebek'omurhima gwage n'edini lyage bulibusha. ²⁷ Edini ly'okuli buzira bubi embere za Nyamuzinda Darha werhu, lili lyakurhabal'efubi n'abashumbakazi omumalibuko gabo n'okuchilanga na ngasi bubi bwa linogulu.