¹ Mwabo Bagalatiya, murhagwerhe bwenge ! Nde wabalogere yi murhayemerag'okuli ? Mwabo mu Yesu abambwaga embere za mesho genyu. ² Mulole omwazi muguma ndonzeze okumenya enyanya zenyu: Ali enyanya z'ebijiro by'erhegeko yi mwayankiraga empano ya Muka, chango enyanya w'ehanulo ly'obwemere ? ³ Gurhe mwakabula obwenge nkantya ? Mwarhonderaga oku Muka, mulonzeze mumale omu mubiri ? ⁴ Yi mwalibuka bwenene oku busha ? Na kaba oku busha omu kuli ? ⁵ Oli wabaha omuka, n'oku kola ebisomerene omu mwabo, ya bikola enyanya w'ebijiro by'erhegeko, chango oku hano ly'obwemere ? ⁶ Nka kulala Abrahamu ayemeraga Nyamuzinda, aganjirwa obuchesibwa, ⁷ nantyo mu menye oku bala bali omu bwemere b'abana b'Abrahamu. ⁸ Konako, olwandiko luchibona oku Nyamuzinda nji aganjira okuli abarhamenyerere oku njira ya bamenyerere, aba rhangaga kubwira Abrahamu og'omwazi gw'obuholo omukuderha: Enyanya zawe embaga zoshi nji za gishwa ! ⁹ Kuderha mpu bala boshi bayemera bagishwe haguma na Abrahamu omwemezi. ¹⁰ Bulala balala boshi bachishwekere oku bijiro by'erhegeko bali eshishi gw'omukomo; bula biyandikirwe : Avumwe buli muntu yeshi orha kengere buli choshi chiyandkirwe omu chitabu ch'erhegeko, na buzira kuchihira omu bijiro. ¹¹ Bina chiyerekene oku nta muntu n'omuguma wanka cheswa embere za Nyamuzinda oku bw'erhegeko bula biyandikirwe : Ow'okuli nj'alama oku bwemere. ¹² Bulala erhegeko lirhali oku buyemere; aliko liderhe: Owundi wahira ebiyandikirwe mpu bijiro, nj'alama enyanya wabyo. ¹³ Kristu arhugulire kurhenga omu muvumo gw'erhegeko, achiba muvumo enyanya werhu, bulala biyandikirwe: Avumwe buli yeshi wahanikirwe oku murhi; ¹⁴ kuderha mpu y'emigisho ya Abrahamu egere oku barhayemerere kugerera Yesu Kristu, yi rhunayakira Muka muchesibwa wa rhulaganyagwa oku bwemere. ¹⁵ Beneberhu, yinaderha oku shushanyo y'abantu, ndagano nyinja, n'eyi ya jirwa n'abantu, ntaye wakayishanda changwa akayi yushula . ¹⁶ Bulala endagano zoshi zahabirwe Abrahamu n'olu burha lwage lwoshi. Birhaderhwe mpu: Oku mburho zage, owamenya mpu ziri zinene ; s'ahabwa nka luborha luguma, k'oku derha Kristu. ¹⁷ Lola emyazi ndikuderha: endagano Nyamuzinda ehirireho embere erhakakulwa, nantyo endagano ya jirirwe ya busha enyanya w'erhegeko lyahiragwaho enyuma y'emyaka magana mane na makumi masharhu. ¹⁸ Bulala ey'akashambala kakayijire enyanya werhegeko, karhakachiyinjire enyanya yendagano. Kandi eri enyanya wendagano yi Nyamuzinda ahaga Abrahamu empano yo lukogo. ¹⁹ Erhegeko chiri chichi? lyahabwagwa enyanya w'ebyaha kuger'aholuburho lwahabwag' endaganyo n'omuvisikanyi. lwayunjwizwe na bamalayika kugerera omunvisikanyi. ²⁰ Kandi oyo munvisikanyi arhaba munvisikanyi wa muguma, kandi Nyamuzinda ali muguma. ²¹ Nantyo, erhegeko lirhafarhene n'echilagane cha Nyamuzinda? Arhali ntyo! Nkahababwag'erhegeko lyaligwerh' akalamo, obuchesibwa bwakayinjire omu kunali nalyo. ²² Aliko omwazi g'olukogo gwashwekere abantu boshi eshishi w'echaha mpu y'echibalaganyaga chihanwa oku bwemere omu Yesu kristu oku bayemerere. ²³ Ebere obuyemere buyinje, rhwalishwekerwe n'erhegeko, enyanya w'obwemere bwalikwanene kuyinja. ²⁴ Nantyo erhegeko lyali nka mwigiriza w'okurhuheka emwa kristu, kuderha mpu yirhuchesibwa oku bwemere. ²⁵ Obwemere buchiyinja, rhurhachiri eshishi w'oyo mwigiriza. ²⁶ Bulala muli bene Nyamuzinda mweshi kuger'obwemere mu Yesu Kristu; ²⁷ Mwe mwadubikirwe mweshi omu Kristu, mwayambiswe Kristu. ²⁸ Harhachiri omuyahudi chang'omuyunani, harhachiri muja chango mushwekulwa, harhachiri mulume changw'omukazi, bulala mweshi muli omukagarhi ka kristu. ²⁹ N'akaba muli ba Kristu, muli luburho lwa Abrahamu, balekerwa b'echilagane.