¹ Paulo, ntumwa, arhali oku bw'abantu changwa enyanya z'abantu, s'aliko enyanya za Yesu Kristu na Nyakasani, wa mufulaga omu kagarhi k'abafu, ² na beneberhu boshi bali haguma nani, oku maka Nyamuzinda g'e Galilaya : ³ Olukogo lube mwenyu n'omurhula kurhenga emwa Nyamuzinda Darha na Nahano Yesu Kristu, ⁴ wachihanaga enyanya w'ebyaha byerhu, mpu ya rhuchungula n'er'igulu libihire, okubulonza bwa Nyamuzinda na Darha, ⁵ ye nin'obukuze bw'esiku n'amango! Bibentyo ! ⁶ Insomerwe oku mwa mulekere dubaduba ola wabahamagalaga oku lukogo lwa Kristu, mwahindamukira ogundi mwazi gw'obuholo. ⁷ Kurhali kuderha mpu hali ogundi mwazi g'obuholo, s'aliko hali abandi bantu bali babalibuza n'okulonza kuhindamula Omwazi g'obuholo gwa Kristu. ⁸ Aliko, avumwe, eri rhwabo changwa ba malayika bw'omuchalega, rhukaba yigiriz'omwazi g'obuholo gurhali kuguma na gula rhwabayigirizaga. ⁹ Rhwaderha ntyo burhanzi, yirhwashubi kuderha mukano kasanzi: Eyi haba omuntu nji waderha ogondi mwazi g'obuholo arhali gula mwayakiraga, avumwe ! ¹⁰ Nantyo lero, nyungu ya bantu yindi kulonza changwa ya Nyamuzinda ? Nji nalonza kusimis'abantu? Eyi nakasimisize kandi abantu, ntakabere mukozi wa Yesu Kristu. ¹¹ Mbamenyeseze mwebeneberhu ok'omwazi gw'obuholo na yigirizaga gurhali gwa muntu; ¹² bulala nta guyakiraga changwa nkaguyiga n'omuntu, s'aliko bubonekezi bwa Yesu Kristu. ¹³ Bulala mwayunvirh'emyazi y'oborhere bwani embere omu dini lya Bayahudi, okuntu nalibuzaga n'okusherez'aka Nyamuzinda, ¹⁴ n'okuntu nali murhanzi omu dini lya Bayahudi okubandi boshi b'emyaka yani, na b'omulala gwani, na nagenderera kuba n'obushiru bunene b'okufarha emigenzo ya badarha. ¹⁵ Aliko byasimisa Nyamuzinda wampirag'eburhambi, kurheng'omunda ya nyama, ampamagala oku lukogo lwage, ¹⁶ abona bwinja ayerekan'omugala omu kagarhi kani, kuderha mpu yimuderha ahagarhi k'abarhayemerere. Honaho ntajag'ibaz'ehano oku bantu bw'omubiri changw'abeshagama. ¹⁷ Kandi nta shonag'e Yerusalemu kubona bala bali ntumwa embere zani, s'aliko na chigendera e Arabiya, n'oku galuka e Damaski. ¹⁸ Buzinda bwa myak'esharhu, na shona e Yerusalemu kubonana na Kefa, n'okubera emwag'esiku e kumi n'erhano. ¹⁹ Kandi nta bonaga eyindi ntumwa, olekere Yakobo, mwenewabo Nahano. ²⁰ Na mwebi byoshi mbayandikire, mbabwirire emalangambere ga Nyamuzinda, nta beshere. ²¹ Buzinda naj'elunda lw'e Suriya n'e Kilikiya . ²² Aliko ntalimenyikene oku bwani emalangambere g'ama Ka Nyamuzinda ga Bayahudi gali omu Kristu; ²³ aliko bali bayunvirhe kulala walibuzagabo mira, akali ali ayigiriza obwemere akazagi kuchihangana okubihya burhanzi. ²⁴ Bakuza Nyamuzinda enyanya zani.