MAROMBA ALLAH NAKA DENGNGAWI YUNUS MONNO NA YUNUS NA KEDU ¹ Ammi ge liina Maromba Allah barrana Yunus, anana Amitai, apanewe, ² “Kedde, kakou ne Ninewe, ne padou aka landana, monno tekkida barrada nepa raida nda du’a na dukkimba ne barra-Gu.” ³ Mba hinna we ge a Yunus na beige kedu ne Tarsis, marroi Marombah Allah. Hettiwi ne Yafo monno na dukkiwi na ia kapal a aro ne Tarsis. Na bayarage wellina mbana kako, monno napa lolo dengngadi ba kako ne Tarsis , maroina Maromba Allah. KAPOTE KALADA ⁴ Maromba Allah napa burruwi paringngi kalada ne bonnu ndana na dukkiwe na kapala mbana beige masaikara. ⁵ hidda a neena kapal ndana ama dauta, iya ata-iya ata aka ndengngai morida, monno aka petti ngara kuada pangindida a waina ne kapal ndana gai na kapal kadanna mboto kana. Orona mba hinna na Yunus burru mbana ne koro ndana kapal, mbana beika na dukkiwe mbana dura panettina. ⁶ Ammi na a ngindiwa na kapal barrana monno napa newe, “ ne yo’u kana bisa takkamo nemba ndura pa nettina? Keddeu, kakadenggai na Maromba Allahmu! Noto ge na Maromba Allah na etada mbana tuluda kadata lilokokana.” NEKANA DADIWA NAKAPOTE ⁷ Napanewe na iya ata barrada hidda wade, “ maida kata kata raina ia kadekera gai kata pandewi mba garra oronawe nyaka hinnawe ne podda mbana ndadiwe barrada itto”. Ne hidda araina ia kadekera monno nakadera pararida Yunus nya wennawa. ⁸ Ne hidda panewe barrana Yunus. “ tekkiwa barrama yamme nemba hinnawe, garra orona na dukkue ne podda kana ndadiwe barranda itto. Appa pawillimu? Ge wali nyamo? Ge wali nyana ne wannomu? Monno ge bangsa nyage pawali waimu? ⁹ Na wale nepa tekkinda, “ne Yowa ata Ibraniaga, ne yowa kumadautawi na Maromba Allah, Maromba Allah a ndou’ge ne langita, raige wee bonnu monno ne ponnu tana mara.” ¹⁰ Hidda ata ama dauta langu takka, nyawe ne hidda kapanewe, “apawe nepa raimbamu?” orona hidda ata a pandege mbana kendu wali arona Maromba Allah orona nenya na tekki mbada barrada hidda. ¹¹ Hidda amatua, “appa paraima barramu gai nakapote kanakanawa monno danna banikyakana orona ne wee bonnu na penne kyamba. ¹² Patekkina barrada hidda, “keketaga monno ka pettiga ne bonnu ndana, gai ne bonnu kanakanawawe nea aro barrami yemmi. Orona mbaku pandege, orogowe yo’a nyaka hinna naka pote bana bani aro barrami yemmi.” ¹³ Nyaka, ngarra kuada hidda ata apawessi mbatullarawi na kapal kana dukki ne tana mara, nyakido ne hidda danna tomakiwe mbapa dukkiwi tana mara na kapal orona ne bonnu nama tamba baniwe. TAGU REKKA NA YUNUS ¹⁴ Ne hidda akawula kadengngawi nama Maromba Allah, hidda ge, “o Morima Maromba Allah, ammana ne yamme mbama modda orona ne lolongauna na ata nara, monno dapa toddu kama barrama yamme ne raana na ata da mangngu salana, mba Yo’u ndona, Morima Maromba Allah araige ngara kuana a hinna waina pabei ate-Mu.” ¹⁵ Mba ge ne hidda a keketa na Yunus monno aka petti ne bonnu ndana, monno ne bonnu nakanawa mbana baniwe. ¹⁶ Hidda ata ama dauta ekagaiwi na Maromba Allah, mbage ayawi maraka mbarana Marombah Allah mono ayawe li’ida. ¹⁷ Nama Maromba Allah napa tukai na ia ikan kalada aka mbollowi Yunus, monno na Yunus engai tiadana ikan ne a touda gede, touda lodona.