¹ Na Abraham na'ka kaweda mbana monno gai'bawe ne'ndou tolekana. Monno, na' Maromba Allah na'pamaring'ngiwa Abraham monno ngarra kuwa papawilli'na. ² Kahinna ngge Abraham mbarra'na ata papawede'na a' mado'i mba ne umma'na, monno a'ndadarawi ngarra kuwa pawai'nda ne umma, "Mbondala na' limma'mu ne kenga'ndeta nggu. ³ Ku' ndeng'ngiwu ne yo'u ka'aura'u ne arona Maromba Allah, Maromba Allah langita monno tana, ne yo'u ndu'dekeki mawinne na ana nggu wali lakawa mawinne Kanaan ne padou'nda padang'ngi wa'i nggu. ⁴ Takka, ne yo'u kako'wu ne'e tana wanno nggu monno barra'nda ndu'ndadi nggu ga'i ka'ndeke'wi mawinne tu'mbana Ishak, ana nggu." ⁵ Kahinna' ngge na ata papawede'na barra'na, "Peiwa'ikona mba'na lakawa mawinne danna nau'ko mbana ndeku'ngga mai ne' tana wanno? Appa ne yowa ku'ngidi pongupa na ana'mu wali wannomu?" ⁶ Takka, hinna ngge Abraham barra'na, "Maga'na! Da'ngidi mbali kagai na ana nggu wali wanno nggu. ⁷ Maromba Allah, a'ngindi waga wali umma na ama nggu monno tana ndu'ndadi nggu;Nya' a panewe mbarra nggu monno A' aura barra nggu, 'Yowa ku' yago ne tana wanno barra nda wolla uwa'mu,' monno na patuka'ndi hinna papalewa'Na ne aromu ga'i ku'kollena mawinne tu'nbana ana nggu. ⁸ Na' lakawa mawinne dana nauko mai'neme palolo ndeng'nga nggu, ne' yo'u mukalogana wali ne aura'nda, nyakidowe dangindi ka'gai ana nggu wali mbali ne'e." ⁹ Nya'ka, na ata papawede na kana bondalawa limma'na ne kenga'deta na Abraham, mori'na, monno na aura barra'na. ¹⁰ Na' ata pawede'na na kako monno na'ngindiwi kabullu unta wali barra mori'na. Nya' kana ngindiwi ngara kuwa'da parawi limma'na a' manada'na monno kana kako ne Mesopotamia, ne Kota Nahor. ¹¹ Ne' mbali wanno, kana tuka'wi unta-unta na' madi'i ne uppu sumura ne raimale, rapana mawinne-mawinne ba'kako oke we'e. ¹² Mba'ngge, kana sabaya na ata papawede'na,"oh...Maromba Allah, Maromba Allah'na mori nggu Abraham! Rai'ga kaku ma'kolle ne loddo, monno patutu ngge nduwa ateMu barra na mori nggu, Abraham. ¹³ Eta'waga, mba'ku ndede ne barra sumura monno lakawa mbua'winne wali ne tana wanno ammi'ndi a ndeke we'e. ¹⁴ Tutuna 'na mawinne papanewe deng'nga nggu: 'Tuluga paburruwi na'wirro we'e mu ga'i kaku enu'waga,' monno a' walewe, 'enu, monno ku'yakaigudi pa'enu hidda unta-untamu,' Nya'bana PapatubaMuwi ata papawede-Mu, Ishak. Nyaka bahinna we ku'pande ngge mba' Yo'u a'patutu ngge manowaraMu barra'na mori nggu. ¹⁵ Ndana' mbakipo sabaya na ata papawede, angu ammi bawi Ribka, ana mawinne na Betuel ana Milka, mawinne na angu'nguwa na Abraham a' ngara'na Nahor, ammiwi ne barra sumura na'ngindi padalu lakondeta'na. ¹⁶ Na' mawinne na kabola langu takka. Da'ipongukipo iya ata a' ntodo nawe touna. Na mawinne na kako mburru sumura ndana monno na tauwi we'e na pa'daluna, mbaka na penne mbali. ¹⁷ Na ata papawede'nda kana malle bana tamboka monno hinna ngge,"Tulu'ngga, kaku enu yodika we'e wali wirro we'e mu." ¹⁸ Kana wale'we Ribka, "Enu'wu, mori nggu." Monno, napa burru'wi wirro we'e na monno kana yawi na ata papawede'da bana enu we'e. ¹⁹ Lengapa na Ribka na'mbapa yawi we'e pa'enu na ata pawede'da, kahinna ngge," Yowa ku'ndita kaigudi we'e a'tuba hidda unta-unta'mu." ²⁰ Nya'ka na Ribka kana burri ngarra kuwawe ne we'e wirro ndana na ne raba'ndana, monno na malle pi'a dommo bana oke pi'a wee a'tubawi hidda unta-unta na' ata. ²¹ Na ata papa'wedena Abraham, danna pa'neweki engawi banna engilawi na mbuawinne. Na' beige bana pande ngge na Maromba Allah napa maring'ngi kadowa na lara pali'na mbana kako. ²² Ne' mbapa enu hidda unta-unta, na ata papawede na Abraham na ndedewa na iya omma rara a kadippu syikal mbotona, monno duada kurrukara doka a mbotona kabullu syikal. ²³ Hinna ngge na ata papawede'da, " Garra a' ana na nggu? Tekki gawe mbarra nggu, waikana padou padura wa'i ne umma na amamu?" ²⁴ Na walewe Ribka barra'na, "Yowa ana na' ngga Betuel, nya' ana kabani papa'ndadi'na Milka barra'na Nahor." ²⁵ Ka'hinna dommo ngge, "a'luwandi unnukuwa'ma monno panga'a unta, monno padou pataddo wa'i na." ²⁶ Nya'ka, na kataba na ata papawede'da monno kana kawodo barra'na Maromba Allah. ²⁷ Kahinna ngge, "Kupamalangiwu Maromba Allah, Maromba Allah na mori nggu Abraham, da ndundakage manowaraNa barra na mori nggu. Monno barra nggu, na Maromba Allah napatutu gai lara nggu aro barra na ndu'dadi na mori nggu." ²⁸ Nyakana, malle na Ribka monno kana tekki ngarra kuwawe paetana barra'nda ata a' neina umma na inna na. ²⁹ Wa'i iya na'a na Ribka ngara na Laban, monno na Laban na malle jounga ga'i kana tabbokawa ata papawede'na Abraham ne barra mata we'e. ³⁰ Na'rawi ngge lenganapa etawi tawurru monno kurru kara papatauda'di ne limma ndeta na alli kana, monno na reng'nge we patekki na Ribka: "Hinna we patekkinaga na ata barra nggu." Laban kana ndukki'wi ata papawede'na Abraham monno na ndukki'wi banna ndede ne tidi'nda unta-unta na ne barra mata we'e. ³¹ Kahinna ngge Laban barra na, " Maiya ka'tama, ne yo'u papamaring'ngina Maromba Allah! Etti kaneinggu a' ndede jounga? Ne yowa kuparekkagu umma padou'mu, monno padou nda unta-unta'mu." ³² Nyaka, na ata papawede'na Abraham kana tama ne umma monno na paburru ndi pa'mbotina'di unta-unta'na. Mbapa hinna'we, unnukuwa monno panga'a ranga a'tauda'di hidda unta-unta, monno we'e atu'mba ata papawede'na Abraham monno olle palolona' mba' pawano waida'di wa'i nda. ³³ Takka, lengapa sakarawi panga'a ne aro na ata papawede'na Abraham, kahinna ngge,"Ne yowa daku nga'a kipo mba'dakku tekkipowe barramu appa we pawukkuna patekki nggu." Kahinna ngge Laban barrana, "bahinna kowe, tekki'we barra'ma." Panewege Tubana Ribka ³⁴ Na' ata papawede'da kahinna ngge,"Yowa ata papawede naga Abraham. ³⁵ Na Maromba Allah na pamaring'ngi langu takkawa na mori nggu nya'kana pote. Nya' a'yawi bebe monno sapi, omma kaka monno omma rara, ata pawede monno ata papatukana, lappata unta monno keledai a luwana. ³⁶ Monno, na Sara, mawinne na mori nggu, napa ndadi iya ana kabani lengnganapa kaweda. Monno, na'ya ngarra kuwabawi ndouna barra na ana'na. ³⁷ Na mori nggu na' dengngiwaga kaku aura, hinna ngge,'Ndudeke kagai mawinne na ana nggu wali lakawa mawinne Kanaan, ne tana wanno padangi wa'inda. ³⁸ Takka, kakowu barra nda ndudadi na ama nggu monno barra nda ndu'nggu kaelletawi mawinne a'tuba ana kabani nggu.' ³⁹ Ka'lunggu ngge barra na mori nggu,' Pei'waikugu na lakawa mawinne mbadana nau'ko palolo ndengnga ngga?' ⁴⁰ Kanawale'we mori nggu,' na Maromba Allah ne' aro'Na mbaku tolekaga, napa tukadi papalewa Na kana palolo ndengnga nggu monno kanamapande'we pakakomu ga'i kukollewi iya mawinne a'tuba ana nggu wali ne tillu'da ndu'nggu monno wali nduda'ndi na ama nggu. ⁴¹ Yo'u mu'kalogana wali aura'mu nya'kido mba ndukki'ku barra ndu'nggu, lakka nda'nauko ba'yawa ana mawinne nda barra'mu." ⁴² " Nya'ka, ne loddo ka'ammi ngga ne barra sumura, ka'lunggu ngge, "Na Maromba Allah na mori nggu Abraham, Mbu'kalogakoge, raigawe ne pakako nggu kanamapandewe. ⁴³ Etawe, ku'ndede waga barra sumura; mba'ammikuwi iya lakawa mawinne a' oke we'e, lunggu mbage barra'na,' tulu'ngga pakaloko ngga kaku enu yodika we'e awa'ina ne wirro wee'mu.' ⁴⁴ Mba' hinna koge na mawinne barra nggu,"enu'wu, monno ku'ndeke kaidi we'e hidda unta-untamu,"gai'lage kanyako papedena Maromba Allah tubana ana kabani na mori nggu." ⁴⁵ "Tomandakku bakipo sabaya ate ndana nggu, ammi bawi Ribka a' oke wee mbana ngindiwa wirro we'e lakodeta'na. Lenga'napa burru sumura ndana mbana oke we'e, kalunggu ngge barra na, "Tuluga, yaga wee kaku enu." ⁴⁶ Ne' nyakana paburruni wirro we'e na wali lako'deta na kahinna ngge,"enu'wu monno ku'ndeke kaidi we'e hidda unta-unta'mu.' Mbaka, ku enu waga we'e monno na'paenu kaidi unta-unta nggu. ⁴⁷ Mbaka, kaku tuwa'wa, ' Garra a' ana na'nggu?' Na'walewe, "Ana mawinne naga Betuel, nya' ana kabani papa'ndadi'na Milka barra na Nahor.' nya'ka kaku patauna'di omma rara ne korru nde'tana monno kurru kara limma ndeta na. ⁴⁸ Mbaka, kukawodo waga barra'na Maromba Allah. Kudeikawa Maromba Allah, Maromba Allah na mori nggu Abraham a'ngindiwaga ne lara a' nduwa monno a' lurutu ga'i kaku tabboka umbu mawinne'na na angu'nguana mori nggu a tuba ana kabani'na ⁴⁹ Hinna nee mbupakaloga ate'kona patutungge ne ndua'atemu monno manowaramu barrana mori nggu, tekki gawe barra nggu; monno bada'hinna ko, tekki dommo gawe barra nggu kakupande ngge mba ge'kako nyaku'nggu." ⁵⁰ Mbage, ka'walewe Laban mbada Betuel, "Ne' palummu'na wali'wa'i nawe barra Maromba Allah, nyaka hinna'we damma pande'ki patekki gowe barra'mu nduwa'na monno da'duawa na. ⁵¹ Eta'wa, na Ribka wa'i aromatamu. Ngindi'wa monno kako'u. Ga'i kana'mawinne'wi ana'na mori'mu a'hinna na patekki na Maromba Allah." ⁵² Mba' lenganapa rengnge'we ata papawedena Abraham, kana kawodo kataba mbana nomba'wa Maromba Allah. ⁵³ Mbaka, na ata papawede'na Abraham napalouso'di ngara omma kaka, omma rara, monno kalambe, kanayana'ndi Ribka; kanayakai'ndi hadiah a'pawellina barra inna'na monno na'a na. ⁵⁴ Mba'ka, na ata papawede'na Abraham monno ata palolondeng'ngana a' nga'a monno a e'nu, monno a taddona' ne'e. Leng'ngapa a' wolla megetana, kahinna ngge ata papawedena Abraham, "Pakaloga'ga kaku wali barrana mori nggu Abraham." ⁵⁵ Takka, hinna ge na'a na monno inna'na Ribka, ga'ibelliwi na Ribka kanadangi kabullu loddo'cana barra'ma. Mbapa hinnawe wuddi mu kako." ⁵⁶ Takka, kahinna ngge na ata papawedena Abraham barra'nda,"Dapattukaga, kapande ngge lage na Maromba Allah mbaNya raige ne pakakonggu mbana togola. Pakaloga'ga kaku kako, ga'i kaku kako barra mori nggu." ⁵⁷ Kahidda'ngge," Ga'i kama ka'dengngawi Ribka monno katuwa'wa appawe pabeina." ⁵⁸ Ka'kadengngawi monno a'tuwa'wa,"Mubeige palolo dengngawi na ata?" Na walewe Ribka," o'o, kubeingge." ⁵⁹ Nyaka, apakalokowi Ribka monno ata akarawa'wa kako palolo deng'ngawi ata papawedena Abraham monno ata palolodengnga'na. ⁶⁰ Kapa'maringngiwa Ribka monno kahidda ngge barra'na, "Angumawinne'ma, gai'ka ndadi luwa mangeda'na; monno hidda wolla uwa'mu amadi'i ngge ne binna tamana ne tana wanno'da hidda ata aka'mukamigi." ⁶¹ Mbage, na Ribka monno ata akarawa'wa apenne unta ndeta monno a ndekuwi ata papawede na Abraham. Nyaka, na ata papawede'na Abraham kana ngindiwa Ribka monno a kako wali ne'e. ⁶² Nyaka' na Ishak wai'mbali bawi a wali ne pakakona ne'e sumura Lahai-Roi orona hinna ne'e na dangngi wa'i ne'e Negeb. ⁶³ Ne iya raimale na, na papaga omadana mbana beige kanuwa. Mbana wutala matana, na etawi unta-unta wali marro. ⁶⁴ Ribka nawutala kaiwe matana kana etawa Ishak wali marro, kana burru wali bedo'ndetana unta. ⁶⁵ Kahinna ngge Ribka barra na ata papawedena Abraham, "Garrawi nati lakawa kabani a kako omadana abeina tabbokawa'da?"Kanawale we na ata papawede'da,"nyadona mori nggu."Mbaka, na Ribka kana padippa ngge mata na. ⁶⁶ Mbage, na ata papawede'da napalara ngarra kuwadi papawillina barrana Ishak. ⁶⁷ Na, Ishak na ngindiwa na lakawa mawinne ne karekadana na inna'na mbakana panikawi nadukkiwe na Ribka mba mawinne nawi Ishak. Na Ishak namanowara langutakkawi, apageborana atena lira matena inna'na.