¹ Wen sotu tulónu kuy, là moe kéng bélê ye abay se ou sotu tau nifun Krays todo galak kehedemu bè yóm Tulus Dwata. ² Yó tulónu kuy ni, yóm là keskóhen yóm kat ksidek kegenómu du ³ bè yó kem dou dumu Ju, yó kem tau hol dou litô. Sidek kegenómu du abay se là kô le hemtahu bè Krays. Ke yó dum gemò, mem hyu dé ke ou fen tnafak Dwata mò tles lówó le, ne ke ou fen helayuk bè Krays anì lu yóm gewà gu lem tafak. ⁴ Lu se kem Ju deng néléken mò kem ngaen. Tehe tódô hegfan lem blóng le mlan bè yóm tey keDwatahen. Dê duléken mò fasad bélê le ne blayen bélê le yóm kun hlau hlanen bè Musis. Tey metuku ketoloken du kul yóm kemò ketaba le ebéléen. Ne tey dê yóm fasaden ku. ⁵ Tey tótól yó kem tehe fù le. Bud bè kul lugod snéen gónón sut Krays bè yóm kebalingen tau. Hol knóón ke laen dù sónen yóm kdóyón tekuy ke Dwata, yóm fen mogot yóm kelamangen. ⁶ Bè yóm tehe fasad Dwata kul yó, là monu du dé là dohoen. Okóm yó monu, là kdéen du tau semfu gu bè Israél ke hol kun tau Dwata.  Senged se ke tehe Abraham teganay, là kedéen du tau semfu gu béléen ke hol kun tau Dwata. Lómón yóm tehe mon Dwata mò ke Abraham, monen, “Helanu bè yóm ngaem Isak yóm fasadu kóm bè kwen yó kem enget lugodem.” o ⁷ a ⁸ Yó lanen yóm mon Dwata yó, là melanen bè yóm kun óyô mengà Abraham yóm ngà nélék Dwata, okóm hol mlan bè yóm ngà tehe fasad Dwata du. ⁹ Ni se yóm tehe mon Dwata bè yóm fasaden ke Abraham, monen, “Halay hulin bude mógów edini ne enget mngà logi Sara, yóm tuha libunem.” p ¹⁰ Yóm ngà Abraham yó, duhen yóm fù tekuy Isak. Yó yehen Isak, duhen Ribika yóm mengà héng, boluy le kul Jakub ne Iso. ¹¹ - ¹² Okóm tek sotu nélék Dwata bélê le mò gónóhen helan du yóm fasaden. Gu laan le là deng sut yó kem ngà Ribika yó, là deng wen kem tengónem nemò le hyu he duhen ke sidek, yó mon Dwata mò ke Ribika, monen, “Yóm twogu angat glaan bè yóm twoli.” Bè yóm nemò Dwata yó, yó se gónó tekuy temngón du là kóen lemwót bè yóm keheyu nemò yóm tau gónó Dwata mélék du, okóm tódô néléken yóm kun kóyô. ¹³ Lómón yóm sotu deng mon Dwata bè sulaten, monen, “Jakub yóm kenbong nawahu, fen kenbéu Iso.” ¹⁴ Mò kmon tekuy du nim nmò Dwata ni? Déke hendem tekuy là tedengen yóm kemò Dwata abay se fen mtukul néléken. Là kô yó du. ¹⁵ Ngem yóm deng mon Dwata mò ke Musis teganay, monen, “Tódô lemwót bè dou kóyô mélék du yóm tau knoduhu ne yóm tau kenbong nawahu.” q ¹⁶ Yó gónóm mon, là kóen lemwót bè kun kóyô yóm tau duhen ke bè kun nmò gónón lemwót yóm kkodu Dwata du. Okóm tódô lemwót bè yóm kun kóyô Dwata kmodu du. ¹⁷ Lómón yóm tehe kélék Dwata yóm sotu tau hol geta bè Idyip teganay. Tehe mon Dwata mò du, monen, “Lemwót béléu yóm kegetahem mogot benwu anì enget gefan béléem yóm dou kegebek, ne anì glalag bè klamangen benwu yóm dou boluy.” r ¹⁸ Ne duhen yó, bong knodu Dwata yó kem tau nóyô knoduhen, ne hegelen kulu yó kem tau nóyô hegelen kulu le. ¹⁹ Déke wen malà du yóm monu yó koni, kô monen, “Ke yó se kemò Dwata du, moen ke dnuónen kem tau igò le là gembek kembê du yóm kun kóyô?” ²⁰ Ni se balau du yóm monem yó, “Tmau kóm de tô gembek smabà ke Dwata? Là gbek yóm kuleng tonok semabà yóm tau mifil du, ke monen ‘Moen ke lómón ni kifilem do?’ ” ²¹ Ngem yó dém tau gel mifil kuleng, kihu kun kóyô gónó e hembaling du yóm nifilen. Kun kóyô ke sentólóngen yóm nifilen. Wen se nifilen mò gel henyu ne mtukul kdikót du, ne wen se nifilen yóm senflós tendo wen mu du. ²² Senged se bè Dwata, ke kun kóyô htonen yóm tey kebuten ne yóm kegebeken bè yó kem tau gel mulé du, duhen ke nan bud hanay nawahen ebélê le, balù yóm deng kegtuled le. ²³ Yó gónón mò du nim ni mò gónón hegefan yóm tey alì keheyu kmoen ebélê tekuy kem tau deng knoduhen, kem tau deng eles néléken mò enget megdóyón béléen. ²⁴ Duhen tekuy se yó kem tau deng tnabahen. Là sónen du kem Ju tnabahen, okóm gomong le snéen kul yó kem tau là Ju le. ²⁵ Nim ni koni, deng tehe hsulat Dwata bè yóm sotu tehe tugoden boluyen Husiya, yó monen, “Enget le baling dou tau yó kem tehe là dou tau du. Enget le baling dou tau kenbong nawa yó kem tau tehe là wen nawahu ebélê le.” s ²⁶ “Ne bè yóm benwu tehe gónóhu gel mon du, ‘Là dou tau du yó kem yó’ bud bè yó gónóhu mon du mò ku, ‘Yu se hol kun ngà Dwata, yóm Dwata laen dù tul katayen.’ ” t ²⁷ Wen se kun udél tehe snulat Isaya teganay gbak ebè yó kem tau Israél, monen, “Balù yóm tey kewadag tau semfu bè yóm tehe Israél, lómó kwen le, lómón helek bè kilil mohin, ewenem là kô le hol wen gewà bè yóm enget ktafak Dwata kul. ²⁸ Abay se enget wen kdaw Dwata kendel smolò du yóm kegsalà tau bè klamangen benwu, ne gotu tnafaken lu.” u ²⁹ Hol lómón yóm sotu tehe tulón Isaya teganay, yóm monen, “Bè yóm tehe ketafaken tekuy yóm Dwata laen dù là gbeken du, ke tehe là wen dù tebelen bè yó kem ból tekuy, deng tekuy mkél bè yóm tehe kegebaen yó kem syudad Sodom ne Gomora. Bà udì ke wen dù tebel bélê le.” ³⁰ Duhen yó, yó kem tau là Ju le, là kô ketes le du yóm ketedeng keton Dwata ku, okóm guta le lan le hemtahu bè Jisas. ³¹ Okóm yó kem tau Israél kat kemtes yóm ktedeng kton Dwata kul, tô hlan le bè yóm klolò le yóm hlau Musis. Okóm là, là kô guta le du yóm tô ketes le yó. ³² Yó gónón là tedeng keton Dwata ku abay se là helan le du bè yóm kehetahu le. Deng mom tô helan le bè yóm kul kegebek lemolò du yó kem hlau. Deng le mom glokob du yóm bnoluy Dwata “botu” ³³ yóm tehe tulónen bè sulaten, yóm monen, “Ngem deng wen botu suu lem blóng le bè syudad Sayun. Yó se yóm botu geselob yó kem tau, ne hlós le glokob du. Okóm yóm tau hemtahu béléen, là kô wen gónón gsel du.” w