¹ Yó gónóm mon, laen kô bud tafak Dwata kul ne yó kem tau deng ssotu bè Krays Jisas. ² Abay se deng nô bè klowil tekuy yóm kfasang yóm Tulus Dwata mlay klowil ne mlan bè Jisas Krays lemwà tekuy gu lem salà ne yóm lemwà kut gu lem hatay. ³ Yóm hlau, là kô gbeken mkó du yóm kfasang yóm salà bè klowil tekuy abay se laen dù tau tódô gembek lemolò du lemwót bè yóm tey keheglaan tekuy. Okóm wen kun atul Dwata, hógówen yóm Ngaen ne e hbaling bè lówó tau, lómón yóm lówó tekuy kem tau gemsalà ne e matay mò lanen tmuled yóm salà. ⁴ Yó se yóm deng nmò Dwata anì gbek tekuy mò du yóm tedeng heloloen tekuy bè hlauhen. Yó gónó tekuy gembek lemolò du abay se là bud tekuy galak du ne yóm knóyô tekuy, deng tekuy galak bè yóm Tulus Dwata. ⁵ Yó kem tau galak bè kul kenóyô, són yó ne hendem ktes le, són yó kem kul kenóyô. Okóm yó kem tau galak bè Tulus Dwata, són yó hendem ktes le, són yóm kun kóyô yóm Tulus Dwata. ⁶ Ke són knóyô lówó gónón galak yóm tau, yó nefeten, hatay. Ke galak bè Tulus Dwata, yó nefeten, klowil laen dù sónen, ne wen kenek nawahen. ⁷ Yóm tau són ktesen kun knóyô, hnohonen Dwata, abay se là kô nimónen du yóm kun helau Dwata. Bè ktahuhen, là kô gbeken mimón du. ⁸ Yó gónóm mon, là kô gbeken hefligal ke Dwata yóm tau yó. ⁹ Okóm kuy, là bud ye galak du ne yóm kuy knóyô ke deng nô bélê ye yóm Tulus Dwata tendo gónó ye galak. Okóm ke là nóen béléen yóm kun Tulus Krays yóm tau, là dengen kun tau Krays he yóm tau yó. ¹⁰ Okóm ke deng nô bélê ye Krays, deng wen ne lomi klowil blayen kuy hlanen bè yóm Tulusen. Balù yóm angat katay yóm lówó ye lemwót bè salà, bede mowil kun yó dum lóyóf ye abay se deng tedeng keton Dwata kuy. ¹¹ Ke deng nô bélê ye yóm Tulus Dwata tehe hlowil ke Jisas gu lem hatay yó, bud du angat bud helowil yóm tau deng matay. ¹² Yó gónóm mon, kem dumuhu setwoli, wen se kuy senolu nemò bede sundu bè yó dum óyô lówó mò salà. ¹³ Abay se ke henlel nmò ye yóm kuy knóyô, angat ye helós elem hatay. Okóm ke helan ye bè Tulus Dwata mò temóbóng kuy kebê du yóm sidek anì là glolò ye du yóm knóyô lówó, angat wen kuy klowil laen dù sónen. ^{15 14} Yó kem tau todo halak bè Tulus Dwata, lu se hol tahu kun ngà Dwata. Abay se yóm Tulus Dwata deng nô bélê ye là kô nemoen kuy tau gehesek bè klikò. Ne mlan bè yóm Tulus Dwata yó, deng ye baling kun ngà, ne gbek ye ne tmaba ke Dwata, “Ó Mà.” ¹⁶ Yó sem Tulus Dwata heglileb du tekuy yóm deng kengaen tekuy Dwata. ¹⁷ Lemwót bè yóm deng kengaen tekuy yó, yó se gónó tekuy gemuta du yó kem hyu angat blayen bè yó kem ngaen. Angat tekuy gemong bè yó kem hyu angat blayen ke Krays snéen. Ke wen gónó tekuy glayam ni kmoen ni lemwót bè klolò tekuy ke Krays, angat tekuy bud mung béléen snéen bè yóm tey kegetahen hulin kdaw. ¹⁸ Ke hendem tekuy yóm tey keheyuhen yóm angat hegfan Dwata bélê tekuy hulin kdaw, tek élél yóm keglayam tekuy nim kmoen ni. ¹⁹ Tódô kdê yó kem deng dlimun Dwata, tey kessangat le du se kul yóm kdaw angat kehegfan Dwata du yóm deng kengaen tekuy. ²⁰ Tehe yu teganay, gotu gemong metafak kentihen deng dlimun Dwata. Là kóen lemwót bè kul kóyô yóm ketafak le, okóm yó se kun kehelan du Dwata. Bede wen hendón nangat le. ²¹ Yó nangat le, duhen yóm angat kehyu le hulin kdaw anì là bud le matay, ne anì gemong le bè yóm tey klowil hyu angat blay Dwata bè yó kem ngaen. ²² Deng tengón tekuy se lemwót bè kesalà Adam efet nim kmoen ni, tey sidek kegenóm le du yóm kentihen deng dlimun Dwata. Yóm kegnóm le du, senged bè yóm hen-genóm yóm libun kemuleng blututen. ²³ Là són du lu gemnóm du nim ni, okóm tekuy snéen kem tau hol gónóhen nô yóm Tulus Dwata, yóm hol tanay basa Dwata tekuy lemwót bè yóm kat kehekoso tekuy yóm kdaw kehegfan Dwata du yóm deng kengaen tekuy, ne yóm kehelomihen yóm lówó tekuy. ²⁴ Ni se hol hendón nefet nawa tekuy bè yóm deng kehewà Dwata tekuy lem salà. Okóm ke deng ton tekuy se yóm hendón tekuy, là bud hendón tekuy du ne. Laen dù tau ke hendónen yóm deng tonen. ²⁵ Okóm ke là deng ton tekuy du, yó se gónó tekuy ne hol hebala mangat du. ²⁶ Yóm Tulus Dwata, tey kegelen tekuy bè yóm gónó tekuy ge lunog. Lómón yóm ge kni tekuy ebè Dwata, là hol tngón tekuy du ke tedu yóm mò udel tekuy. Okóm yóm Tulus Dwata fen hemkodu du bè Dwata yóm hol hyu bélê tekuy. Yóm fen gel kehkoduhen yó, là hulung tekuy mon du. ²⁷ Ne gotu tngón Dwata yóm nô lem hendem tau, ne tengónen snéen yóm nô lem hendem yóm kun Tulus. Abay se yóm Tulus Dwata, fen gel hemkodu du bélê tekuy bè Dwata yóm segmón bè yóm kun kóyô. ²⁸ Deng tngón tekuy se, balù kihu sut bè klowil tau, sa ge nmò Dwata gónón hyu bè yó kem tau kembong nawa du. Lu se yó kem tau deng tnabahen, yakà wen muhen kuy. ²⁹ Lu se tu kem tau deng tehe eles néléken ne hetolongen mò heskélen bè yóm Ngaen. Yó gónón mò du yóm yó anì hol dê dumuhen setwoli yóm Ngaen twogu. ³⁰ Duhen yó, yó kem tau deng hetolong Dwata, lu se yó kem tau tehe tenabahen ne gotu henbalingen lu tau tedeng ketonen ku, ne angat hemungen lu bè yóm tey kegetahen ditu bè longit hulin kdaw. ³¹ Tedu se kemon tekuy du ni kem deng monu ni koni? Yó hol gwa tekuy du yóm kelaen dù gembek hemsidek tekuy ke deng gefi bélê tekuy Dwata. ³² Ke là nalihen du yóm hol tek sotu Ngaen, tódô hamaen klowilen bélê tekuy, sélét mem yó ne là blayen du tekuy yóm kdê deng tehe fasaden tekuy. ³³ Yó kem kun deng nélék Dwata, laen kô bud gónó le melekdu abay se deng tedeng kton Dwata kuy. ³⁴ Ne laen se dù tau gembek bud temuled kul. Tek són Krays Jisas, okóm deng mem du yóm fen matay bélê tekuy ne deng bud hlowil Dwata, heyónen bè kwananen. Ne du mò fen belóng tekuy ebéléen nim kmoen ni. ³⁵ Duhen yó, laen kô dù gembek semkó tekuy bè yóm kebong nawahen tekuy Krays. Baluen ke dê megel gónó tekuy glayam, duhen ke henayam le tekuy lemwót bè kehetahu tekuy, anien ke wen bitil bong, duhen ke wen gónó élél, duhen ke wen knikò, baluen ke mem henatay le tekuy, senged snéen, laen kô dù gembek semkó tekuy bè yóm kebong nawahen tekuy Krays. ³⁶ Lómón yóm monen bè Sulat Dwata, monen, “Lemwót bè klolò me kóm, Dwata, yó gónón là sekó yóm todo kóló le hematay kum. Lómó kehedem le ebélê me, lómón ke ógóf nóló tnétê.” n ³⁷ Okóm lemwót bè yóm tóbóng Krays, yóm fen kembong nawa tekuy, yó gónó tekuy matù bè yó kem megel ge sut bélê tekuy. ³⁸ Deng hónô tengónu, laen dù gembek semkó tekuy bè yóm kbong nawahen tekuy Dwata. Laen dù bè nim klowil tekuy ni, balù hatay, balù yó kem hógów Dwata gu bè longit, ne yó kem metulus ge dók Seitan, balù yó kem gel sut bélê tekuy nim kmoen ni, dalang se yó kem sut hulin kdaw, ³⁹ balù yó kem hetulus Seitan lemwót gu te kmawang, duhen ke lemwót gu lem tonok, ne yóm kdéen deng delimun Dwata, laen kô gembek semkó tekuy bè yóm kbong nawa Dwata tekuy, hlanen bè yóm gónó tekuy mogot Krays Jisas.