¹ Ó kem dumuhu setwoli, deng hónô tngón ye mò kmoen yóm hlau gnan. Són olo kwen kegebeken bè tau yóm hlau, són yóm igò le tolo ² Hlingónu bè yóm libun deng myehen. Yóm hlau bè kesyehen mfét du bè yóm igoen tolo mowil yóm tuha logihen. Okóm ke deng matay yóm tuha logihen, laen dù bud kwalisen béléen ne yóm hlau bè kesyehen mfét du yó. ³ Okóm ke kendel myehen igoen tolo mowil yóm gna tuha logihen, yó gónó le mon du mdà yehen. Okóm ke deng matay se yóm gna tuha logihen, laen kô bud gónón gfét. Là kô monem du mdà yehen ke bud myehen. ⁴ Senged se bélê tekuy, kem dumuhu setwoli. Laen bud kegebeken ta tekuy ne yóm hlau tehe snulat Musis abay se bè yóm katay Krays, deng tekuy gomong matay béléen. Ne deng tekuy gomong bè yóm bud kehlowil Dwata du gu lem hatay. Ne yó uléken nim ni duhen yóm kwen gónón e kól yó kem nmò tekuy bè Dwata. ⁵ Yóm tehe kegen tekuy lemolò du yóm knóyô lówó tekuy, mom temnù yóm óyô tekuy mò du yóm sidek bè yóm deng ketngón tekuy yóm hlau, igò sem yó nefeten yóm nmò tekuy yó, hatay. ⁶ Okóm nim kmoen ni, lemwót bè yóm deng kgomong tekuy matay bè Krays, deng tekuy gewà du ne yóm deng kenu tekuy bè yóm hlau. Yóm kmò tekuy du yóm knóyô Dwata, là mlanen bè klolò tekuy du yóm hlau gnan, okóm mlan bè yóm lomi klowil ulék yóm kegalak tekuy bè yóm Tulusen. ⁷ Ke lómón yó kmoen yóm hlau, sidek kô yó bè kehedem ye du? Là kô yó du. Ke là wen yóm hlau, là kô tngónu du yóm salà. Lómón yóm meles nawa, là kô tngónu du ke sidek bè Dwata ke là wen yóm hlau mon du, “Béi abay meles nawa.” m ⁸ Okóm lemwót bè yóm deng kegna knóen béléu yóm salà, ne tngónu monen bè yóm hlau là hyuhen yóm meles nawa, okóm deng mom lenwéen yóm óyóu meles nawa. Ke là wen yóm hlau, là kô tngónu du yóm ksideken yóm nmou yó. ⁹ Gu laanu là deng temngón du yóm hlau, ofo do mon du ke là gemsalae. Okóm timbow tngónu yóm hlau, yó he kdilóu du yóm kegsalau, ne tódô tngónu denge golu lem hatay. ¹⁰ Duhen yó, yóm hlau mò tô bemlay dou klowil, deng mom tnuleden ou lanu mulé du. ¹¹ Tey sidek kegtondohu bè yóm nawahu móyô mò sidek, abay se sónmoen kemteng dou anì nuléhu yóm hlau. Mom yó uléken yóm nmou yó, hatay. ¹² Duhen yó, yóm hlau tehe snulat Musis yó laen dù kô belenen. Tey ktedengen, lelen alì hyu. ¹³ Là kô yóm hlau hyu ni yóm mit do elem hatay. Okóm yó mit do elem hatay duhen yóm alì óyóu mò sidek ne mulé du yóm hlau. Ni se gónóhu mton du ksideken yóm salà hlanen bè yóm hlau hyu anì golu lem hatay. Duhen yó, yó muhen yóm hlau mò gónóhu temngón du yóm alì ksideken yóm salà. ¹⁴ Tngónu yóm hlau, hono lemwót gu bè Dwata, laen kô sidek nô du. Okóm béléu yóm gónón sidek, abay se tauhe gemsalà, gféte bè yóm sidek. ¹⁵ Là kóe móyô du yóm dou gel kmò. Yóm tngónu hyu, là kô dog gmou du. Mom yó gmou yó kem sidek gel kenbéu. ¹⁶ Ke kenbéu yóm sidek gel nmou, yó se gónón gfan yóm kegmungu bè yóm hlau Dwata. ¹⁷ Yó gónóm mon, là kô ou du yóm mò du yóm sidek, okóm yó kemteng dou mò du kaem yóm salà deng eles tendo tmolun béléu. ¹⁸ Deng hónô tngónu yóm dou ktau, laen kô dù hyu nô béléu. Balù yóm kwen óyóu mò du yóm hyu, ewenem yó là kô dog gmou du. ¹⁹ Là kô dog gmou du yóm hyu tô nóyô nmou, okóm mom yó gmou, yóm sidek kat kenbéu. ²⁰ Bè yóm kegmou yóm là nóyóu du, ya mon ke lemwót bè dou óyô yóm kmou du, okóm yó kemteng dou mò du, duhen yóm óyô mò sidek deng eles tendo tmolun béléu. ²¹ Bè ktonu du, ni se kmoen yóm klowilu. Ket tô kmou yóm hyu, sal gel hegled yóm sidek. ²² Yóm hol nô lem hendemu, bong óyóu du yó kem hlau Dwata. ²³ Okóm wen gnómu bè yóm dou lówó alì kemgis kemteng dou. Gel sen-gleden yóm hyu nô lem hendemu. Ngangen mò dou efete gfét bè yóm sidek knóyô lówóhu. ²⁴ Tey hlayam nim ou, hol tahu tau laen gónón e kól. Hol kóyóu ke wen gembek lemwà dou bè nim lówóhu mit dou elem hatay. ²⁵ Yó gónóm mon, tey kdóyónu ke Dwata, abay se wen yóm gembek tmóbóng dou, duhen yóm gónóhu mogot Jisas Krays. Ni se yóm mò kmoen béléu. Ke són ou du, olohu beyen hemdem du yóm tô kimónu du yó kem hlau Dwata. Mom yó mlom kimónu du yóm sidek knóyô lówóhu.