¹ Duhen yó, kem dumuhu setwoli, ni kat nalu nawahu bélê ye lemwót bè yóm tey kkodu Dwata tekuy. Hol blay ye ke Dwata dé lówó ye mò tahu dsù ye ebéléen, yóm dsù tolo mowil ne todo ge nmò ye yóm heyu. Ne tey keheyu nawa Dwata du yóm keblay ye du yó. Ke hendem ye yóm kdê deng nmoen bélê ye, tey knóón ke ni se yóm kut nmò. ² Bê ye abay lolò ku kmò yó kem tau là hemtahu le lem nim benwu ni. Hesfili ye ke Dwata yóm kehedem ye anì gtukul ye ke tedu yóm kun kóyô bélê ye, ne ke tedu yóm hyu ne yóm tedeng ne yóm mò gónón hligal. ³ Yóm deng kélék Dwata do gónón wen kegebekem mon du mò kuy yóm kdê ye, bê ye abay nmò uléhen yóm kwit ye du yóm kenhulung ye abay se Dwata yóm bemlay du kuy. ⁴ Lómón yóm lówó tau, tey dê nô du. Ket yóm nô du, sal stólóng muhen. ⁵ Senged snéen bélê tekuy. Deng tekuy sesotu bè kun lówó Krays, ne tódô ket sotu bélê tekuy sal tólóng kun nmò. Ne lemwót bè yóm deng kesesotu tekuy bè kun lówó Krays gónóhen wen hentengón tekuy bè yó kem dumu tekuy. Ne ket sotu bélê tekuy wen mu tekuy du kem dumu tekuy. ⁶ Duhen yó, hol nmò tekuy sen yóm kenhulung blay Dwata tekuy. Ke benlay Dwata uu kehulung tmulón yóm kun udél, hol nmoem sen, mlan bè ktahu yóm deng hentahuhen. ⁷ Ke benlay Dwata uu kehulung tmóbóng kem dumuhem tau, hol nmoem sen. Ke benlayen uu kehulung tmolok, hol henktengem sen tmolok. ⁸ Ne ke yó blayen khulung semgeduf kem dumu tau, hol nmoem sen. Ke yó blayen kóm yóm nawa masa, hol bnasahem kem dumum sen. Ke yó blayen kóm khulung malak yó kem dumuhem tau, holi tódô hteneb mò du sen. Ne ke yó kenhulung blay Dwata kóm mò gel tmóbóng yó kem élél, hol nmoem sen mung du kligalem. ⁹ Béen olo són te kulit yóm kbong nawa ye kem dumu ye. Hol hegfan ye yóm hol tahu kesbong nawa. Ho knogol ye kdéen sidek. Hol lolò ye yóm hyu. ¹⁰ Kdê ye deng hemtahu, hol ye sbong nawa. Hol ye gel sadat. ¹¹ Hotu ye gel ye mò nmò, bê ye abay heduk. Hotu ye nawa ye mò du yóm hmoen kuy yóm gónó ye mogot. ¹² Hol tendo hlaan ye nawa ye abay se wen yóm hendón nefet nawa ye. Bê ye tenalaw ke wen gónó ye gel glayam. Tódô senflós ye mni bè Dwata. ¹³ Hol gel tnóbóng ye kem dumu ye hemtahu ke wen gónó le élél se kul. Hol ye gel hemódó ke wen tau milo sut bélê ye. ¹⁴ Ke wen kem tau hmayam kuy, bê ye abay hni bè Dwata anì tnafaken lu. Okóm hol hni ye anì tnóbóng Dwata lu se kul. ¹⁵ Ke hligal kem dumu ye, gebót ye hligal bélê le. Ke wen langag le, gbót ye langag bélê le snéen. ¹⁶ Béen mtukul muyu nawa ye. Bê tekuy abay hton salù. Bê ye abay kenyak mò du yóm nemò kem tau glaan. Bê ye abay salig yóm kuy ketngón. ¹⁷ Bê ye bnalà sidek yó kem gel mò sidek bélê ye. Hentilob ye kmò ye anì laen dù gónó le gemsani kuy kem dumu ye. ¹⁸ Hol tilów ye són gel ye anì laen dù gónó ye mit sfatay bè kem dumu ye tau. ¹⁹ Ó kem wè, hol bê ye abay meles. Tódô bayà ye bè Dwata, abay se deng monen bè Sulat Dwata, monen, “Ou he fen gel meles. Ne ou he fen gel malà.” n ²⁰ Ni dii yóm kuy nmò, lómón yóm deng hesulat Dwata, yóm monen, “Ke bitil hohonem, henkenem. Ke mekeng lembaken, hinumem. Ke ni se nmoem, enget tey sidek kyaken.” ²¹ Ke sidek nmò kem dumu ye bélê ye, bê ye bud bnalà sidek. Bnalà ye heyu anì là gemmoen yóm sidek.