¹ Ó kem dumuhu setwoli, yó kat gel sen-galuhu ne hnihu bè Dwata ke gotu le gewà gu lem hatay yó kem dumuhu Ju. ² Tengónu tey le móyô lemolò ke Dwata, okóm là deng glileb le du he yóm hol kun kóyô Dwata bélê le bè klolò le du. ³ Là kô tengón le du yóm lan nmò Dwata mò gónón tedeng ktonen kul. Mom yó tô nmò le, tódô lolò le yóm kul kehelan du. Là kô lolò le du yóm lan nemò Dwata mò gónó le tedeng. ⁴ Lemwót bè yóm deng nemò Krays, yó gónón deng tódô gesón yóm klolò tekuy yóm hlau mò gónón tedeng keton Dwata tekuy. Tek són bè yóm kehetahu bè Krays gónón baling tedeng kdéen tau. ⁵ Deng tehe wen senulat Musis teganay gebak ebè yóm tau tô móyô baling tedeng lemwót bè kloloen yóm hlau. Yó monen, “Balù kihu tau lemolò du yó kem hlau Dwata, enget gutahen se yóm klowil laen dù sónen.” x ⁶ Okóm bud wen monen bè Sulat Dwata gebak ebè yóm kehetahu tekuy mò gónón tedeng ketonen tekuy, yó monen, “Là bud hendem tekuy du ne ke wen tau mógów ebè longit nen e nangay Krays ete tonok. ⁷ Duhen ke wen mógów ebè yóm benwu gónón nô yó kem tau deng matay anì bud niten mulék ete tonok Krays.” Là kô yó du. ⁸ Okóm ni se yóm hol tulónen, yóm monen, “Deng nô bélê ye ne nim tulón Dwata ni, yó sem todo gel sentulón ye, lel ye todo gel hemdem du snéen.” y Yóm tulón Dwata monen yó, yó se gel tulón me kuy, duhen yóm kehetahu tekuy bè Krays. ⁹ Ke gel tulón ye bè dumu tau yóm Jisas hol gónó ye mogot, ne ke hentahu ye yóm deng kehelowil Dwata du gu lem hatay, yó se gónó ye gewà gu lem hatay. ¹⁰ Abay se lemwót bè yóm kehetahu tekuy, yó se gónón baling tedeng keton Dwata tekuy. Ne lemwót bè yóm gel ktulón tekuy du bè kem dumu tau yóm deng kehtahu tekuy, yó se gónó tekuy gewà gu lem hatay. ¹¹ Sotu monen bè Sulat Dwata, yó monen, “Balù kihu tau hemtahu béléen, laen kô gónó le gesel du.” z ¹² Yóm Udél Dwata yó, laen kô dù tau ke là gomongen lemen, abay se laen kô gónó le stólóng yó kem Ju bè yó kem tau là Ju le. Tek sotu se yóm gónóhen mogot yóm kdéen tau, duhen Jisas Krays. Kihu tau tmaba béléen, sal sket gel tnóbóngen lu. ¹³ Lómón yóm monen bè Sulat Dwata, yó monen, “Ket tau htóbóng bè yóm gónó tekuy mogot, enget gewà gu lem hatay.” a ¹⁴ Okóm tedu se kemò kehetóbóng tau béléen ke là deng hentahu le du? Ne tedu se kmò kehetahu le béléen ke là deng gungol le du yóm tulón gebak béléen? Ne tedu se kemò kungol le du boluyen ke là deng wen tau temulón du kul? ¹⁵ Ne tedu kmò kógów le ne e temulón du ke là wen hógów kul? Lómón yóm monen bè Sulat Dwata, yó monen, “Tey bong hyu gemnóm du yóm kesut yó kem tau mit yóm Tulón Hyu.” b ¹⁶ Okóm là kô kdê le du hemtahu du yóm Tulón Hyu yó. Hol mkél bè yóm sotu tehe mon Isaya ekni, yóm monen, “Ó Dwata, là holen wen tau hemtahu du yóm gel tulón me.” c ¹⁷ Duhen yó, yó gónó le hemtahu yó kem tau ke deng gungol le yóm Tulón Hyu. Ne yóm Tulón Hyu monu yó, duhen yó se yóm tulón me gebak ebè Krays. ¹⁸ Bede wen snólóku. Là deng gungol kem tau Israél du kô nim tulón ni? Deng gungol le ne. Lómón yóm monen bè Sulat Dwata, monen, “Deng kem tehe gungol kedéen tau te tonok ne. Deng tódô gefet bè klamangen benwu yóm ketulón le du.” d ¹⁹ Bud wen snólóku. Là deng glileb le du kô kem tau Israél yóm tehe gel tulón le kul yó? Enget deng tengon le ne. Ngem yóm udél Dwata tehe tulón Musis teganay gebak ebélê le, monen, “Angat le hlobo yó kem dou tau Israél, sok tnóbóngu yó kem dumu tau. Angat wen gónó le lembut do yó kem dou tau sok knoduhu yó kem tau tehe là temngón dou.” e ²⁰ Ngem ke Isaya kun, là kóen liko tmulón du yóm tehe mon Dwata teganay, yóm monen, “Deng mom ton le ou yó kem tau tehe là mebel dou. Ne denge hdilô bè yó kem tau tehe là smólók dou.” f ²¹ Okóm tólóng yóm mon Dwata gu ebè yó kem tau Israél, yó monen, “Tey megel kulu le, là dog le mimón. Tódô sónmou tendo hemkól kul, okóm là kô kenmón le do.”