¹ Kogolen bè yó, tódô tonu fat bè yó kem gel hógów Dwata gu bè longit, mdà le bè fat sokok tonok. Yó nmò le, fen henseng le yóm kógów lenos anì là tagaden mbel e talak tonok na a talak mohin ne ebè yó kem koyu. ² Ne bud wen sotu hógów Dwata tonu lemwót fi gu bè dmata kdaw, niten yóm kun ilô yóm Dwata laen dù tul katayen. Ominen hgel udélen ebè yó kem fat hógów Dwata deng wen kfasang blay Dwata kul mò na a hemsidek yóm tonok ne yóm mohin. ³ Yó monen mò kul, “Bê ye tagad hensidek yóm tonok ne yóm mohin ne yó kem koyu ke là nan na deng kmò me ilô lem uyó yó kem kun tau Dwata.” ⁴ Ominen yó tmulón du dou deng wen lematu bud fat folò fat libuhen yóm kwen le yó kem tau deng wen ilô nmò le lem uyó le, hono kem tau semfu gu bè yóm tehe sfolò lewu ngà Israél. ⁵ Yóm kdê tau wen ilô le yó, sfolò lewu libuhen lemwót gu bè yóm kun ból Juda. Bud senged snéen bè kun ból Rubén, bud sfolò lewu libuhen. Dalang se bè kun ból Gad, ⁶ ne bè Asir, ne bè Naftali, ne bè Mnasa. ⁷ ne bè Simyun, ne bè Libay, ⁸ ne bè Isakar,  ne bè Sibulun, ne bè Jusif ne bè Bindyamin. Setnù kdê le lematu bud fat folò fat libuhen. ⁹ Kogolen bè yó, bud nkayu ketngelu, ne tódô tonu se yóm tey genged tau. Ya tey kwen le, laen kô gembek msó kul. Lemwót le gu bè klamangen benwu, bè ket but tau, ne bè ket ból tau, ne bè ket udél tau. Gotu le mdà bè solu yóm gónón myón yóm fen kmamal lewu le yóm Ngà Ubiha. Gotu le mnes bukay, ne sket kul mogot doun koyu. ¹⁰ Tey kehgel le udél le, mon le, “Deng tekuy gewà gu lem hatay lemwót bè yóm Dwata tekuy, yóm nô bè gónón myón kmamal, ne lemwót bè yóm Ngà Ubihahen.” ¹¹ Ne mdà le bè yó se kul yóm kdê hógów Dwata gu bè longit. Gotu le mdà hilol yóm gónón myón yóm fen kmamal, ne hilol yó kem tau tuha, ne hilol yó kem fat mtulus. Ne tódô lemwót yó kem gel hógów Dwata, gotu le tódô lemfen bè solu yóm fen kmamal, ne tey kdóyón le du, ¹² mon le, “Tahu se. Hol knóón bè yóm Dwata tekuy ke là skasen yóm tendo kdóyón tekuy du ne yóm kadat tekuy du, lemwót bè yóm alì kegetahen ne yóm alì ketngónen, ne yóm alì kfasangen ne yóm alì kegbeken.” ¹³ Ominen mudél ebéléu yóm sotu bè yó kem tau tuha, monen mò do, “Tngónem kô mau kul yó kem mnes bukay yóó? Tngónem gónó le gu lemwót kô?” ¹⁴ Monu se, “Là, Sér, là kô tngónu du. Tulónem dou dé.” Ne monen se mò dou, “Lu se yó kem tau deng mlan lemen yóm tey hlayam bong te tonok, okóm là kô gtebel le du yóm klolò le ke Jisas. Deng nolob le ne yóm nes le bè kun litô yóm Ngà Ubiha, ne deng baling bukay ne. ¹⁵ Yó se gónó le mdà bè solu Dwata, ne tódô senflós le mò du bè kun Gónô Dwata yóm gel hmoen kul kemdaw ne kifu. Du se yóm fen gel kemlung kul lemwót bè yóm knóen lem blóng le. ¹⁶ Là kô bud wen kbitil le duhen ke wen kleeng le. Ne là se kô bud gnóm le du yóm sidek ékét kdaw. ¹⁷ Abay se yóm Ngà Ubiha, yóm fen mdà bè solu yóm gónón myón yóm fen kmamal, du se yóm fen gel semgyok kul. Ne angat nalaken lu ebè yóm tbul él, yóm él mò hlowil kul. Ne angat gotu nifu Dwata yóm lewok bè mata le.”