¹ Kogolen bè yó, bud tonu yóm sotu hógów Dwata htuntun gu bè longit. Nim hógów Dwata ni, tey wen kfasangen, ne tódô gbeken hlayag klamangen tonok lemwót bè yóm tey keslinangen. ² Hgelen udélen, monen, “Deng gbà ne. Deng gbà ne yóm tey syudad Babilun. Deng baling gónó le gel nô yó kem kdéen klasi busaw alì sidek. Ne bè yó gónó le nô snéen yó kem onuk koyu là mólósen. ³ Tódô kdéen dumu benwu, deng le gotu segbót minum béléen bè yóm kun ninum alì lóbô, duhen yó se yóm gel kwiten kul mò samuk. Tódô kdéen tau hol geta bè klamangen benwu gotu dumuhen sesamuk. Ne yó kem kdéen tau gel mò udél swa lemwót bè klamangen benwu, gotu le baling kwasa lemwót bè yóm là kgafasen yóm kdê knóyô lówóhen.” ⁴ Ominu mungol yóm sotu mudél gu bè longit, monen, “Ó kem dou tau, mdó ye du ne yóm benwu yó. Hol bê ye abay gbót bè yó kem sidek nmoen anì là gomong ye bè yó kem glumfaken. ⁵ Abay se yóm salà nmoen, deng gesduk bè longit ne ke snansudem. Là kô klifót Dwata du yóm sidek gel nmoen. ⁶ Nmò ye béléen yóm sidek tehe gel nmoen bélê ye, bede hol hegulé ye yóm kbeles ye du. Hinum ye du yóm ninum alì lóbô senta yóm tehe gel hinumen kuy. ⁷ Tey gedlug kehegetahen knóen, ne tey gedlug kehdengenen snéen. Yó hol tles ye du, hegedlug ye keglayamen ne hegedlug ye klangagen. Yakà gel monen du, ‘Ni ou ni, libune boi. Là kóe libun bolu, laen kô dou knangag.’ ⁸ Lemwót bè yóm tey kehegmónen yó, tódô segeng ksuten béléen bè yóm sotu kdaw yóm gónón glayam. Ne tey wen desen, ne tey dê knangagen, lel tey bitil bong. Ngangen mò du efet deng mom mlób bè ofi. Yó gónón alì megtafak, abay se alì mfasang yóm kmukum du, duhen Dwata yóm gónó tekuy mogot.” ⁹ Ya tey sidek kkik le du yó kem tau hol geta bè klamangen benwu yóm kton le du kebel yóm ofi mken du. Lu se yó kem tau tehe dumuhen sesamuk, ne tehe tódô nmung le yóm sidek knóyô lówóhen. ¹⁰ Gotu le mdà hlayuk, knikò le, kô gomong le bè yóm tey glumfaken, mon le, “Weyò, weyò. Kamaen yóm tey syudad Babilun yóó, yóm tey któtólen. Tek sotu urasen deng sana megtafak.” ¹¹ Ya tey sidek kkik le du se kul yó kem tau tehe gel dumuhen swa lemwót bè klamangen benwu, abay se laen dù bud bemli bélê le ne. ¹² Laen dù bud bemli du yó kem tahu blówón le, ne yó kem blówón bukay le, ne yó kem dê botu sminang mebtes le ne yó kem pérlas le. Senged sen yó kem dê kay tila alì mebtes gel hbalù le, yóm tila bukay, ne megem hulô, ne yóm hol tógó hulô ne yóm sida, laen dù bud bemli du bélê le ne. Dalang se yó kem kfal mebtes là klet ton du, ne yó kem dê dumu gel hbalù le mò ngom gónô le, yó kem nmò le gu bè koyu mebtes ne yó kem gel tenwél le, ne yó kem gel nsól le, dalang se yó kem botu alì mebtes mò klóón gónô, laen dù bud bemli du bélê le ne. ¹³ Dalang se yó kem dê kay som le, ne yó kem dê kay tilob boo gel ntem le boluyen insinsu, ne yó kem dê kay tilob boo gel lunol le bè lówó le, laen dù bud bemli du bélê le ne. Senged se yó kem dê kay ken mebtes le, ne dê kay ninum le, là bud wen gónó le hembalù du ne. Efet kkólen bè yó kem safì le ne ubiha le ne kudà le ne klisa le, balù yó kem tau hesek gel senswa le, laen dù bud gónó le e hembalù kul ne. ¹⁴ Yó mon le mò du yó kem tau mit udél swa yó, mon le, “Deng tódô lana ne yó kem dê tehe kenbeyenem. Gotu lana ne yó kem kendengenem, dalang se yó kem ngom libun tilob gónóm gel heklóón. Là kô bud tonem du ne.” ¹⁵ Ne yó kem tau deng baling kwasa lan le swa du, gotu le mdà hlayuk, likò le, kô gomong le bè yóm tey glumfaken. Ya tey kkik le du, mon le, ¹⁶ “Weyò, weyò. Kamaen yóm tey syudad bong yóó. Tehe tey tilob yóm nes gel leseken, yóm nes bukay ne yóm hulô megem hitem ne yóm alì tógó hulô. Tehe tódô tfeng lówóhen yóm ngom gónón alì knóón, yóm nmò le bè blówón ne bè yó kem botu sminang mebtes ne bè yó kem pérlas. ¹⁷ Tek sotu urasen deng sana lana béléen yóm tey kendengenen yó.” Ne kdê yó kem tau mit kafal gel lemulón hbalù, ne yó kem tau gel smakay kafal, ne yó kem tau mò nmò bè yó kem kafal, ne yó kem tau hembalù mifal mohin, gotu le mdà hlayuk, ¹⁸ ya tey kkik le du igò le temngel yóm tey kebel lemwót gu bè yóm ofi sulék mken du, mon le, “Laen kô dumu syudad bong mkay senta yóm syudad yó.” ¹⁹ Lemwót bè yóm alì klangag le, gotu bnulus le kfung te kulu le. Ya tey sidek kedlumu le, mon le, “Weyò, weyò. Kamaen yóm tey syudad bong yó. Gotu le baling kwasa yó kem tau gel mit kafal lemwót bè yóm alì dê kendengenen. Tek sotu urasen deng sana gotu lana béléen yóm kdéen.” ²⁰ Okóm kuy du, yóm kdê ye gel nô bè longit, hol ye hligal lemwót bè yóm deng keglaen. Hligal ye ne, yu kem tau Dwata, ne yu kem tehe gel hógów Jisas, ne yu kem tehe gel tugod Dwata, abay se deng tnafak Dwata ne lemwót bè yóm tehe sidek nmoen bélê ye. ²¹ Ominen lemwót yóm sotu hógów Dwata alì kemgis, nwahen yóm botu kbongen yóm botu bong gónó le gel gmaling, ne tódô tudaen elem mohin, yó monen, “Hol lómón ni se yóm deng ktudà Dwata du yóm tey syudad Babilun yó. Là kô bud tonem du ne. ²² Là bud gungolem du bè yóm benwu yó ne yóm uni heglung, duhen ke udél tau stulón, duhen ke uni sloli, duhen ke uni féw. Ne laen se kô dù bud tonem bè yó ne yó kem dê kenhulung gel nmò tau. Ne là kô bud gungolem du bè yó ne yóm uni mdek. ²³ Laen se dù bud layag solok tonem mnóng bè yó ne. Ne là bud gungolem du bè yó ne udél le hligal yó kem tau lomi syehen. Kdê yó kem tau mò udél swa bè yóm syudad bong yó, hono kem tau bong boluyen te tonok. Ne yóm kdéen tau bè klamangen benwu, gotu le gsukat béléen lanen alì hulung mgoy kul.” ²⁴ Tódô megtafak yóm syudad Babilun, abay se gotu ton Dwata lemen yóm litô yó kem tehe gna tugoden ne yó kem tau hemtahu béléen tehe bnonok le bè yó. Tahu se, tódô kdê yó kem dumu tau deng tehe hnatay le te tonok, gotu ton Dwata litô le bè yóm syudad bong yó.