¹ Nim bok ni, gotu nô lemen yó kem angat sut talak tonok deng eles hegfan Jisas Krays. Deng gna hegfan Dwata béléen anì tles bud hegfanen bè yó kem tau tóbóng lówóhen. Ne duhen yó, gotu hegfan Krays bè Jan, yóm sotu tóbóng lówóhen, hlanen bè yóm sotu hógówen gu bè longit. ² Ne lemwót ke Jan, du bud tles tmulón du yóm deng tonen. Ni sii yóm snulaten gbak ebè yóm tehe tulón Dwata ke Jisas, ne yóm ktahuhen deng hegfan Jisas Krays béléen. ³ Hligal kun yóm tau fen semfala du nim bok ni. Ne hligal le se kul yó kem tau fen hmungol du ne mimón du yóm eles tulónen ni. Là buden legen ne ksuten ni kem kdê tulónen ni. ⁴ Ou se Jan gónón lemwót nim sulat ni. Hwitu ebè yó kem tau hemtahu bè yó kem hitu simbahan bè prubinsya Asya. Yó hem Dwata ne yóm Tulusen ne Jisas Krays hol tendo tmóbóng kuy, ne tendo henek nawa ye. Ni se yóm sana Dwata tenbut bè kbuten efet nim kmoen ni, ne du se yóm móyón bud sut ni. Yóm Tulus Dwata, wen hitu kay kfasangen ne eles tendo nô bè solu Dwata, bè yóm gónón myón kmamal. ⁵ Ne yóm Jisas Krays, tey gsalig yóm gel tulónen. Du se yóm hol geta bè yó kem deng hlowil Dwata gu lem hatay. Bud du se kmamal yóm kentihen tau hol geta mogot benwu talak tonok. Tey kbong nawahen tekuy, gloken hamà yóm kun litô bélê tekuy mò lanen lemwà tekuy gu lem salà ⁶ ne deng henbalingen tekuy kem tau mò nogoten, kem tau mò gel blóng kem dumu tau ebè Dwata, yóm Maen. Bê tekuy lensón yóm kdóyón tekuy du. Laen kô dù sónen yóm tey kegetahen ne yóm tey kfasangen kmamal yóm klamangen. ⁷ Ngem yóm Jisas Krays, angat bud kól mung bè lobun. Tódô kdéen tau angat gotu mton du. Ne gotu ton yó kem tau tehe tembek du ekni. Tódô kdéen kay tau talak tonok, angat le gotu dmumu mkik bè yóm kkólen yó, knikò le yóm kkukumen kul. ⁸ Ni se udél Dwata, yóm gónó tekuy mogot, yóm laen dù là gbeken du, monen, “Ou se yóm hol buten ne bud ou se hol sónen.” Ni se udél yóm sana Dwata tenbut bè kbuten efet ni nem kmoen ni, ne du se yóm móyón bud sut. ⁹ Ou se Jan, yóm sotu dumu ye setwoli. Lemwót bè yóm klolou ke Jisas, denge mkél bélê ye ne bè yóm kehbala ye du yóm keglayam sut bè yó kem tau nogot Jisas. Ni deng mom htólóng le o bè ni bè Patmus, yóm sotuhungul nô talak mohin. Yó duón le do lanu tmolok yóm Udél Dwata, ne yóm ktahuhen lemwót bè Jisas. ¹⁰ Bè yóm sotu Akad, tódô sut béléu yóm Tulus Dwata, ne tódô gungolu se yóm tey mudél te kwangu, hol lómón ke uni féw bong. ¹¹ Yó utóm tum udélen, monen, “Gotu snulatem yóm angat tonem, ne gotu hwitem ebè yó kem tau hemtahu bè yó kem hitu syudad nii: bè Ifisus ne ebè Smirna, ne ebè Pirgamum ne ebè Tiyatira, ebè Sardis ne ebè Filadélfya, ne ebè Ludisya.” ¹² Ominu beklil bè yó naw e hnénég yóm le mudél ebéléu. Ne tódô tonu se yó kem hitu solok sedà, bede hono blówón. ¹³ Ne bud tonu se yóm mkél bè tau mdà lem blóng le. Ne gnut te hólól tihen yóm nesen, ne wen blówón sminang nô bè kfuhen. ¹⁴ Yóm weken, hol lómón kbukayen yóm nes alì bukay. Ne yóm lem matahen hol lómón ke dilóf ofi. ¹⁵ Ne yóm tihen lómón ksinangen yóm blówón lomi olo. Ne yóm udélen, hol lómón ke lungkul yóm tey hikong. ¹⁶ Ne wen hitu blotik nogoten bè sigel kwananen. Ne wen hesut gu lem baken lómón ke sudeng. Ne lem uyóhen, hol lómón knóngen mata kdaw deng gtungó. ¹⁷ Bè yóm ktonu du, tódóe hegluduk klohok tihen, lómón ke denge tódô matay mekto. Okóm ogoten do sigel kwananen, ne monen mò do, “Béi abay hlikò. Ou se yóm hol buten ne bud sónen. ¹⁸ Ou se yóm laen dù tul katayen. Denge tehe matay, okóm ni denge bud mowil, laen dù bud sónen ne yóm dou klowil. Ou se yóm wen kfasangen mogot hatay, dalang se yóm benwu gónó le nô yó kem tau deng matay, ou se yóm mogot du. ¹⁹ Yó ne,” monen, “gotu snulatem ni kem tonem ni. Wen se sut ni kmoen ni, wen se sut elem hulin kdaw, gotu snulatem lu. ²⁰ Wen hnigaden ni kem hitu blotik nogotu bè sigel kwananu ni, ne yó kem hitu solok blówón sedà ni. Yó hnigaden ni kem hitu blotik ni, duhen yó kem hitu gel malak yó kem tau hemtahu bè yó kem hitu simbahan monu yó koni. Ne yó hnigaden ni kem hitu solok blówón sedà ni, duhen yó kem tau hemtahu bè yó kem hitu simbahan yó.”