¹ Sotu kedaw bèyó, tey tau wen bud stifun ebè Jisas. Timbow laen dù bud kenle, tnaba Jisase béléen yó kem gel lemolò du, monen mò kul, ² “Tey kkoduhu kul nikem tau ni. Deng tlu kdaw le ni nenô béléu bè ni, ne laen kô dù bud ken le. ³ Ne là se móyóe hulék kul là mken, kô lenmek le gu bè lan, abay se wen bélê le mayuk gónó legu lemwót.” ⁴ Ne mon yó se kem gel lemolò du, “Endu tô gónó tekuy ma mò hken kul bè nim benwu laen dù tau benwu du nikem tey tau wen nii.” ⁵ Ne bud mon Jisas se, “Hilu botù de tenafay nô bélêye?” Mon le se, “Tekhitu.” ⁶ Omin Jisas gotu hyón kul bè tonok yó kem tey tau wen. Ne newahen yóm hitu botù tenafay, ne nen mni bè Dwata. Timbow deng knihen, ominen kembéng du, nelolen yó kem gel lemolò du ebè yó kem tau. Netahu se, nmò le. ⁷ Ne wen se ngà utón él nô bélê le. Bud nwa Jisas snéen, ne nen bud mni bè Dwata, ne ominen molo du yó kem gel lemolò du. ⁸ ‑ ⁹ Tódô kdê le se gotu mken yó kem tau, ne gotu le se besow. Dô fat libu yóm kwen le. Timbow deng kken le, sentifun yó kem gel lemolò du yóm lukasen, botong hitu abì. Omin Jisas yó he gotu hulék yó kem tau. ¹⁰ Ominen tódô bud motun elem yóm ówóng, mung du yó kem gel lemolò du. Mówóng le ebè yóm sotu benwu boluyen Dalmanuta. ¹¹ Bè yóm benwu yó, wen kem Farisi sut bè Jisas na a mit du skuya ude. Móyô le ke wen gónó led muón du, yó gónó lemon du mò du, “Moi kum kun sotu hentaw ton mò gónó me hemtahu du yóm khógów Dwata kóm.” ¹² Okóm hbong Jisas knawahen, monen, “Moen ni kem tau kmoen ni ke alì tógón le yóm hentaw ton? Tódô tulónu kuy ketahuhen, laen kô dù ilô hegfan Dwata bélê ye.” ¹³ Ne tódô tnagak Jisas lu, motun le elem ówóng, hlós le efatuyóm lanaw. ¹⁴ Bè yóm kógów le yó, klifót le mit bnotu yó kem gel lemolò ke Jisas, ne tek sbotù dù tenafay nô bélê le lem yóm ówóng. ¹⁵ Ne wen tulón Jisas kul, bede helanen bè hlingón, monen, “Hol ten‑gama ye yóm kul bulung henok tenafay yó kem Farisi, dalang seyóm ke Hirod.” ¹⁶ Stulón le són lu yó kem gel lemolò ke Jisas, mon le, “Yó dô gónón mon du yóm yó, yakà klifót tekuy du mit tenafay.” ¹⁷ Tódô tngón Jisas yóm sentulón le, yó gónón mon du mò kul, “Moen de ke sentulón ye yóm là kegwit ye bnotu? Là glileb ye du dilóu lan yóm monu. Ilóem là deng tngón ye du? ¹⁸ Igoen sem wen mata ye, ewenem là kô ye mton. Igoen sem wen klingu ye, ewenem là kô ye mungol. Hentulón ye nawa dé ¹⁹ yóm kekbéngu limu botù tenafay bèyó kem limu libu tau, hilu abì de yóm lukasen sentifun ye?” Mon le se, “Sfolò lewu.” ²⁰ Ne bud mon Jisas, “Ne yóm kekbéngu hitu botù mambang bè yó kem fat libu tau, hilu abì de bud tehelukasen?” Mon le se, “Hitu.” ²¹ Ne yó bud mon Jisas mò ku, “Ilóem là gewa yedu kô yóm deng nemou ye?” ²² Ngang le Jisas mówóng bèyó efet le dmuung bè Bitsayda. Bè yóm kkól le bè yó, wen tau butô nit le ebè Jisas, ne henkodu le béléen anì olon menok du. ²³ Tahu se. Omin Jisas malak yóm tau butô yó, niten hlayuk udì bè yóm benwu yó. Ne namuen iwol mata yóm tau butô, nennoken, ne monen mò du, “Deng wen tonem kô?” ²⁴ Ne temngel seyóm tau yó, monen, “El, wen tonu tau, okóm lómón tô koyu mógów.” ²⁵ Bud nnok Jisas sbalà matahen, ne ominen hmunu temngel se yóm tau yó koni, ne baling hyu ketngelen, ne tódô tikaw se ktonen du yóm kdéen. ²⁶ Ne mon Jisas mò du, “Hetedengi mulék ebè gónóem ne, béi bud mlan bè yó bè gónón dê tau.” ²⁷ Timbow bud lemwót bèyó Jisas ne yó kem gel lemolò du, mógów le ebè yó kem benwu moni bè yóm syudad boluyen Seseriya Flipay. Bèyóm igò le mógów, snólók Jisas bélê le, monen, “Tulón ye do kun, tedu de gel kmò kehedem le do yó kem dumu tau?” ²⁸ Mon le se, “Wen semon du uu kun Jan, yóm tehe gel mabtays. Mon kem dumu, Ilaydyahi kun. Bud wen se mon du uu se sotu bè yó kem dumu tugod Dwata teganay.” ²⁹ Ne mon Jisas mò kul, “Kmò kuy du? Tedu sekuy kmò kehedem do du?” Fen bnalà Pitér, monen, “Uu seyóm Misaya, yóm deng kun nélék Dwata.” ³⁰ Ne tey mget kmon Jisas du mò kul, “Hol bê ye abay tulón yóm mon ye yó.” ³¹ Nbuten bè yó ne todo ktolok Jisas yó kem gel lemolò du, monen mò kul, “Là kô gbeken du ke là nen ne hol glayam yóm Ngàm Dwata. Enget senkbê yó kem tuha gónó tekuy gel galak, neyó kem tau hol getagel demsù ebè Dwata, dalang se yó kem tau gel tmolok hlau. Ngang le mò du efet hfatay le. Okóm angat bud hlowil Dwata bè yóm getluhen kdaw.” ³² Tódô benkas Jisas tmulón du kul nim ni. Lemwót ke Pitér, niten hlayuk udì Jisas, tô bnólówen yóm monen. ³³ Okóm binguy Jisas ebèyó kem gel lemolò du, ne bnólówen Pitér, monen mò du, “Hlayuki béléu, Seitan. Là kóen lemwót bè Dwata yóm kehedemem yó, yakem kehedem tau te tonok.” ³⁴ Omin Jisas sembung yó kem teytau wen bèyó, dalang seyó kemgel lemolò du, ne monen mò kul, “Ke wen tau móyô lemolò do, song hyu ke tódô tebelen yóm kun kóyô, ne eles tnihangen yóm kun kros,  ominen yó lemolò do. ³⁵ Yóm tau ke knamaen klowilen, angat lana béléen yóm klowilen yó. Okóm yóm tau là knamaen du klowilen lanen lemolò do, ne lanen hetngón yóm Tulón Hyu, angat gutahen yóm klowil laen dù sónen. ³⁶ Anien he yóm tau ke gotu gefunen yóm klamangen benwu, laen kô ofolen du yóm deng gfunen yó ke lana béléen yóm klowil laen dù sónen. ³⁷ Ke lana béléen yóm klowil yó, laen kô bud gónón ma mò tlesen. ³⁸ Nikem tau kmoen ni,” mon Jisas, “Deng kenogol le Dwata lan le gel mò sidek. Yóm tau ke hnalaen yóm kloloen dou lem blóng kem dumuhen, dalang seke hnalaen yóm gel toloku, enget hnalà yóm Ngà Dwata snéen sok bud semfulék edini. Bè yóm bud kesfuléken yó, enget gefan béléen yóm tey kegeta Maen, ne gotu le enget mung du yó kem hógów Dwata gu bè longit.”