¹ Bè yóm kewót Jisas bè Gónô Dwata, monen mò du yóm sotu tau gel lemolò du, “Ngem, Amo, tey tilob kmò lekulnikem gónô ni, tey tilob botu beng le.” ² Mon Jisas se mò du, “Ni kem kdê gónô lembang ton tekuy ni, laen kô dù angat tebel du nikem beng botu nii, angat gotu gbà.” ³ Ngang Jisas mógów efet kól bè Bulul Ulib, fi fetu yóm Gónô Dwata yó koni, ominen myón bèyó. Ne mógów le se ebéléen le Pitér ne Jim ne Jan ne Andru, teksón lu, ne snólók le bè Jisas, mon le, ⁴ “Ó Sér, kilón kdohoen yóm deng tulónem kum yó koni? Tedu semò ilô me du yóm móyón ksuten ni kem monem ni?” ⁵ Ne mon Jisas se mò kul, “Hol ten‑gama ye anì laen dù tau gónó ye ge tondo. ⁶ Abay se enget dê tau sut tô hlingu béléu. Yó enget mon le, ‘Ouse yóm Misaya.’ Ne enget tey dê se tau getondo bélê le. ⁷ Sok wen gungol ye tau sgida mo ni bélê ye, duhen ke sentulón le gida bè dumu benwu snéen, bê ye abay hlikò. Enget gotu dohò nikem ni, okóm là yó du he yóm hol són kdaw. ⁸ Enget wen kem benwu mit sgida bè kem dumu benwu. Enget tey dê benwu gónón embel linol bong ne bitil bong. Yó se ayawen yóm móyón kkól yóm hol són kedaw. Lómón yóm libun mlutut, sok kmuleng, ayawen sut yóm ngaen. ⁹ Eles hol ten‑gama ye,” mon Jisas, “Abay se enget wen kem tau kemfô kuy, nit leyu ebè yóm gónô skukum, enget nula nfes le yu bè yó kem kul gónô gel stifun yó kem Ju. Lemwót bè yóm klolò ye do, enget nit le yu bèsolu yó kem gubérnor, ne bè yó kem dumu tau hol geta.Yó se yóm kdaw tnana kehetengon ye yóm Tulón Hyu. ¹⁰ Bede nan gelalag bè kedéen tau bè klamangen benwu he yóm Tulón Hyu yó, ominen yó kól yóm hol són kdaw. ¹¹ Ke enget kenfô leyu, nenit leyu ebè yóm gónô skukum, bê ye omin tenafa nawa yóm kmò kbalà yekul. Dwata he bemlay kuy yóm kmò enget kbalà ye kul sok sut yóm kdaw yó. Omin se là kô kuy udél du yóm enget mon ye, udél tódô suen bélê ye yóm Tulus Dwata. ¹² Bè yóm kdaw yó,” mon Jisas, “enget wen se tau mlef hekfô leyó kem hol kul dumu setwoli mò hfatay le.Wen sekem tau, mlef hekfô leyó kem hol kul ngà mò hfatay le. Dalang seyó kem ngà,enget mlef le hfatay yó kem hol kul tuha. ¹³ Enget tey dê tau kmutó nawa kuy lemwót bèyóm klolò ye do,” mon Jisas. “Okóm yóm tau gbeken hembala du yó kem gónón glayam efet kól bèhol sónen, du se gmuta du yóm klowil laen dù sónen.” ¹⁴ Bud mon Jisas, “Enget wen ton ye yóm tey sidek knikò, tódô medà bè Gónô Dwata, yóm tô matù ke Dwata.” Yóm tau benasa du nim ni, hol hennagien kmò klanen. “Ke sok kól yóm kedaw yó, eles lemlóy elem bulul ne yó kem tau menwu bè prubinsya Judiya. ¹⁵ Ke wen tau tolo nô bè kun gónó henos bè gónóen, hol béen tlek husek elem gónóen ke mebel mò niten. ¹⁶ Ke wen tau tolo nô bè tnibahen, hol béen tlek bud mulék eta neke mebel kgal mfól mò niten. ¹⁷ Kodu leyó kem libun tolo mlutut bèyóm kedawyó, ne yó kem libun tolo semlé ngà. ¹⁸ Hol hni ye bè Dwata anì là geblaen bè yóm bulónen sidek kdaw yóm klóy ye. ¹⁹ Omin se enget tey hlayam bong soksut bélê ye yóm hlayam monu ni. Ni he yóm hlayam tey sidek bè kdéen hlayam deng sut bè tau lemwót bè hol kbut kedlimun Dwata du yóm benwu, ne là sekô bud tenuen du ne. ²⁰ Okóm lemwót bèyóm kkodu Dwata kul yó kem tau deng néléken, yó gónón là hol hegendu yóm tey hlayam yó. Ke hegenen, laen kô tau bud lemowil te tonok. ²¹ Sotuhen,” mon Jisas, “Hol bê ye abay hentahu ke wen tau mon dumò kuy, ‘Ngem ni sei yóm Misaya, yóm deng kun nélék Dwata.’ Duhen ke mon le, ‘Ngem, deng gdek dituu,’ hol bê ye abay hentahu. ²² Abay se enget wen sut tô hlingu bè yóm Misaya, ne tô le hlingu bè yó kem tugod Dwata. Enget tey dê hentaw ton hegfan le mò gónó le hol tô smukat yó kem tau deng kun nélék Dwata. ²³ Eles tulónu kuy ni kem ni anì hol ye getgama.” ²⁴ “Timbow kogol yóm alì hlayam bè yóm kdaw yó,” mon Jisas, “Angat là buden mnóng kdaw dalang se bulón. ²⁵ Enget le tódô btang gu bè longit yó kem blotik, ne là bud glolò le lesang le yó kem dumu mnóng gu bè longit. ²⁶ Ominen yó he enget gfan yóm Ngà Dwata hebatun gu tta mung bè lobun. Enget ton le se yóm tey kfasangen ne yóm tey kegetahen. ²⁷ Ominen hewót yó kem gel hógówen gu bè longit mò na a semtifun yóm kdéen tau deng nélék Dwata bè klamangen benwu.” ²⁸ “Tódô henkna ye bè yó dém koyu fig,” mon Jisas. “Sok tmubed, ne nbuten mból dounen, ayawen sut bulónen mnóng kdaw. ²⁹ Senged snéen sok deng gotu gfan yóm kdê deng tulónu kuy ni koni, yó se ayawen yóm deng klonihen yóm ksutu. ³⁰ Bê ye klifót,” mon Jisas, “Kesok sut ni kem deng tulónu kuy ni, tolowen he bè ni kem tau kmoen ni gmafit mton du. ³¹ Enget tódô meno yóm longit dalang se yóm tonok. Okóm yóm dou udél,” mon Jisas, “là kóen ne e meno.” ³² “Laen kô dù temngón du yóm kedaw enget kesfuléku,” mon Jisas, “Duhen ke tedu urasen. Balù yó kem hógów Dwata gu bè longit, là kô tngón le du sekul. Dalang se do, là kô tngónu du.Tek són Mà bè longit tem ngón du. ³³ Yó gónóm mon, eles ye temgama, ne bê ye hlingay, abay se là kô tngón ye du yóm kdaw angat kkólu. ³⁴ Hol lómón yóm tau mógów ebè yóm sotu benwu mayuk. Gu laanen là deng lemwót, nen eles tulón yó kem tau mò nmò béléen yóm hmoen kul, yóm ket kul ne sotu. Ne tulónen yóm tau fen mentey bè bak tikeb anì eles ningaten yóm kkólen. ³⁵ Senged sekuy,” mon Jisas, “Hol ningat ye se kuy abay se là tngón ye du kkólen yóm fun gónô, ke deng sdef kdaw kkólen, duhen ke sóól buteng, duhen ke móyón mwas, duhen ke deng btù mata kdaw. ³⁶ Dé ke kulel kkólen yóm igò ye tolo tungô. ³⁷ Nim monu mò kuy ni,” mon Jisas, “Tódô kdéen tau gónóhu e mon du, hol ye eles mingat.”