¹ Bud lemwót Jisas bè yó, melan elem yóm prubinsya Judiya, nemifal yóm él Jurdan.Timbow kól fifatu, ya tey tau todo sbung ebéléen, ne gel tmolok bélê le snéen, lómón se yóm gel nmoen. ² Yóm knóen bè yó, wen kem Farisi mógów ebéléen, wene snólók le béléen mò dalil duón ledu, mon le, “Là sideken bè hlau tekuy kô ke skó bè yehenen yóm logi?” ³ Benalà Jisas selu, monen,“Tedu se yóm monen bè hlau Musis?” ⁴ Monle se, “Là sideken bè hlau Musis ke skó, syan ke wen sulat gónón fema yóm logi mò ilô yóm deng kkóhen du.” ⁵ Bnalà Jisas se, monen, “Yó gónó Musis smulat du yóm hlau yó lemwót bè yóm kat kgel tmolok kuy se. ⁶ Okóm bè yóm hol kbuten, bè yóm kedlimun Dwata yóm kdéen, yó monen bè Sulat Dwata, ‘Nmò Dwata yóm tau, logi ne libun. ⁷ Yó gónóm mon, gtagaken maen ne yéen yóm logi ne setnù le yóm kun tuha libun, ⁸ ne baling le ssotu yóm lewu le yó.’  Yó gónóm mon,” mon Jisas, “Là kô le bud stólóng ne yó kemtau syehen, deng le baling ssotu ne. ⁹ Duhen yó, yóm deng kun sensotu Dwata, béen abay wen tau bud sem kó kul.” ¹⁰ Timbow le bud husek elem gónô, snólók le bè Jisas yó kem gel lemolò du yóm sentulón leyó koni. ¹¹ Ne bnalà Jisas lu, monen, “Yóm tau ke kóhen tuha libunen, ne bud myehen dumu libun, deng tenonduhen ne yóm gna tuha libunen. ¹² Senged se yóm libun, ke kóhen tuha logihen, ne bud myehen dumu logi, deng tenonduhen ne yóm gna yehenen.” ¹³ Wen se kem tau mit ngà ebè Jisas na le e tô hnok du. Okóm mem bnólów le lu yó kem gel lemolò ke Jisas. ¹⁴ Timbow ton Jisas nim nmò leni, botong lenbuten lu,monen mòkul, “Heflós ye lu edini yó kem ngà yó, bê ye abay henseng lu. Abay se yó kem tau no got Dwata, hol le mkél bè knawa ni kem ngà lómón ni. ¹⁵ Tódô tulónu kuy ktahuhen,” mon Jisas, “Yóm tau ke là gtud nawahen ke Dwata lómón se yóm kul kegtud nawa yó kem ngà, là kóen ne e gmung bè yóm kogot Dwata tau.” ¹⁶ Omin Jisas smiwi yó kem ngà, ket kul na sotu, ne nenoken lu, ne mni bélê le bè Dwata. ¹⁷ Timbow le deng bud tô lemwót le Jisas, wen sotu tau mlóy ebéléen, tódô tuden bukolen bè soluhen, ne monen mò du, “Ó Sér, uu se yóm tau hyuk moen. Wen tô snólóku béléem. Tedu de tô nmou du anì gutahu yóm klowil laen dù sónen?” ¹⁸ Ne mon Jisas se mò du, “Moen de ke monem mò dou, ‘Tau hyu kmoem?’ Laen kô dù dumu hyuk moen, tek són Dwata. ¹⁹ Deng tngónem se yó kem hlau Dwata, yóm monen, ‘Béi monok. Béi temondo yehen. Bé imnagaw. Béi tmifù kéng. Béi lemugi. Nadatem maem ne yéem.’ ” ²⁰ Ne mon yóm tau smólók ke Jisas yó koni, monen, “Tódô mbut bè yóm hanà kegenu ngà, Amo, laen kô deng gel nuléhu du se dou ni kem hlau Dwata ni.” ²¹ Yóm ketngel Jisas ebéléen mom gkoduhen, monen mò du,“Sotu he duen tolo gónóhem là deng sikof. Tu ne muléki, nam e hbalù yóm kdên ôbéléem, ne blayem bè tu kem tau élél yóm blihen, ne enget wen tey kendengenem bè longit. Lemwót yó dum kóm, loloem o.” ²² Timbow gungol nim tau ni koni yóm udél Jisas ebéléen, tódô dilô lem uyóhen yóm tey sidek keblat nawahen. Tódô mulék igò yóm tey sidek kegnómen du, abay se tey wen kendengenen. ²³ Omin Jisas temngel ebè yó kem gel lemolò du, ne monen mò kul, “Tey mgel bè yóm tau wen kendengenen ke tô hogoten ke Dwata yóm klowilen.” ²⁴ Tey ketnga le du yó kem gel lemolò du yóm monen yó. Okóm bud mon Jisas, “Tey mgel, kem Wè, ke tódô tô hogoten ke Dwata klowilen yóm tau. ²⁵ Mem mahil bè yóm kamél ke hfusek tekuy bè yóm sol dalum, olo yóm tau wen kendengenen, tey mgel béléen ke tô hogoten ke Dwata klowilen.” ²⁶ Bèyóm kmon Jisas du yóm yó, deng mom bud sidek ketnga yó kem gel lemolò du, stulón le són lu, mon le, “Ke lómón yó, tau du de gembek gemwa du yóm klowil laen dù sónen?” ²⁷ Tenngelen lu Jisas, monen, “Ke bè tau, là gbeken du. Okóm bè Dwata, laen dù là gbeken du.” ²⁸ Mudél se ke Pitér kun, monen, “Ngem nidém mi, Sér, glok me tódô gemtagak yóm kdéen lan me lemolò kóm.” ²⁹ Ne mon Jisas se mò kul, “Tódô tulónu kuy ktahuhen, kedeng gloken gemtagak gónóen yóm tau, neyó kem dumuhen setwoli, kólen bè yó kem tuhahen, ne yó kem ngaen, duhen ke tonoken lanen lemolò do ne lanen hból du yóm Tulón Hyu, ³⁰ enget tey wen blay Dwata du bè nim klowilen te tonok ni. Botong bud lematu duléken he bud hulék du ebéléen yóm deng gtebelen, yóm gónóen ne kem dumuhen setwoli ne kem yéen ne kem ngaen ne tonoken. Okóm nan gel wen gónóhen glayam bè yó kem tau là hemtahuhen. Bede hulin kedaw, angat gutahen yóm klowil laen dù sónen. ³¹ Okóm bè yóm kdaw yó, angat tey dê bèyó kem tau deng gegna nim kmoen ni, enget le bud eghuli. Neyó kem tau ghuli nim kemoen ni, enget le bud gegna bèyóm kdaw yó.” ³² Bè yóm ksubô leebè Jirusalim le Jisas ne yó kem gel lemolò du, fen tukô gna kul Jisas. Ne tey ktafa nawa ledu yó kem gel lemolò du, lel le likò yó kem dumu tau hulikul. Omin Jisas bud mit kul htólóng yó kem sfolò lewugel lemolò du, tulónen kul yóm angat nmò lebéléen. ³³ “Ngem nim kógów tekuy ebè Jirusalim ni,” monen, “Sokkuy kól ditu, angat eted le yóm Ngà Tau elem tdok yó kem geta bè yó kem gel demsù ebè Dwata ne yó kem tau gel tmolok hlau. Yó angat kukum le du, hatay. Ne enget blay le elem tdokyó kem tau sundu Ju du. ³⁴ Tey enget kehelowon ledu, ne lel le semdulakdu, ne enget nfes le, ngangen efet hnatay le. Bede bè getluhen kedaw, angat bud mowil.” ³⁵ Timbow kogolen bèyó, sut le bè Jisas yó kem lewu tau setwoli Jim ne Jan, ngà Sibidi, mon lemò du, “Ó Sér, wen tô hni me béléem.” ³⁶ Mon Jisas se, “Tedu de?” ³⁷ Mon le se, “Ke hyu béléem, Sér, bèyóm angat kegetahem bè yóm kogotem benwu, kóyô me ke sotu bélê me myón bè kwananem ne sotu se myón fi bè iwóngem.” ³⁸ Mon Jisas se mò kul, “Là kô tengón ye du yóm hni ye yó. Gbek ye hembala du kô ke yu gemfà du yóm enget hlayamu, ne yóm enget hatayu?” ³⁹ Mon le se, “Gbek me.” Mon Jisas, “Tahu se, wen kdawen nmò le bélê ye lómón yóm enget nmò le béléu. ⁴⁰ Okóm laen dù gembek mélék du yóm tau enget myón fi bè kwananu duhen ke fi bè iwóngu. Dwata se mò du yóm yó. Deng wen eles néléken mò angat hyónen bèyó.” ⁴¹ Timbow gungol yó kem sfolò tau gel dumu le lemolò ke Jisas yóm tô hni le Jim ne Jan, ya tey sidek kebut lekul. ⁴² Omin Jisas go tu bud semtifun kul, ne monen mò kul, “Deng hónô tngón ye se kul kmò yó kem tau hol geta talak tonok, tey gel kdansók le yó kem tau nogot le. Ne yó kem tau mogot kukum, tey gulé kwit le yóm kukum nogot le. ⁴³ Okóm bélê ye kuy,” mon Jisas, “Là kô yó du yóm hyu bélê ye. Ke wen sotu bélê ye móyô ke du geta bè kem dumuhen, yake hol nô béléen yóm nawa yóm tau gel heglayam. ⁴⁴ Ne ke wen bélê ye móyô ke du hol lemyu bè kem dumuhen, yake hol nô béléen dé yóm nawa yóm tau gel heglayam anìhol heglayam bè kem dumuhen. ⁴⁵ Yakà lómón nidu yóm kun nmò yóm Ngà Dwata. Là kô yó du nógówen edini kefen na a hdatù bèkem tau. Okóm yó nógówen mò fen tmóbóng kul, hamaen klowilen mò msok yó kem tey tau wengu lem hatay.” ⁴⁶ Ngangen ne kól lebè Jiriku le Jisas neyó kem gel lemolò du.Timbow le bud lemwót bèyó, tey tau wen mung kul. Wen sotu tau butô myón bè kilil lan, són moen gel temfólól bè yó kem tau gel mius. Yó boluyen Bartimiyus, ngà Timiyus. ⁴⁷ Timbow gungolen yóm klan Jisas bè yó, yóm Jisas lemwót bè Nasarit, tódô henmungen tmaba, monen, “Ó Jisas, sfu tehe Dabid, hol knoduhem o.” ⁴⁸ Okóm deng mom senbólów yó kem tau bèyó, mon lemò du, “Béi hebnes tmaba.” Bede mem hennolien temaba, “Ó sfu tehe Dabid, hol knoduhem ou.” ⁴⁹ Timbow gungol Jisas yóm tabahen tódô hegsud medà,ne monen, “Tenaba ye edini kun.” Tahu se tnaba le, mon le, “Mdai, tenabahen uu. Hyu nawahem ne yó.” ⁵⁰ Tódô kóhen legmoten yóm tau butô yó,ne hebkó mdà,mógów ebè Jisas. ⁵¹ Mon Jisas mò du, “Tedu deyóm hmoem dou? ”Mon yó sem tau butô yó, “Htonem ou, Amo.” ⁵² Mon Jisas se mò du, “Yó ne, lemwót bè yóm kehtahuhem béléu, yó gónóm bud mton. Lemwótine.” Ne tahu se, tódô sen‑gengen sebud mton yóm tau butô yó, ne tódô loloen Jisas.