¹ Ou se Pol gónóhen lemwót nim sulat ni, yóm tau fen gel hógów Jisas Krays. Là kóen lemwót bè tau yóm gel kógówu ni, ne là kóen melan bélê le snéen. Okóm tódô lemwót bè Jisas Krays lewu le Dwata, yóm Mà tekuy, yóm tehe hlowil ke Jisas. ² Smulate ediyó bélê ye, yu kem tau hemtahu bè Jisas Krays bè yó kem benwu bè prubinsya Glasya. Tódô kdê yó kem dumuhu hemtahu bè ni, gotu gbót mólóm kuy snéen yu kem tau hemtahu dyó. ³ Yó hem Dwata, yóm Mà tekuy, dalang se yóm gónó tekuy mogot Jisas Krays tendo temóbóng kuy ne tendo henek nawa ye. ⁴ Yóm Krays, deng tódô hamaen yóm kun klowil bè salà tekuy anì wen lan tekuy gewà gu lem yó kem sidek gel nmò yó kem tau là hemtahuhen ni kmoen ni. Bè yóm katayen yó, tódô nemungen yóm kun kóyô Dwata, yóm Mà tekuy. ⁵ 5Hol bê tekuy abay nmò sónen yóm tendo kdóyón tekuy ke Dwata. ⁶ Ya tey sidek ketengahu kuy. Là kóen deng legen yóm kehetahu ye, deng sana mom bud knogol ye Dwata igoen du deng tehe tmaba kuy ebéléen, helanen bè yóm kun tóbóng Krays. ⁷ Deng mom henmóyô ye yóm mon le sotu tulón hyu kun.  Bè ketahuhen, là kô wen dumu “tulón hyu.” Yó gónóhu mon du mò kuy nim ni, abay se tengónu wen tau todo gel sembeweg kuy bè yó. Tô tenles le yóm Tulón Hyu gbak ebè Krays. ⁸ 8 Okóm ke wen tau tô temles du yóm tehe tolok me kuy, senged ke mi duhen ke wen bè yó kem hógów Dwata gu bè longit, lembuen hógów knóen elem lanaw ofi. ⁹ Deng tehe tulón me kuy nim ni, okóm ni bud nulitu bélê ye. Balù kihu tau ke tólóng toloken, ke là sengeden bè yóm kum tolok deng henmóyô ye, angat mógów elem lanaw ofi yóm tau yó. ¹⁰ Nim udélu ni koni, yó kô udél yóm tau ke hnebelen kdóyón le du yó kem dumuhen tau? Là kô yó du. Okóm yó dé hol hnebel nawaw, duhen yóm kdóyón Dwata dou. Là kô henebelu du ke wen tau dmóyón dou. Ke yó tô nmou, là kóe tau tóbóng lówó Krays ilóu. ¹¹ Wen tulónu kuy, kem dumuhu setwoli. Yóm Tulón Hyu gel tulónu, là kóen lemwót bè tau, ¹² ne laen se kô dù tau tmolok du dou. Okóm tódô Jisas Krays yóm hol hetengón du dou. ¹³ Deng hónô gungol ye se yóm tehe dou gel nmò bè klolou du yó kem kum gel hentahu mi kem tau Ju. Tey tehe gel kehesideku yó kem tau hemtahu bè Dwata, balù udì ke wen koduhu kul, mom nóyóu he ke gotu genlau lu. ¹⁴ Bè kegenu lomi tau, là kô gsenged le dou yó kem dumuhu lemnok bè klolò me du yóm kum gel hentahu mi kem Ju. Tey megenek he dou klolò du yó kem tehe kul adat yó kem tehe fù me. ¹⁵ Okóm balù yóm tehe tey kesidek nmou bè yó kem tau hemtahu, ewenem tey nawa Dwata ebéléu. Yóm gu laanu là deng tau, deng eles néléken ou ne mò sotu bè yó kem gel hógówen. Bè yóm deng keheto yóm buteng tehe fét Dwata, ¹⁶ tódô hegefanen béléu yóm hol kun Ngà. Yó gónón hegefan du béléu anì naw e hetengón bè kem tau là Ju le yóm TulónHeyu gbak ebéléen. Laen kô dù tau dumuhu deng semtulón du nim nemou ni, ¹⁷ ne là se kóe mógów ebè Jirusalim ke naw e stulón bè yó kem gena nélék Jisas mò hógówen gu laanen là deng mélék dou. Okóm mem yó nmou, medo ebè benwu yó kem Arab. Legen udì bè yó, ominu mulék ebè syudad Damaskus. ¹⁸ Deng tlu halayen bè yó, ominu yó mógów ebè Jirusalim, wen tô naw snólók bè Wè Pitér. Wen dô lewu fedyanu bè yó béléen. ¹⁹ Laen dù dumu tau tehe hógów Jisas ke tonu bè yó, tek són Jim, twoli yóm gónó tekuy mogot. ²⁰ Ni kem snulatu ebélê ye ni, hono tahu. Ton Dwata yóm klaen dù kéngu. ²¹ Timbow kogolen bè yó, ominu mógów ebè yó kem benwu senakuf prubinsya Sirya ne prubinsya Silisya. ²² Uma kóm bè yóm kdaw yó, là kô me deng setengón he yó kem tau hemtahu bè prubinsya Judiya. ²³ Són olo tengón le yóm gel tulón tau kul, yóm gel mon le, “Yóm tau tehe alì gel hemsidek kum, deng mom du baling tau hetengón du bè kem dumu tau yóm tolok tehe gel kenbéen.” ²⁴ Yó gónóm mon, tey kdóyón le ke Dwata bè yóm deng kbalingu hemtahu bè Jisas.