¹ Ou Pol gónóhen lemwót nim sulat ni. Hol lemwót bè kun kóyô Dwata yóm kbalingu tau gel hógów Krays Jisas. Nim sulat ni, hwitu ebélê ye yu kem kun tau Dwata bè Ifisus, yu kem tau deng ssotu bè Krays Jisas, kem tau là kóen monol nawa le ebéléen. ² Yó hem Dwata, yóm Mà tekuy, dalang se yóm gónó tekuy mogot Jisas Krays, tendo tmóbóng kuy ne tendo henek nawa ye. ³ Hol tendo gel dóyón tekuy dé Dwata. Du se kun Dwata ne kun Mà yóm gónó tekuy mogot Jisas Krays. Lemwót bè yóm deng kessotu tekuy bè Krays, yó gónón alì tmóbóng tekuy, botong blayen tekuy kdê yó kem hyu lemwót gu bè longit. ⁴ Gu laan Dwata là deng dmimun du he yóm benwu, deng kem gegna ne yóm kéléken tekuy mò kun tau, hlanen bè yóm deng kessotu tekuy bè Krays. Yó gónón mélék tekuy anì henbalingen tekuy kem tau mólós, kem tau laen dù belenen bè ktonen tekuy. ⁵ Lemwót bè yóm kbong nawahen tekuy Dwata, deng kem tehe eles gegna ne kehedemen du yóm kngaen tekuy hlanen bè Jisas Krays. Tey kligalen bè yóm kngaen tekuy yó, hol lemwót bè kun kóyô yóm kmoen du. ⁶ Hol dóyón tekuy dé Dwata lemwót bè yóm tey któbóngen tekuy hlanen bè Krays, yóm hol kun Ngà kenbong nawa. Yóm tóbóng yó, là kô benli du. ⁷ Lemwót bè yóm tehe fen katay Krays bélê tekuy, yó se gónó Dwata lemwà tekuy, duhen yó se yóm kmò kehlifóten yóm salà tekuy. Tey bong yóm któbóngen tekuy yó. ⁸ Là kô gbek tekuy hmingón du kbongen yóm tóbóng yó. Lelen bemlay du tekuy he yóm khulung hedem anì gbek te gmileb du yóm kun nmò. ⁹ Lemwót bè kun kóyô deng heglileben tekuy ne yóm tehe atul gebnos. Yóm atulen yó, deng eles hendemen yóm kehlanen du bè Krays. ¹⁰ Yó atulen, duhen yóm gotu kessotuhen gónó le kmulu yó kem kentihen nô bè longit ne kentihen nô te tonok. Ne yó gónó le mogot, duhen Krays. Gotu nmoen nim atulen ni sok deng hto yóm butengen mò du. ¹¹ Bè kdéen nmò Dwata, sal lemwót bè kun kmò kehedem du ne bè kun katul du. Deng néléken tekuy mò kun tau hlanen bè yóm deng kessotu tekuy bè Krays, yake yó du hol kóyóen bélê tekuy. Tódô lemwót bè hol kbuten kehedemen mò du ni kem ni. ¹² Duhen yó, bélê me kum kem tau hol tanay hemdón ke Krays, yake mi dé gónó Dwata megdóyón lemwót bè kun keheyu. ¹³ Senged se kuy, deng ye baling kem kun tau Dwata lemwót bè yóm kungol ye du yóm tahu tulón, duhen yóm Tulón Heyu gónó ye temngón du yóm lan ye gewà gu lem hatay. Deng ye hemtahu bè Krays, ne yó gónó Dwata hemsù du bélê ye yóm kun Tulus tehe fasaden tekuy mò ilô yóm deng kfunen tekuy. ¹⁴ Lemwót bè yóm knóen bélê tekuy yóm Tulus Dwata, yó gónó tekuy temngón du dohò kguta tekuy du yó kem tehe fasad Dwata bè yó kem kun tau, ne dohò snéen yóm hol tahu kehewaen tekuy. Yó gónóm mon, hol gel dóyón tekuy dé yóm tey kehyuhen yóm kut Dwata. ¹⁵ Duhen yó, lemwót bè yóm deng kungolu du yóm kbegel yóm kehtahu ye bè Jisas, yóm gónó tekuy mogot ne yóm alì kbong nawa ye yóm kdê kun tau Dwata, ¹⁶ tey bong se yóm dou kdóyón ke Dwata lemwót bélê ye, ne sónmou gel mutóm kuy bè yóm gel knihu béléen. ¹⁷ Gele mni bè yóm Dwata alì mfasang, yóm mà Jisas Krays yóm gónó tekuy mogot. Gel hnihu béléen anì blayen kuy yóm kun Tulus mò gónó ye baling hulung hedem, ne mò hegfan du bélê ye yóm kun kmò Dwata anì hol temnù ketengón ye du. ¹⁸ Hol hnihu bè Dwata anì hlayagen lem hendem ye anì tengon ye yóm kwen tey hendón nefet nawa ye, yó se yóm tehe tabahen kuy. Kóyóu ke hol glileb ye snéen yóm alì kehyuhen yóm deng fasaden bè yó kem kun tau, ¹⁹ ne yóm alì kegbeken tmóbóng tekuy kem tau hemtahu béléen. Nim kegbek Dwata tmóbóng tekuy ni, ni se yóm tehe hol kegbeken ²⁰ bè tum tehe kehlowilen ke Krays gu lem hatay, ne yóm deng kehyónen du fi bè kwananen ditu bè longit. ²¹ Són Krays gónó le mogot yóm kdê deng wen hfogot Dwata kul, yó kem wen kegbek le ne wen kfasang le ne wen glal le. Yóm boluy Krays, laen kô dumu boluy tótól semnged du nim kmoen ni ne balù yóm elem hulihen kdaw. ²² Deng gotu hogot Dwata ke Krays yóm kentihen. Ne du nmò Dwata mò hol gónó mogot yóm kdéen yó kem tau hemtahu béléen. ²³ Ne yó kem tau hemtahu, hono kem kun lówó Krays, ne Krays se hket du yóm kdéen.