¹ Tngónu laen hol muhu alì semsulit du bélê ye yóm kemò keblay ye ebè yó kem dumu tekuy hemtahu bè Judiya. ² Tngónu yóm tey óyô ye bemlay. Tey kdóyónu kuy bè ni kem tau bè prubinsya Masdunya. Deng gel tulónu kul, yó monu, “Deng nebut le halay gna ne yóm kul keblay yó kem tau hemtahu bè prubinsya Akiya.” Lemwót bè yóm alì kesegeduf ye bemlay, yó gónón dê tau móyô bemlay bè ni. ³ Yó gónóhu gena hógów kul le Taytus edyó anì là muléken elem baku yóm gel kdóyónu kuy. Okóm tey hyu ke wen yóm deng eles hentifes ye yóm mò enget blay ye anì hol lómón yóm gel tulónu kul. ⁴ Okóm ke wen tau mung dou gu dini bè prubinsya Masdunya bè yóm kógówu ediyó, ne ke là deng wen hentifes ye, tey sidek kyak me bè yóm kegena kedóyónu kuy. Sotuhen, sidek kyak ye bélê le se kuy. ⁵ Yó gónóhen wen eles hógówu tukô gena dou anì eles hentifes ye gu laanu là deng kól dyó yóm blay tehe fasad ye. Bè yóm nmò ye yó, yó gónón hol gefan yóm kewóten bè nawa ye yóm keblay ye, laen dù tlek hmau du kuy. ⁶ Bê ye klifót nim monu ni, yóm tau mò hulu, ke udì huluhen, udì se enget gutahen. Okóm yóm tau bong kmoen hulu, bong se angat gutahen. ⁷ Duhen yó, yake ket tau eles hemdem du kebongen yóm angat blayen. Là kóen heyu yóm bemlay ke là nóen bè nawan, duhen ke song bemlay ke tek nubug le. Abay se ke Dwata kun, tey kbong nawahen du yóm tau hol nô bè nawahen bemlay. ⁸ Ne bè yóm gel blay Dwata ebélê tekuy, sal gel nemoen lukasen anì tódô ket du bè yóm wen mu tekuy du, ne anì hol wen gónó tekuy ma mò tóbóng tekuy kem dumu tekuy tau. ⁹ Lómón yóm monen bè Sulat Dwata, yóm monen, “Yóm tau ke bong tóbóngen yó kem tau élél, là kóen mkó bè nawa Dwata yóm któbóngen yó.” g ¹⁰ Dwata se gel bemlay yóm lem hulu mò hulu yó kem tau anì wen ken le. Bud lemwót bè Dwata snéen yóm gel blay tekuy, hol lómón ke lem hulu mò hulu tekuy. Ne bud Dwata se hetowok du anì wen tey nuta tekuy. ¹¹ Ge wen lan nmoen mò gónó tekuy ma anì hol wen tóbóng tekuy yó kem tau élél. Ne bè yóm kwit me du yóm blay ye, angat tey dê dmóyón ke Dwata lemwót bè yóm któbóng ye kul. ¹² Là són yó du gónón hyu yóm keblay ye ke mò tmóbóng yó kem tau Dwata. Okóm sotu gónón heyu, angat tey dê tau hol dmóyón ke Dwata. ¹³ Bè yóm keblay ye, yó se gónón gefan yóm kehetahu ye ke Krays. Angat tey dê tau dmóyón ke Dwata lemwót bè yóm kimón ye du yóm Tulón Hyu lemwót bè Krays. Dóyón le Dwata senéen bè yóm tey któbóng ye kul, dalang se yó kem dumu tau tnóbóng ye. ¹⁴ Angat tey gel kni le bélê ye bè Dwata, ne baling mogot nawa le ebélê ye lemwót bè yóm tey któbóng Dwata kul hlanen bélê ye. ¹⁵ Yó ne, hol dóyón tekuy dé Dwata bè yóm keblayen du tekuy yóm Ngaen, yóm blay là gbek tekuy hmingón du btesen.