¹ Ó kem dumuhu setwoli, ni hol kóyóu ke tngón ye yóm deng nmò yó kem tau hemtahu bè klamangen prubinsya Masdunya lemwót bè yóm któbóng Dwata kul. ² Balù yóm alì ksidek yóm keglayam le, mom temnù he yóm tey kligal le. Lemwót bè yóm tey kligal le, tey bong yóm gel blay le bè yó kem dumu le hemtahu, balù yóm tey kélél le se kul. ³ Tódô tulónu kuy ktahuhen, tódô blay le yóm hol són genbek le, mom guléhen he yóm hol són genbek le yó, ne laen kô dù tau mdók kul mò du. ⁴ Mom lu he tódô hekodu bélê me anì gbót le tmóbóng se kul bè yó kem tau Dwata bè prubinsya Judiya. ⁵ Ya tey ketenga me du yóm kbong blay le. Okóm yó hol tanay nmò le, na le gotu hogot yóm gónó tekuy mogot yóm kul klowil. Ne lemwót bè yóm kimón le ke Dwata, bud gbót nimón le mi snéen kum. ⁶ Duhen yó, hógów me Taytus ediyó bélê ye, abay se du tehe mebut du teganay, heyu se ke bud hendengen anì henlós ye yóm tey heyu nemò ye yó. ⁷ Deng tey któtól ye se kuy bè yóm kehetahu ye bè Dwata, ne bè yóm kehulung ye tmolok, ne bè yóm ketengón ye du yóm ketahuhen, ne bè yóm kesegeduf ye tmóbóng, ne bè yóm kbong nawa ye kum. Tey bong heyu senéen ke hol ye tótól du bè yóm kuy keblay yó. ⁸ Sundu mon dé ke dóku yu bemlay. Okóm yó dé gónóhu tmulón du kuy yóm kul kesegeduf bemlay yó kem dumu tau anì wen lan ye hegefan du se kuy ke tahu duhen yóm kuy kbong nawa. ⁹ Deng tngón ye se yóm alì nawahen tekuy yóm gónó tekuy mogot Jisas Krays. Gloken gemtagak yóm tey kun kendengen bè longit na a baling tau élél te tonok. Yó gónón mò du yóm yó anì baling wen kendengen tekuy mlan béléen. ¹⁰ Ni se dou udél ebélê ye bè yóm keblay ye. Tey hyu ke henlós ye yóm deng nbut ye bè halay gna. Igoen yu se hol tanay tau semtifun filak mò blay, lelen yu he mbut du yóm kestóbóng yó. ¹¹ Duhen yó, hol tódô henlel ye mò du efet deng ye. Bè yóm tehe kbut ye du, tey kinì nawa ye mò du. Yake bud lómón yó se kekinì nawa ye hemdeng du. Tódô blay ye yóm gbek blay ye. ¹² Abay se ke lemwót bè but blutut ye yóm keblay ye, hligal du Dwata. Là kô nan e ketes du bélê ye yóm là gebek ye du, okóm yó dé kóyóen ke hol blay ye yóm són kuy gbek. ¹³ Là hendemu du ke ngang ye bemlay efet ye mom élél, ne baling mahil klowil yó kem tau benlay ye. ¹⁴ Okóm yó dé hyu ke sket kuy wen gónó ye ma. Yó dé kmò ye du, lemwót yóm kuy gónô wen nim kmoen ni, yake tóbóng ye yó kem tau élél. Déke yu se angat wen gónón élél bè hulin kdaw, gbek le bud tmóbóng kuy. Ke ni se nmò ye, tódô sket kuy wen gónó ye ma. ¹⁵ Lómón yóm monen bè Sulat Dwata, yóm monen, “Yóm tau alì bong sentifunen, là se kô wen lukasen. Ne yóm tau udì nwahen, tódô geblà béléen.” ¹⁶ Sotu gónóhu dmóyón ke Dwata, duhen bè yóm alì kegdufen ke Taytus mò fen tmóbóng kuy. Senged bè kum kehedem se yóm kun kehedem ebélê ye. ¹⁷ Tey ktimu óyóen yóm kungolen du yóm tô bud khulék me du edyó bélê ye. Yóm gu laan me là deng mon du mò du, deng eles gegna ne yóm kun kóyô mulék edyó. ¹⁸ Wen yóm sotu dumu tekuy hemtahu bè ni hmung me ke Taytus edyó. Tey tótól boluyen nim tau ni bè yóm ktoloken yóm Tulón Hyu bè yó kem dumu tekuy hemtahu bè ket benwu. ¹⁹ Lelen du he deng nélék yó kem dumuhen hemtahu mò mung kum sok eted me yóm filak angat blay tekuy ebè yó kem dumu tekuy élél. Bè nim nmò tekuy ni mò gónón megdóyón yóm gónó tekuy mogot, ne mò gónó me hton du yóm óyô me tmóbóng se kum. ²⁰ Yó gónó me móyô ke wen tau mung kum, là móyô me du ke wen sanil le kum bè yóm kmò kogot me du yóm tey filak blay le yó. ²¹ Kóyô me ke laen dù gónón gemsanil kum yóm gónó tekuy mogot, dalang se kem tau, hyu ke laen dù sanil le kum se kul. ²² Bè yóm kógów le Taytus edyó, bud wen hmung me kul, yóm sotu dumu tekuy hemtahu. Deng hónô hentahu me ne nim tau ni, ne són nawa tmóbóng ton me béléen. Milud he kóyóen tmóbóng nim kmoen ni abay se tey mgel nawahen kuy. ²³ Bong ke Taytus se kun, du se sotu tau mò gel dumuhu stóbóng bè yóm gel któbóngu kuy. Bong bè ni kem dumu tau mung ke Taytus, lu se mò henged lówó ni kem dumu ye hemtahu bè ket benwu bè ni, ne tey minggel kegdóyón Krays bélê le. ²⁴ Kesok le kól dyó, hol hegefan ye bélê le sen yóm kbong nawa ye kul. Ke ni se nemò ye, kaem enget gungol yó he kem dumu tekuy hemtahu fen hógów kul, ne enget gfan bélê le senéen yóm ketahuhen yóm gel kdóyón me kuy lem blóng le.