¹ Tu se koni, kem dumuhu sogot nawa, yóm deng fasad Dwata tekuy. Duhen yó, gotu kó tekuy ne yóm kdéen sidek gel nmò tekuy, dalang se yóm kdéen sidek gel hendem tekuy anì laen dù bud bolen yóm gel kmò tekuy. Yó gónó tekuy mò du nim ni anì hol gefan yóm klikò tekuy ke Dwata. ^{4 2} Bê ye abay kenogol nawa mi dé. Laen deng tau ke wen sidek nemò me béléen, duhen ke wen tau deng senbeweg me kehetahuhen, duhen ke deng wen tau lenugi me, laen duen. ³ Sundu yó gónóhu mon du nim ni ke udélu temdok kuy. Là kô yó du. Deng tehe gel tulónu kuy se yóm tey kogot nawa me bélê ye. Bè yóm klawi me mowil, anien he ke deng me matay, là kóen mkó yóm nawa me ebélê ye. 4 Tey deng megel nawahu du yóm kehetahu ye, botong gel dóyónu yu bè kem dumu tau. Baluen he ke wen gónó me gel glayam, sana tey kgel nawahu. Là kô gbeku hmingón du yóm tey kligalu. ⁵ Balù yóm deng kkól me bè prubinsya Masdunya, là kóen menek kegenóm me du. Balù nô gónó me nô, sal gel wen sembeweg kum. Sal gel wen dumu tau mit kum segeled mon, lelen dê tnafa nawa me. ⁶ Okóm yóm Dwata, tey hulung hemyu nawa yóm tau sidek keblat nawahen. ⁷ Yó se gónón hemyu nawa me se kum bè yóm kkól Taytus.  Là són du bè yóm kkólen yó gónón hyu nawa me, okóm bè yóm dê tulónen kum mò gónón hyu nawan ebélê ye se kun. Tulónen kum yóm tey khahù ye do, ne yóm deng kehegsel ye, ne yóm tey kfi ye do. Ne bè yó se gónón alì temnù yóm kligalu. ⁸ Bè yóm tehe gna sulatu edyó bélê ye, tey sidek se kegebeng lem ye du, okóm là genselu du. Bè buten, nan malù sidek kegenómu du yóm kegebeng lem ye yó. ⁹ Okóm ni kmoen ni, tey wen kligalu. Là kô yó du gónóhu hligal ke bè tum tehe kegebeng lem ye, okóm yó gónóhu hligal bè yóm deng keteles ye yóm kemò ye lemwót bè yóm deng kegebeng lem ye yó. Tódô lemwót bè Dwata yóm yó. Yó gónóm mon, laen dù gónón sidek bélê ye yóm gena sulatu yó. ¹⁰ Tey bong heyu se yóm kegebeng lem lemwót bè Dwata, abay se niten tekuy hegesel anì guta tekuy yóm klowil laen dù sónen. Laen kô dù gónó tekuy gsel du yóm yó. Okóm yóm kul keblat nawa yó kem tau là hemtahuhen, mom niten lu elem hatay laen dù sónen. ¹¹ Tey tilob uléken yóm tehe kegbeng lem ye yó, abay se tódô lemwót bè Dwata. Ngem yóm alì kehedem ye du yóm là tedengen lem blóng ye, ne yóm alì kekbê ye du yóm sidek nmò yóm sotu tau bè yó. Tey keklit ye du yóm nmoen, ne sidek ktafa nawa ye du snéen. Són hendem ye ke mulék hyu nawahu ebélê ye, ne tey kfi ye do. Ne tey ktafak ye du yóm tau mò sidek lem blóng ye. Bè ni kem nmò ye ni koni deng gónó ye hegfan yóm klaen dù bud kuy du ne yóm kun nmò yóm tau yó. ¹² Duhen yó, bè yóm gna sulat hwitu ebélê ye, là olohen yóm tau mò sidek hendemu, duhen ke olon yóm tau gónón mò du. Okóm yó dé gónóhu smulat du mò gónón gfan yóm tahu nawa ye ebélê me. Tódô ton Dwata yóm hol ktahuhen nim monu ni. ¹³ Yó gónóm mon, bong hyu nawa me ne nim kmoen ni. Lel me gbót hligal bè yóm kun kligal Taytus, abay se là bud tnafa nawahen kuy se kun. ¹⁴ Deng tehe gel dóyónu yu béléen snéen dou teganay, ne tahu se, bud tonen bélê ye se kun. Sako tahu se yóm tehe gel tulón me kuy teganay, ne hol lómón yó se yóm deng tulónu ke Taytus, sako tahu. ¹⁵ Tey tendo ketenù yóm kbong nawahen kuy bè yóm kegebelen bè nawahen yóm tey kimón ye du yóm hloloen kuy, ne yóm tey khódó ye du, igoen tolo wen yóm tnafa nawa ye. ¹⁶ Béléu do, tey kligalu nim kmoen ni, abay se deng baling bud mgel nawahu kuy ne bè yóm kehetahu ye.