¹ Yó se gónóhu là dog dohò bè yóm tô kógówu ediyó, abay se deng hendemu là móyóe ke bud sidek kegenóm ye du lómón yóm gna kógówu ediyó. ² Ke heblatu nawa ye, bang tô kligalu se dou du? Abay se bélê ye gónón wen kligalu. ³ Yó se gónóhu tehe smulat du yóm gna sulatu ebélê ye, abay se kóyóu ke eles kó ye yóm sidek nmò ye anì là sidek kegnómu du sok bud nauyu yu. Abay se bélê ye gónón wen kligalu. Deng eles tódô tngónu ke hligale lem blóng ye, hligal ye senéen kuy. ⁴ Botonge mkik bè yóm ksulatu du yóm gna sulatu ebélê ye, bà mon se yóm tey alì sidek kegbeng lemu. Là kô yó du gónóhu hemwit edyó yóm sulatu ke mò udélu tô hemblat nawa ye. Okóm yó dé gónóhu hemwit du ebélê ye anì hol dilô ye yóm tey kbong nawahu kuy. ⁵ Yóm tau mò sidek lem blóng ye bè yó, là kô ou du senbewegen, yakem yu se, yu kem tau hemtahu bè yó, wen se bélê ye senbewegen. Yó gónóhu mon du yóm monu yó anì là katen sidek kegnómen du lemwót bè yóm udélu. ⁶ Tey dê bélê ye deng gbót temafak du yóm tau yó. Geblaen yó ne. ⁷ Tódô henifót ye ne, ne ten-gel ye nawahen se kun anì là gehelós sidek kegnómen du, kô mom lana kehetahuhen. ⁸ Hol kóyóu bélê ye ke hegefan ye béléen yóm kbong nawa ye du. ⁹ Bè yóm gna ksulatu ebélê ye mò gónóhu tmilów kuy ke deng ye hol tahu hulung gel mimón du yóm hlolou kuy. ¹⁰ Ke deng hnifót ye salà yóm tau yó, hnifótu snéen do. Bè yóm kehlifótu du, ke wen tô hnifótu se dou, tódô nmou bè solu Krays anì bud baling heyu lem blóng ye. ¹¹ Tódô hnifót tekuy ne anì laen dù gmoen bélê tekuy Seitan, abay se tengón tekuy yóm tey kun khulung gel mò atul. ¹² Bè yóm kkólu bè syudad Truas na a tmulón du yóm Tulón Hyu gbak ebè Krays, deng sana wen lan nmò yóm gónó tekuy mogot anì nmou yóm hmoen dou bè yó. ¹³ Okóm là kóen menek nawahu du, abay se tafa nawahu ke Taytus, yóm sotu dumu tekuy setwoli, là tonu du bè yóm kdaw yó. Yó gónóm mon, olohu mbal kul yó kem tau bè yó, ominu hlós hmebel ke Taytus bè prubinsya Masdunya. ¹⁴ Okóm tey kdóyónu ke Dwata, abay se lemwót bè yóm deng kessotu me bè Krays, hol lómón ke mi se yó kem tau deng nfunen bè yóm tehe katuen. Duhen mi se yóm tau hol nfunen mò gel htonen bè dumu tau. Ne hlan Dwata bélê me yóm kehbólen du bè klamangen yóm kun kmò Krays. Yóm tulón nwit me yó, hol lómón ke yóm hboo alì minggel boohen. ¹⁵ Hol lómón ke tekuy se yóm boo alì minggel deng hbel Krays ebè Dwata. Mbel ebè yó kem tau deng gewà gu lem hatay, ne bud mbel ebè yó kem tau tolo golu elem hatay. ¹⁶ Bè tu kem tau tolo golu elem hatay, lómó kul kungef du, hol lómón ke boo sidek mò gónó le matay. Okóm bè yó kem tau deng gewà, lómón kul kungef du, hol lómón ke boo alì minggel mò gónó le mowil. Nim nmò me ni, laen kô dù tau gembek mò du ke tódô óyóen. ¹⁷ Bélê me kum, là kô me mkél bè yó kem dumu tau tmolok Udél Dwata, són filak gel hnebel le. Tey dê se kem tau mò du yóm yó. Okóm lemwót bè yóm khógów Dwata kum, tey gulit kmò me du yóm hmoen kum, hol lómón ke nô me bè soluhen bè yóm gel ktolok me, yakà deng me tóbóng lówó Krays.