¹ Ni se geteluhu dulék tô mauy kuy. Ke angat wen hekukum ye dou, tódô lolou yóm tehe hesulat Dwata, yóm monen, “Song hentahuhem yóm duón le yóm sotu tau ke wen lewu duhen ke tlu tau yóm fen hemtahu du.” i ² Yu kem tau deng tehe gel mò sidek teganay, ne yó kem dumu tau bè yó, ni wen eles tulónu kuy. Deng tehe eles tulónu kuy teganay bè yóm gewuhu dulék bud mauy kuy, bede bud nulitu bélê ye nim ni gu laan tekuy là deng bud ston. Yó udélu bélê ye, bè yóm bud kekólu bè yó, laen kô dù tau mò sidek ke là angat tnafaku du. ³ Wen ilô henebel ye kun mò gónó ye dmilô du yóm khudél Krays dou. Angat ton ye he yóm hnebel ye yó bè yóm ktafaku kuy. Angat gnóm ye yóm tey klóbô Krays. Angat hegefanen lem blóng ye yóm tey kefasangen. ⁴ Bè yóm tehe kehatay le du, lómón ke laen kô dù kefasangen, okóm lemwót bè yóm kun kefasang Dwata, yó gónón bud mowil. Bè yóm deng kesesotu me béléen, gbót me se kum bè yóm là kfasangen. Okóm bè yóm angat kógów me edyó bélê ye, bud me gbót bè yóm tey kefasang Dwata hlanen bè yóm kun klowil Krays. ⁵ Yake hol heneg ye dé yóm kuy kmò ktau ke deng ye tahu hemtahu. Deng tahu nô bélê ye kô Jisas Krays? Ke là nóen bélê ye, kéng ye yóm kehetahu ye. ⁶ Ke deng ye tahu hemtahu, kaem tódô tengón ye yóm kewóten bè Krays yóm nmò me. ⁷ Hol tendo gel hni me bè Dwata he anì laen dù sidek nmò ye. Là yó du hni me ke hol dilô tau yóm kewóten bè Dwata yóm gel nmò me. Okóm yó dé gel hni me anì hol tedeng kmò ye, baluen ke henkéng le yóm kewóten bè Dwata yóm nemò me ni. ⁸ Ke tedeng nmò ye, là kô hegefan me du hekawang yóm kefasang blay Krays kum. Són gónó me hegefan du, són bè yó kem tau smonol du. ⁹ Mem heyu nawa me gemnóm du ke wen gónó me heluda, syan ke kemgis ye yó dum kuy. Duhen yó, yó gel heni me bélê ye bè Dwata anì baling ye gulit. ¹⁰ Yó gónóhu gena hemwit sulat ebélê ye ni gu laan tekuy là deng bud ston anì laen dù gónóhu tmafak kuy soke kól dyó lem blóng ye. Yó hol muhen yóm kefasang blay Krays dou mò gónóhu tmóbóng kuy bè kehetahu ye. Sundu yó du muhen ke mò gónóhu hemsidek kuy. ¹¹ Duhen yó, kem dumuhu setwoli, hol ye gel hegulit. Hol henungol ye ni kem hlauhu kuy ni. Hol sensotu ye kut nawa ye. Bê ye bud hesgólól kehedem ye. Ke ni se nmò ye, beyen bélê ye Dwata. Du se gónón lemwót yóm kesebong nawa ne yóm kenek nawa. ¹² Sok ye gel stifun yóm kdê ye bè yó, hol ye gel sfódó. ¹³ Tódô kdê ni kem tau hemtahu bè ni, tey gel kólóm le kuy. ¹⁴ Yó hem gónó tekuy mogot Jisas Krays hol tendo tmóbóng kuy, ne todo gefan bélê ye he yóm kebong nawa Dwata kuy, ne yóm knóen bélê ye yóm Tulus Dwata.