¹ Heyu nawahu ke là temakas ye hemungol du nim tulónu kuy ni, baluen ke lómón tóe kudél tau nungel. Okóm na ye na hol henbala kut dé. ² Yó gónóhu tmulón du kuy nim ni, abay se sidek kélés nawahu kuy, hol lómón yóm kun kélés nawa kuy Dwata. Yó gónóhu e hmingón kuy, lómón ke sawang ye libun deng fen lenintihu ebè yóm sotu tau, duhen Krays. ³ Okóm tey gel ketafa nawahu kuy. Tnafa nawahu kô gsukat ye bè yóm tolok sekban, ne baling knogol nawa ye Krays, kô là nóen béléen nawa ye. Déke mkél ye ke Iba, gsukat bè alì kehulungen mangkal yóm Seitan bè yóm tehe kehelinguhen bè ulal. ⁴ Yó gónóhu mon du yóm yó, abay se là kô kenbê ye du yóm tau sut lem blóng ye, ne tólóng se yóm tulónen kuy gbak ebè Jisas. Là sengeden bè yóm kum ktulón du. Ne yóm tulus kul gel tulón, tey stólóng bè yóm kun Tulus Dwata. Ne yóm kul tulón gel nwit yó, tey stólóng bè yóm Tulón Hyu kum gel nwit. ⁵ Bè dou kehedem du, là kóe na a glaan bélê le yó kem tau lembù mógów, yóm alì hegeta ye bè yó lem blóng ye. ⁶ Baluen ke là hole hulung mudél, okóm là kóen olo udì se ketngónu du yóm ktahuhen. Deng hónô dilô ye se nim monu ni bè yóm klawi me nô lem blóng ye. ⁷ Klawihu deng gel tmolok lem blóng ye yóm Tulón Hyu lemwót bè Dwata, là kóe na a deng mni ofol bélê ye, balù slad. Denge mom heglaan bélê ye anì wen lanu hegeta kuy. Yó kô yóm salau bélê ye? ⁸ Yóm tehe knóu lem blóng ye ekni, sal gel wen se tóbóng le dou yó kem tau hemtahu bè dumu benwu mò lowilu. Tódô henmóyóu se yóm tóbóng le dou yó anì wen lanu gemtóbóng kuy. ⁹ Balù yóm tehe kwen gónóhu élél bè yóm tehe knóu lem blóng ye, là kô dog tulónu du kuy. Mom yó kem dumuhu hemtahu lemwót gu bè prubinsya Masdunya lemowil do. Là kóe htóbóng bélê ye bè yóm kdaw yó, ne là se kóe htóbóng bélê ye elem hulin kdaw snéen. ¹⁰ Hol lómón ktahuhen yóm kun udél Krays yóm ktahu nim monu ni, ne là kóen bud mulék elem baku snéen. Là kóe angat hlowil bélê ye, yu kem tau bè klamangen prubinsya Akiya. ¹¹ Là kô yó du gónóhu mon du nim ni ke udì nawahu kuy. Tódô tngón Dwata se yóm tey kbong nawahu kuy. ¹² Yó gónóhu là hlowil bélê ye, wen yó kem tau tódô lembù mógów nô bélê ye bè yó anì là wen gónó le hsenged yóm kul nemò bè yóm kum mò gónó le hton salù. ¹³ Là kô le tau tahu hógów Krays, enget tau le tódô lembù mógów. Yóm kul nmò yó, mò gónó le smukat kuy, hlingu le tau hógów Krays. ¹⁴ Là hentaw tekuy du yóm kul nmò yó. Ngem sem Seitan du kun, gel hlingu bè hógów Dwata alì lemayag gu bè longit. ¹⁵ Yó gónóm mon, là hentaw tekuy du bè yó kem tau Seitan ke helingu le bè yó kem tau Dwata deng tedeng kmò le. Kaem bè yóm hol són kdaw, angat guta le balaen yóm nmò le yó. ¹⁶ Bud nulitu bélê ye, bê ye abay hendem ke tauhe nungel. Okóm baluen ke yó se hol hendem ye, na ye tódô bayà ou kun mudél anì naw mudél heklabak se do. ¹⁷ Bè nim kudélu keheklabak ni, là lómón du yóm kun kudél yóm gónó tekuy mogot. Hol lómó kudélu heklabak hol lómón kudél yóm tau nungel. ¹⁸ Igoen tey dê tau gel heklabak sok wen gendeng le, naw tilów nmò se dou dé kun. ¹⁹ Lemwót bè yóm kehulung ye hedem se kuy, gbek ye hembala du yóm tau nungel. ²⁰ Ngem yó dé botong kehebala ye, tódô kem nimón ye yóm tau ge medók kuy. Baluen ke wen heni le bélê ye, tódô blay ye kul. Baluen ke gholot ye bélê le, duhen ke henbong le yu, duhen ke tenfê le yu, tódô kem henbala ye snéen. ²¹ Yó se gónó me myak bélê ye ni, abay se là mlos me mò du kum yóm kul nmò yó bè yóm tehe knô me lem blóng ye. Okóm ke sok wen gónó le heklabak yó kem tau yó, wen se gónóhu heklabak se dou. Hol kudél tau nungel nim kudélu ni. ²² Ke gel mon yó kem tau heklabak yó, tau le Hibru, bude tau Hibru se dou. Ke mon le tau le Israél, bude tau Israél se dou. Ke mon le semfu le gu bè Abraham, ou senéen fù Abraham. ²³ Ke gel mon le tau le tóbóng lówó Krays se kul, mom ou ne tau tóbóng lówó hol gulit senta le. Ni se udél yóm tau lengel mata nim udélu ni. Là kô na le e gatù dou bè yóm alì kmou nmò bè Krays. Deng hilu duléku geblanggù, ne deng hilu duléken ne wen tau mfes dou ne tô hmatay do. ²⁴ Deng limu dulék le ne mfes dou yó kem Ju. Ket kfes le do, na tlu folò syóm duléken gdamù tahu fes. ²⁵ Deng tlu dulék le se mfes dou yó kem tau Rom. Deng suléku se tô matay bè yóm kestudà le dou botu. Deng tlu duléku se tô matay bè mohin lanen gbà yóm owong snakayu. Deng gfau se tódô hetów te mohin sendaw ne suloy buteng. ²⁶ Bè yóm gel kógówu, deng gfau se mifal du yóm tey dunuk él. Deng gfau se tau hmamfas. Ne tey deng dê gfau bè yó kem hmohon do, wen se bélê le dumuhu tau Ju, wen se là Ju du. Deng wen se gfau bè yó kem syudad, ne deng wen se gfau gu lem yóm benwu là hyu menwu du, ne deng wen se gfau gu te mohin, ne deng wen se gfau bè yó kem tau hlingón tau hemtahu. ²⁷ Tey gel kmou nmò efet sidek klitegu. Tey dê duléku ne là gel gtungô. Dê duléken se sidek kbitilu ne sidek kleengu. Tey dê duléken se laen dù gónóhu ma mò kenu, ne laen se dù bud gónóhu e mefet, lelen laen dù hol gel nesu. ²⁸ Lelen yó he, ket kdawu tmafa nawa yó kem tau deng hemtahu bè ket benwu. ²⁹ Ke wen bélê le lunog kehetahuhen, kéng tô ou se gemnóm du. Ke wen tau hebtang le elem salà, ya tey sidek kegenómu du se dou. ³⁰ Ke nawahu heklabak, mom heyu nawahu heklabak bè yóm gónóhu lunog. ³¹ Tengón Dwata ke kéngu nim deng tulónu kuy ni. Du se hol Dwata yóm gónó tekuy mogot Jisas Krays, ne bud Maen snéen. Tey laen sónen yóm kdóyónu ke Dwata. ³² Bè yóm tehe knóu bè syudad Damaskus, tô hekefóen ou yóm gubérnor bè yó, yóm tau genlal bè yóm tau hol geta bélê le boluyen Aritas. Glok nim gubérnor ni mdók yó kem tau gel mentey bè ket bak tikeb bè yóm beng hilol yóm syudad le anì kenfô le ou soke hewà. ³³ Okóm wen tau tmóbóng dou, yó gónóhu gewà bè yó. Tek heyón le ou lem kalat, ne hloyol le o gu tembó beng hulé gu ta yóm tey beng geta yóm benwu yó.