¹ Bong bè yóm deng snólók ye bè yóm ken deng dsù bè dwata kéng, ni se balau du. Tahu se yóm mon le, “Kdê tekuy se temngón du nim snólók le ni.” Ke lómón yó se kmoen, hol ten-gama ye, kô niten yu heklabak yóm ketngón ye yó. Okóm gel mlan bè yóm kbong nawa tekuy kem dumu tekuy hemtahu gónó tekuy temgel kul bè kehtahu le. ² Yóm tau ke hendemen deng wen ne tngónen, deng duhen yó se yóm tau là dengen ket du he ketngónen. ³ Okóm ke bong nawahen ke Dwata yóm tau, yó se yóm tau hol dilô Dwata. ⁴ Duhen yó, bè yóm snólók ye ke heyu meken du yóm ken deng dsù bè dwata kéng ke là, ni se balau du. Deng hónô tngón tekuy se là kóen tahu yóm dwata kéng, ne deng tngón tekuy senéen tek sotu se yóm hol tahu Dwata. ⁵ Wen se tau gel mon du, wen kem dwata nô bè longit, ne wen se nô te tonok, ne baluen ke hilu kwen le ni kem dwata mon le ni, ne yó kem dumu gónó le mogot, ⁶ okóm bélê tekuy, tek sotu yóm Dwata duhen yóm Mà tekuy deng dmimun yóm kentihen, ne du se hol lolò tekuy. Ne tek sotu se yóm gónó tekuy mogot, duhen Jisas Krays. Deng hlan Dwata tahen yóm kedlimunen yóm kentihen, ne bud béléen se gónón lemwót yóm klowil tekuy. ⁷ Okóm nim ktahuhen ni, là kô kdéen du tau temngón du. Tey mgel bè kem dumu tau ke tô kó le yóm sana kul adat bè kehetahu le yóm dwata kéng. Ne ke gbót le mken yóm ken deng dsù le ebéléen, ofo kul hemdem du ke deng wen tahu funen. Lemwót bè yóm tolo kegewu kehedem le du, là mólós kegenóm le du ke ken le. ⁸ Okóm là kô bè ken du gónó kuy gloni bè Dwata. Laen dù gónón stólóng keton Dwata tekuy ke ken tekuy yóm ken yó duhen ke là. ⁹ Okóm hol ten-gama ye. Anien se ke là bud ye gfét du se kuy, wen yó kem dumu ye tolo lufi kehetahu le, déke btang le ke lolò le yóm nmò ye yó. ¹⁰ Mò kmoen se, lemwót bè yóm deng ketengón tekuy yóm ketahuhen, fen tekuy meken lem gónô yóm dwata kéng. Ke wen tau tolo megewu kehedemen du mton tekuy, déke gbót mken se kun yóm ken deng dsù le bè dwata kéng, igoen tolo megewu kehedemen du. ¹¹ Duhen yó, lemwót bè yóm deng ketngón tekuy du, angat megtuled nim tau tolo lufi kehetahuhen ni, igoen du se sotu dumu tekuy hemtahu, yóm sotu tau gónó Krays matay. ¹² Ke lómón yó kmò tekuy, deng wen salà tekuy bè Krays ne, lanen wen salà tekuy bè yóm dumu tekuy hemtahu yó koni. Igoen tolo megewu kehedemen du, igò tekuy sembeweg du. ¹³ Duhen yó, ke lemwót bè yóm gel kutónu gónón lemwót btang yóm sotu dumuhu hemtahu, tumù nawahu là dog kem mutón efet katayu, anì laen dù lanu hebetang du elem salà yóm dumuhu hemtahu.