¹ Ne ni, kem dumuhu setwoli, bè yóm sotu snólók ye bè yóm ksulat ye béléu bè yóm kenhulung gel blay yóm Tulus Dwata, kóyóu ke hol tngón ye yóm ktahuhen. ² Tngón ye se yóm kegen ye là deng temngón ke Dwata, tey kegtondo ye bè yóm gel kgalak ye bè yó kem dwata kéng, yó kem dwata là mowilen. ³ Yó gónóm mon, kóyóu ke hol tngón ye ke Tulus Dwata malak kuy duhen ke là. Yó ilóen yóm tau galak bè Tulus Dwata, là kô gbeken hemtolo ke Jisas. Ne sotuhen, là kô gbeken mon du, “Jisas yóm hol gónóhu mogot” ke là lemwóten bè yóm Tulus Dwata. ⁴ Ne bè yó kem kenhulung blay Dwata tekuy, tey dê kayen. Okóm tek sotu se gónón hlan du, són bè Tulusen. ⁵ Tey dê kayen yóm nmò hmoen tekuy, okóm tek sotu se gónó tekuy e mò du, són ebè yóm gónó tekuy mogot. ⁶ Tey dê se yóm kenhulung nmò tekuy, okóm tek sotu se yóm Dwata bemlay tekuy kegbek mò du, ket tekuy ne sotu. ⁷ Wen gónón gfan bè ket tau yóm knóen béléen yóm Tulus Dwata mò gónón tmóbóng yóm kdéen tau hemtahu. ⁸ Wen se yóm tau tmolok benlay Tulus Dwata ketngón. Bud tólóng se tau tmolok benlayen khulung gmileb du yóm ktahuhen. ⁹ Ne wen se yóm tau benlay Tulus Dwata khulung smalig ke Dwata, ne wen se yóm tau benlayen ktued hkó des. ¹⁰ Ne wen se yóm tau benlay Tulus Dwata kfasang mò yó kem hentaw ton. Ne wen se tau benlayen khulung tmugod yóm Udél Dwata. Bud wen se benlayen khulung milô yóm lemwót bè Tulus Dwata duhen ke là. Ne wen se benlayen khulung tódô mudél ebè Dwata bè tólóng udél baluen ke là tngónen du lanen. Ne wen se tau benlayen khulung bud tmugod du lanen yóm udél yó. ¹¹ Yóm kdéen kenhulung bnoluyu yó koni, tek sónen yóm Tulus Dwata gónón gu lemwót. Tódô lemwót bè kun kóyô yóm gel blayen bè ket tau. ¹² Ke hningónu yó kem tau hemtahu bè Krays, hol lómón ke lówó tau. Tek sotu lówóhen, okóm tey dê nô du. ¹³ Lómón yó se yóm kdê tekuy lemolò ke Krays. Bè yóm tehe kehbabtays tekuy, henbalingen tekuy sotu lówó yóm Tulus Dwata, kihu ke Ju duhen ke là Ju le, ke tau klifen duhen là klifen le. Liman ke tek sotu lówó tekuy, abay se tek sotu yóm Tulus Dwata tendo nô bélê tekuy. ¹⁴ Yóm lówó tau, là teken sotu nô du, tey dê. ¹⁵ Mò kmoen ke mon yóm ti, “Là kóe gomong bè lówó dou, abay se là ou du henmù.” Olon beyen tódô monen yóm yó, là kô gbeken htólóng. ¹⁶ Senged se ke mon yóm klingu, “Là kóe gomong bè lówó dou, abay se là ou du yóm mata.” Olon beyen mon du yóm yó, là kô gbeken tódô htólóng. ¹⁷ Mò kmoen yóm lówó tau ke tódô hono mata? Gbeken mungol kô ke là wen klinguhen? Ne mò kmoen ke tódô hono klingu yóm lówó tau, mò tô kungefen se ke là wen ilungen? ¹⁸ Okóm là kô yó du kmoen. Deng nmò Dwata yóm kun atul bè kmoen yóm lówó. Dê suen du, ne ket yóm suen du, sal stólóng muhen kul. ¹⁹ Là kô bud lówó du ne ke tódô hono mata, duhen ke tódô hono klingu. ²⁰ Bè ktahuhen tek sotu yóm lówó tau, okóm tey dê yóm sù Dwata du. ²¹ Yó gónóm mon, là kô gbek mata mon du mò yóm sigel, “Laen dù muhu kóm.” Ne là gbek kulu mon du mò ke ti, “Laen dù muhu kóm.” ²² Bè ktahuhen, yó kem laen hol genbek le bè kton tekuy kul, yó se yó kem bong mu tekuy du. ²³ Ne bud wen se bè lówó tekuy bè kehedem tekuy du laen hol muhen, kaem yó se yóm gel sen-gyok tekuy. Ne bud wen se nô bè lówó tau là hyu hegfan du, kaem yó se alì gel hen-glol nnes tekuy anì laen dù kenyak tekuy. ²⁴ Okóm là nmò tekuy du yóm yó bè yó kem tilob gel nô bè lówó tekuy. Yó se kmò Dwata du yóm lówó tau anì hol sen-gifà tekuy yó kem kenyak tekuy senta yóm là gel kenyak tekuy du. ²⁵ Ne duhen yó, yóm kdéen nô bè lówó tau, laen kô dù mtukul bong muhen bélê le. Ni se kmò Dwata du anì stóbóng le baluen ke là senged le. ²⁶ Ke wen des gnómen yóm sotu nô bè lówó tekuy, tódô kdê le gemnóm du snéen. Senged nóm ke dóyón le yóm sotuhen, tódô kdê le se gemnóm du yóm kligalen. ²⁷ Na, deng tekuy gotu baling kun lówó Krays, bede ket tekuy na sotu, sal stólóng muhen tekuy. ²⁸ Bè yóm kdê tekuy deng hemtahu, wen yóm hmò Dwata tekuy, yóm ket tekuy na sotu. Yóm hol tanayen, néléken yó kem tau mò gel hógówen. Gewuhen, wen se kem tau néléken mò gel tugoden. Getluhen, wen se tau néléken mò gel tmolok yóm kun udél. Ne wen se benlayen kegbek mò du yóm hentaw ton. Ne wen se benlayen ktued hkó des, ne tólóng se benlayen khulung tmóbóng kem dumun. Ne wen se benlayen khulung malak kem dumun. Ne tólóng se benlayen khulung tódô mudél ebéléen bè tólóng udél là deng kun tngón du. ²⁹ Là kdéen du se yóm tehe nélék Jisas ke mò gel hógówen, duhen ke mò tugoden, duhen ke mò gel tmolok. Ne là se kdê le du yóm wen kfasangen mò du yóm hentaw ton, ³⁰ duhen ke hkó des, duhen ke hulung mudél ebéléen bè tólóng udél, duhen ke hulung gmileb du lanen yóm udél le yó. ³¹ Duhen yó, bè kdê yó kem kenhulung gel blay yóm Tulus Dwata, hol sen-galu tekuy dé yóm kenhulung mò gónó tekuy tmóbóng kem dumu tekuy. Okóm yó hol bong muhen bè kdéen, duhen yóm kesbong nawa.