¹ Wen tô hegbelu bè nawa ye, kem dumuhu setwoli, lemwót bè yóm kul kmò yó kem tehe fù me nalak Musis teganay. Bè yóm tehe kógów le, gotu le hegolung bè yóm lobun hógów Dwata mò gónó le galak. Bè yóm kekól le bè yóm Mohin Hulô, gotu le se mifal du, ne laen se dù gfà le. ² Lemwót bè yóm klolò le yóm lobun ne bè tum kifal le yóm mohin, hol lómón ke deng le gotu hebabtays mò tau lemolò ke Musis. ³ Ne gotu le se gbót meken du yóm ken blay Dwata kul, ne ninum le se yóm él blayen kul. Gotu le se minum du yóm él hsut Dwata gu lem botu. ⁴ Yóm botu yó, hnigaden Krays, ne là se kóen skó yóm tendo kmungen kul bè yóm tehe kógów le yó. ⁵ Ewenem he, là kóen hol wen bélê le gónó Dwata hligal. Yó gónóm mon, tódô le kem gotu matay bè lan le mógów lem yóm benwu là hyu menwu du. ⁶ Bè yóm gbunù le yó mò gónó tekuy eles hol temgama anì là sen-galu tekuy du mò du yóm sidek, lómón yóm kul ekni. ⁷ Hol bê tekuy abay hemtahu bè yóm dwata kéng. Wen se bélê le tehe mò du ekni, lómón yóm monen bè Sulat Dwata, yóm monen, “Gotu le stifun mken, ne omin le gotu hlengel ne hbusaw mò samuk.” j ⁸ Hol bê tekuy abay mò samuk. Wen se bélê le tehe mò du ekni, ya tey ktafak Dwata kul. Botong lewu folò tlu libu kwen le segeng hnatay Dwata bè yóm kdaw yó. ⁹ Ne sotuhen, hol bê te abay tnilów yóm gónó tekuy mogot. Wen se bélê le tehe mò du ekni, ne gotu le matay lan ulal mékét kul. ¹⁰ Ne hol bê tekuy abay gel semlón. Wen se bélê le gel mò du nim ni. Botong wen hógów Dwata gu bè longit mit hatay elem blóng le, ne gotu le matay yó kem tau semlón yó. ¹¹ Yóm gbunù le yó mò gónó tekuy dmalang. Yó gónó Dwata hsulat du yóm yó mò gónó tekuy eles hol temgama, abay se móyónen hto ne yóm hol són kdaw. ¹² Duhen yó, ke yó hendem yóm sotu tau, là mahilen btang elem sindil, yake hol ten-gamahen, kô wen gónón btang. ¹³ Laen kô dù tilów sut ke là deng gnóm kem dumu tau du. Okóm tey gsalig yóm Dwata, là kô bayaen du tekuy yóm là gbek tekuy du. Bè yóm ksuten bélê tekuy yóm tilów yó, angat hgel Dwata nawa tekuy anì gbek tekuy hembala du, ne sal gel wen lan nmoen mò lan tekuy gewà gu lemen. ¹⁴ Duhen yó, kem dumuhu sogot nawa, hol bê tekuy abay gmung bè yóm ktaba le bè yóm dwata kéng. ¹⁵ Tngónu se tey ye tau hulung hedem, gbek ye hemdem du lanen ni kem benkóhu ni. ¹⁶ Bè yóm gel kestifun tekuy na a hemtulón nawa yóm tehe katay Jisas bélê tekuy, wen se yóm gel ninum tekuy, ne gel dóyón tekuy Dwata bè yóm ninum yó. Bè yóm kinum tekuy du, deng wen kut du ne yóm kun litô Krays. Senged se kmò tekuy bè yóm mambang bè yóm kken tekuy du, deng wen kut du ne yóm kun lówó Krays. ¹⁷ Abay se tek sotu yóm mambang senkbéng tekuy yóm kdê tekuy. Bè yóm kken tekuy du yó, yó hnigaden yóm deng kessotu tekuy, balù yóm tey kwen tekuy, abay se tódô kdê tekuy gbót mken du yóm tek sotu mambang yó. ¹⁸ Bud sotuhen se, hendem ye yóm kul kmò yó kem tau Israél. Yó kem tau gbót mken bè yóm ken deng dsù le bè Dwata, deng gbót tmaba bè Dwata ne yóm tau yó. ¹⁹ Tedu se hol lanen nim toloku kuy ni? Yóm dwata kéng gónó le demsù yó, tódô kul lenbù nmò tdok. Ne yóm ken deng dsù le ebéléen yó, tódô ken laen dù tulusen. ²⁰ Kaem ebè busaw gónó le e demsù yó kem tau demsù bè dwata kéng. Sundu ebè yóm tahu Dwata du. Ne là kóe móyô ke gbót ye tmaba bè busaw. ²¹ Bélê tekuy kem tau hemtahu, ke deng tekuy gbót minum bè kun ninum yóm gónó tekuy mogot, là kô gbek tekuy du ke gbót tekuy minum bè kul ninum yó kem busaw. Ne ke deng tekuy gbót mken bè kun lemisa yóm gónó tekuy mogot, là kô gbek tekuy du ke gbót tekuy mken bè kul lemisa yó kem busaw. ²² Ke yó se tô nmò tekuy, deng hélés tekuy ne nawa yóm gónó tekuy mogot. Ofo tekuy mon du kô ke là gbeken tmafak tekuy? ²³ Gel mon yó kem dumu tau, mon le, “Gbek tekuy mò du kun balù kihu nóyô nmò tekuy.” Ya mo ktahuhen du yóm yó, okóm là kô kdéen du hyu bélê tekuy, duhen ke gónó tekuy gemtóbóng kem dumu tekuy bè kehtahu le. ²⁴ Là kóen hyu ke són ktes tekuy, són yóm hyu bélê tekuy. Okóm yó dé yóm hyu, ke hol ktes tekuy yóm gónón hyu bè kem dumu tekuy. ²⁵ Là kóen sidek ke ken ye yóm utón gel hbalù le lem fedyan. Okóm ke bemli ye, omin he ke dê snólók ye, anì là megewu kehedem ye du yóm utón gel benli ye. ²⁶ Abay se deng monen bè Sulat Dwata, monen, “Yó gónó tekuy mogot hono kun funen yóm klamangen benwu ne yóm kentihen nô tahen.” k ²⁷ Sotuhen, ke wen wè ye là hemtahuhen, ke tinoken yu mken bè gónóen, ke maan se nawa ye, na mken ye béléen sen. Balù kihu blayen kóm, gbóti mken. Omin he ke snólók ye, anì là megewu kehedem ye du yó kem ken ye bè yó. ²⁸ Okóm ke wen bè yó tmulón du kóm, monen, “Ó Wè, deng dsù bè dwata kéng nim utón ni.” Ke lómón yó monen, là hyuhen ke fen kenem se kóm. Hol hendemem yóm hyu béléen anì laen dù gónón sbeweg kehedemen. ²⁹ Ya mon ke sidek béléem kóm du, okóm béléen gónón sidek. Déke wen bélê ye hemdem du, kô monen, “Tek élél dou gónó là gemken utón lanen fen megewu kehedemen du kun yóm sotu tau. ³⁰ Ke deng dóyónu Dwata bè nim kenu ni, moen de ke dnelem le ou bè yóm kkenu du?” ³¹ Yó balau du yóm yó, nô kihu nmò tekuy, senged se bè kken tekuy duhen ke bè kinum tekuy, hol gel hlan tekuy bè yóm gónón megdóyón Dwata. ³² Hol bê tekuy abay nmò gónó le gseng ebè Dwata yó kem dumu tau, kihu ke Ju le duhen ke là Ju le, duhen ke yó kem dumu tekuy hemtahu bè Dwata. ³³ Hol dnalang ye dé yóm dou nmò. Yó gel sen-galuhu ke gel hegnahu yó kem dumuhu tau, là kô hegnahu du yóm dou kóyô. Yó gónóhu mò du yóm yó anì wen lanu tmóbóng kul anì gewà le gu lem hatay se kul.