¹ Ou se Pol gónóhen lemwót nim sulat ni, lewu me Timuti, tau me gel tóbóng lówó Krays Jisas. Smulat me ebélê ye yu kem kun tau Dwata bè yó bè syudad Flipay, yóm kdê ye deng baling ssotu bè Krays Jisas. Homong me lemen snéen yó kem tau fen gel malak kuy bè sembahan ye kkólen bè yó kem tau fen tmóbóng kul. ² Yó hem Dwata yóm Mà tekuy, dalang se yóm gónó tekuy mogot Jisas Krays tendo tmóbóng kuy ne tendo henek nawa ye. ³ Tey gel kdóyónu ke Dwata bè ket gel kehedemu kuy. ⁴ 4 Ne tey gel klaan nawahu bè yóm gel knihu bélê ye bè Dwata ⁵ 5 lemwót bè yóm tey któbóng ye dou bè yóm kwitu du yóm Tulón Hyu. Tódô lemwót bè kbut yóm kehtahu ye yóm tendo któbóng ye dou efet nim kmoen ni. ⁶ 6 Ne tódô eles tngónu yóm hyu deng nbut Dwata bélê ye, là kô tebelen du efet bè yóm kehdengen du bè yóm kdaw bud kkól Krays Jisas edini. ⁷ Là kóen mkó bè nawahu yóm gel kehedemu kuy. Tey knóón ke lómón ni yóm kehedemu ebélê ye, yakà deng tendo gel tnóbóng ye o bè yóm tey kehyu deng hmò Dwata do. Balù nim knóu lem blanggù ni, ne bè yóm tehe gel kógówu mò mfi du yóm Tulón Hyu, ne mò tmolok du snéen, sana kem yó ne yóm gel któbóng ye dou. ⁸ Tódô tngón Dwata yóm hol ktahuhen yóm nawahu ebélê ye, yóm nawa hol lemwót bè Krays Jisas. ⁹ Gel hnihu bè Dwata anì hol temnù yóm kesbong nawa ye, mung du yóm khulung ye hedem ne yóm khulung ye milô. ¹⁰ Yó hnihu anì hulung ye mélék du yóm hol hyu bélê ye, ne laen dù belenen yóm kuy kmò, ne laen kô dù gónó ye megduón bè yóm efet kkól Krays. ¹¹ Sotu bud hnihu anì hol hyu yóm kmò ye lemwót bè yóm gel któbóng Jisas Krays kuy. Ne bè yó se hol gónó Dwata megdóyón bélê ye. ¹² Ó kem dumuhu setwoli, kóyóu ke tngón ye laen kô gónón gseng yóm Tulón Hyu gel nwitu balù nim kwen gfau ni. Deng mom temnù tau temngón du. ¹³  Balù yóm kdéen sendalù yóm tau hol geta bè ni, dalang se yó kem dumu tau bè ni, gotu tngón le ou se sotu tóbóng lówó Krays, yó se but yóm gónóhu geblanggù. ¹⁴  Ne sotuhen, tey wen bè yó kem dumu tekuy deng hemtahu, deng temnù yóm kgel nawa le yóm gónó tekuy mogot lemwót bè yóm deng kegkukubu. Deng mom temnù yóm là klikò le hból du yóm Udél Dwata. ¹⁵ Bè ktahuhen, wen se bélê le hból du yóm boluy Krays lemwót bè kélés nawa le mò gónó le tô gemgatù do. Okóm wen se hból du lemwót bè kehyu kehedem le ebéléu. ¹⁶ Ni kem tau hyu knawa le ebéléu ni, tey kbong nawa le do, abay se tngón le yóm deng hmò Dwata do, duhen yóm gel kfihu du yóm Tulón Hyu. ¹⁷ Yó kem dumu tau monu yó koni, là kóen lemwót bè but blutut le yóm kehból le du yóm boluy Krays, són olo tô ktes le yóm kegeta le. Ofo kul mon du ke bè yó gónóhen temnù ksidek kegnómu du bè nim knóu lem blanggù. ¹⁸ Okóm là, mom hnigalu he yóm nmò le yó, syan dé ke hlós kehból le du yóm kun boluy Krays, kihu ke là hyu buten yóm kmò le du, duhen ke hyu. Ne là kóen mkó yóm kligalu ¹⁹ abay se tngónu angate gewà lan ye gel mutóm do bè kni ye, ne lan yóm Tulus Jisas Krays gel tmóbóng dou. ²⁰ Yó hol nô lem nawahu, ne hol sen‑galuhu ke senflósu mò du yóm deng sigang Dwata tahu. Kóyóu ke laen dù tul klikou tmulón ke Krays, sélét ne nim kmoen ni, anì hol megdóyón béléu Krays, kihu ke mlan bè dou klowil duhen ke mlan bè katayu. ²¹ Abay se béléu do, yó gónóhu mowil anì megdóyón béléu Krays. Okóm mom hyu se ke mataye senta ke mowile. ²² Bede hyu snéen ke mowile, abay se temnù yóm gendengu bè Krays. Yó gónóm mon, là tngónu du ke mahi du yóm hyu. ²³ Tey mgel béléu hemdem du. Móyóe ke mataye anì géhéle nô bè Krays, abay se tey bong hyu béléu yó. ²⁴ Okóm bélê ye kuy, hyu ke tolohe mowil anì naw na hol tnóbóng yu. ²⁵ Deng eles tngónu tolo wen lanu tmóbóng kuy. Bè yó gónóhu temngón du là tagade matay, tódô henlósu nô lem blóng ye anì naw na hol gtóbóng yu bè kehtahu ye, ne anì metnù kligal ye du snéen yóm kehtahu ye yó. ²⁶ Ke yó se kmoen, bong kdóyón ye ke Krays Jisas soke bud kól lem blóng ye. ²⁷ Ne ni se yóm hol bong muhen bélê ye ke hol seklóón ebè yóm Tulón Hyu gbak ebè Krays yóm gel kmò ye anì yó, ke sute lem blóng ye duhen ke là, laen dù dumu gungolu gu bélê ye són yóm hol kbegel yóm kehtahu ye, ne yóm hol kessotu nawa ye hol mfi du yóm deng kehtahu ye lemwót bè yóm Tulón Hyu. ²⁸ Bê ye abay hlikò bè yó kem hmohon kuy, hol hgel ye nawa ye dé. Lemwót bè yóm là klikò ye, yó se gónó le dmilô du yóm klaen dù gmò le, ne yóm katù ye bélê le. Abay se monem lemwót bè Dwata yóm katù ye yó. ²⁹ Bélê ye kuy, deng nélék Dwata yu mò tau mò nmò bè Krays. Yóm deng kéléken kuy yó, là olon du bè yóm kehtahu ye bè Krays gónón hyu, okóm hyu snéen yóm keglayam ye lemwót bè yóm klolò ye du. ³⁰ Deng senged tekuy gemnóm du ne ni kmoen ni yóm keglayam lemwót bè kfi tekuy du. Deng tehe gel ton ye se yóm tehe keglayamu gna, ne efet ni là dengen mkó he, hol lómón se yóm gel gungol ye.