¹ Ou se Pol gónóhen lemwót nim sulat ni, lewu me Timuti, yóm sotu dumu tekuy setwoli. Tauhe geblanggù se do lemwót bè yóm deng klolou ke Krays Jisas. Smulat me ebéléem, ilWè Filimun, yóm sotu dumu me mò nmò bè Dwata. ² Gomong lemen snéen yó kem tau hemtahu gel stifun tmaba Dwata bè gónóem. Ne Afiya snéen, yóm sotu libun me bè kehtahu, dalang se ke Arkipus, yóm sotu dumu me sendalù bè Krays. ³ Yó hem Dwata, yóm Mà tekuy, dalang se yóm gónó tekuy mogot Jisas Krays hol tendo tmóbóng kóm ne tendo henek nawahem. ⁴ Ó Wè Filimun, sal gel utómu uu bè yóm gel knihu bè Dwata, mung du yóm tey kdóyónu du, ⁵ abay se deng gefet béléu yóm kbong nawahem kdê yó kem kun tau Dwata, ne yóm tey kehtahuhem bè yóm gónó tekuy mogot Jisas. ⁶ Yó hol hnihu béléem bè Dwata anì lemwót bè yóm deng kesetngón tekuy kem tau hemtahu gónón temnù yóm ketngón tekuy du yóm tey kehyuhen yóm klowil tekuy lemwót bè yóm deng kessotu tekuy bè Krays. ⁷ Tey kligalu, Wè, ne tey klaan nawahu lemwót bè yóm kbong nawahem kem dumuhem hemtahu. Ne tey lingas nawa le se kul yó kem kun tau Dwata lemwót bè yóm gel któbóngem kul. ⁸ Yó gónóm mon, wen hol henkoduhu béléem. Bè nim henkoduhu béléem ni, gbeku tódô mdók kóm mò du lemwót bè yóm kesdumu te bè Krays. ⁹ Okóm lemwót bè yóm kbong nawahu kóm, là kô dóku kóm, olohen wen hnihu béléem dé. Baluen se ke ou Pol, yóm deng hógówn Krays Jisas, ne ni kmoen ni, tauhe geblanggù lemwót bè yóm klolou du. ¹⁰ Ni se hol henkoduhu béléem, Wè, hol hnifótem Unisimus. Lemwót bè yóm deng kehtahuhen bè Krays, lómón ke hol ngau, yakà mlanen béléu yóm kehtahuhen bè yóm igou nô lem blanggù, ¹¹ yóm tehe knóen béléem ekni, lómón tô laen dù muhem du. Okóm ni kmoen ni, deng baling wen muhem du, ne dalang se do, wen muhu du snéen. ¹² Ne ni bud huléku edyó ebéléem, ne tey gmung nawahu du. ¹³ Yó tô kóyóu ke là tagad huléku du edyó anì wen gónón tmóbóng do bè nim igou fen geblanggù lanu tmolok yóm Tulón Hyu. Ke tnóbóngen ou bè ni, lómón se ke uu yóm tmóbóng do. ¹⁴ Okóm là kóe móyô ke tô ten‑gnahu nawahem. Hnongum du ke deng hol tikaw kewóten lem but blututem yóm któbóngem do, là mlanen bè kubug te kóm. Yó gónóm mon, laen dù nmou ke là lemwóten béléem. ¹⁵ Déke yó mu yóm gónón na gemtagak kóm likót anì yó, là buden skó béléem efet kól bè sónen. ¹⁶ Bè yóm kuléken ebéléem ni, là kóen na a olo bud tô klifen béléem, bede deng baling hol dumum setwoli sogot nawa bè Krays. Lómón yó snéen yóm dou kehedem du yóm knóen dini béléu. Milud he yó dum kóm nawa du lemwót bè yóm kfunem du, ne lemwót bè yóm kessotu nawa ye hemtahu bè yóm gónó tekuy mogot. ¹⁷ Duhen yó, ke tolo nô bè hendemem yóm keswè te, hol hnódóhem. Lómón khódóhem du, lómón ke o yóm sut béléem dyó. ¹⁸ Ke deng tehe wen sidek nmoen béléem, duhen ke wen utóngen béléem, ou he fen mayad du béléem. ¹⁹ Ngem tódô dou lan tdok smulat du nim nii: Ou Pol fen mayad du. Okóm, Wè, là dog nólómu du béléem yó dum tey kóm bayad béléu duhen yóm klowilem laen dù sónen. ²⁰ Duhen yó, Wè, lemwót bè yóm klolò te yóm gónó te mogot, hol nmoem kut yóm tinoku ebéléem ni. Lemwót bè yóm kesetwoli te bè Krays, hol hlaanem nawahu. ²¹ Bè yóm kehwitu du ebéléem nim sulat ni, là kóen megewu nawahu du yóm kimónem do. Tódô tngónu msud senta yó hem hnihu yóm kóm kmò du dyó. ²² Ne sotuhen, elesi hemtifes do yóm dfél mò angat gónóhu nô béléem dyó, abay se sónmou hemdón du ne yóm kbalà Dwata du yóm gel kni ye béléu anì gewae edyó bélê ye. ²³ Ne ke Ipafras kun, yóm dumuhu geblanggù bè ni lanen lemolò ke Krays Jisas, tey gel kólómen kuy. ²⁴ Dalang se ni kem dumuhu mò nmò bè Dwata bè ni, le Mark, Aristarkus, Dimas ne Luk, tey gel kólóm le kuy. ²⁵ Yó ne kóó. Yó hem gónó tekuy mogot Jisas Krays hol tendo tmóbóng kuy.