¹ Ou se Jim gónón gu lemwót nim sulat ni. Ou se sotu tóbóng lówó Dwata ne yóm gónó tekuy mogot Jisas Krays. Smulate ebè yóm kdéen tau Dwata deng sekla bè klamangen benwu. ² Ó kem dumuhu setwoli, ke sok sut yó kem mgel bè klowil ye, tódô ye kem hligal du ne. ³ Abay se tngón ye se yó kem tilów bè kehtahu ye, yó uléken khulung hbala. ⁴ Ne kesok gbek ye hbala, baling ye gulit, ne tódô ye ket bè yóm kehtahu ye. ⁵ Okóm ke wen bélê ye là dengen hol ket bè khulungen hedem, yake tódô mni bè Dwata dé anì wen khulung hedem blay Dwata du. Abay se yóm Dwata, hol lemwót bè nawahen tmóbóng yó kem tau gel mni béléen, ne là olon udì du yóm gel blayen. ⁶ Syan ke hol hentahuhem yóm kbalà Dwata du yóm hnihem yó, béem abay hegewu nawam. Ke gel megewu nawahen yóm tau, hol lómón yóm lewók mohin, tódô gel gmung glulid bè lenos. ⁷ ‑ ⁸ Ke lómón yó yóm tau, ke gel megewu kehedemen, ne ke mahil mili nawahen, lugihen tô hemdem du ke bnalà yóm gónón mogot yóm hnihen. ⁹ Yóm tau élél hemtahu bè Jisas yake hol hligal, yakà deng hegeta Dwata du. ¹⁰ Ne yó kem tau hemtahu bè Jisas bong kendengen le, yake hol le hligal, yakà deng heglaan Dwata kul. Abay se yóm klowil le yó kem tau wen kendengen le yó, là kóen té, lómón yóm bulók lem bnes, là kóen legen ktonem du. ¹¹ Ke mékét etahen nóng kdaw, deng sana menes, ne tódô tbó bulóken, là bud tonem du ne ktiloben. Lómón se yó ne kmò yó kem tau wen kendengen le, kendel le matay igò le tolo tô mebel mò tnuen yóm kendengen le. ¹² Hligal kun yóm tau ke hulung hembala yó kem tilów mgel gel sut béléen. Yó ofolen yóm khulungen hbala yó, duhen yóm klowil laen dù sónen, yóm deng fasad Dwata bè yó kem tau kembong nawa du. ¹³ Ke wen gónón gsindil yóm tau lemwót bè yó kem tilów gel sut, béen abay dnelem Dwata ke du mò du. Abay se yóm Dwata, laen kô dù tau snindilen ne là kóen megsindil se kun. ¹⁴ Okóm yó gónón gsindil yóm tau ke henbeyenen yóm kun knóyô là hyuhen. ¹⁵ Ngangen hembeyen du efet gmoen, ne yó gónón baling salà. Ne ke henlelen mò salà yóm tau, yó se mit du elem hatay laen dù sónen. ¹⁶ Yó gónóm mon, hol bê ye abay hegtondo knô, kem dumuhu sogot nawa, là kô snindilen kem tau kun yóm Dwata. ¹⁷ Hono hyu yóm kdê deng blayen tekuy, balù udì ke wen gónón sidek. Yó se kun kmò Dwata, yóm deng dmimun kdê yó kem lemayag ton tekuy bè longit. Gel megetles ne mili yóm olung yó kem lemayag bè longit yó, okóm ke Dwata kun, là kóen na a mili, sana kem kun kehyu. ¹⁸ Deng tódô lemwót bè kun kóyô yóm kehbalingen tekuy kem kun ngà mlan bè kdilô tekuy du yóm ktahu yóm kun udél. Henbalingen tekuy kem ngaen anì lemyu tekuy senta yó kem dumu tehe dlimunen. ¹⁹ Ni mò hendem ye, kem dumuhu sogot nawa. Yake hol ye hulung hmungol, yóm ket kuy na sotu. Bê ye tódô fà mudél, ne bê ye gel mahil lembut. ²⁰ Abay se ke deng ye lembut, là kô ne ye e gmò du ne yóm tedeng kun knóyô Dwata. ²¹ Yó gónóm mon, hol kó ye yó kem kdê gel nmò ye là mólósen, ne yó kem dumu sidek gel nmò ye. Nimón ye Dwata dé, ne henmóyô ye yóm udélen deng hnóen lem hendem ye, kaem yó se gembek hegewà kuy gu lem hatay. ²² Bê ye abay olo hmungol du yóm Udél Dwata, yake hol nimón ye. Kesok là nimón ye du olo ye tmondo knô ye. ²³ Yóm tau ke olohen hmungol ne là dog nimónen du, mkél bè yóm tau temngel elem ma olung, ²⁴ tonen se lem uyóhen lemen, ominen lemwót ne mom klifóten mò kmò yóm lem uyóhen. ²⁵ Okóm yóm tau sónmoen gel hemnagì du yóm hlau Dwata, yóm hlau mò hegewà du, ne kesok nimónen ne là klifóten du yóm deng gungolen, tey któbóng Dwata du yóm tau yó bè ket nmoen. ²⁶ Ke wen tau hemdem du deng tey bong kun kehtahu bè Dwata, okóm ke là gafasen du ksumóngen, laen dù muhen yóm tô kehtahuhen yó, olon tmondo knóen. ²⁷ Yóm tahu kehtahu hol kun henmóyô Dwata, yóm Mà tekuy, duhen yóm hol któbóng yó kem ngà hikit ne yó kem libun bolu bè yóm gónó le glayam. Ne ke gel tensuhen yó kem sidek gel nmò tau lem benwu.