¹ Yó hol bótóngen yóm deng tulón me kuy ni koni, deng wen yóm tau hol tahu gulit mò blóng tekuy ebè Dwata. Ne ni deng myón fi bè kwanan Dwata, yóm hol geta bè longit. ² Bè yó bè yóm dfél hol gónóhen nô Dwata gónóhen mò du yóm keseblóngen tau ebè Dwata. Yóm gónóhen nô yó, sundu gónô nmò tdok tau du, okóm hol kun gónô nmò yóm gónó tekuy mogot. ³ Bè ni te tonok, yóm tau mò blóng le ebè Dwata, yó gónó le mélék du anì mlan béléen yóm gel blay le ke Dwata ne yóm ógóf gel dsù le ebéléen. Senged se yóm fen semblóng tekuy ebè Dwata, là hyuhen ke là wen dsuen se kun. ⁴ Ke tolo nô bè ni te tonok, là kóen hyu ke du fen demsù ebè Dwata, abay se deng wen yó kem dumu tau gónó le gel hlan du yóm gel blay le ke Dwata. Yóm blay le yó, tódô lolò le yó kem kul hlau yó kem Ju. ⁵ Yóm kul gel nmò yó kem tau gel demsù ni, tódô gel nulit le yóm tahu duhen gel nmò le bè longit. Yóm gel nmò le yó, olo olungen. Hol lómón yóm ke Musis ekni. Bè yóm kdaw kehdaen yóm Gónô Dwata gel nit le mógów, wen tulón Dwata du, yó monen, “Tódô nulitem kdê yóm deng hegfanu béléem ditu ta bulul Sinay.” ⁶ Okóm ni, deng nmò Dwata Jisas mò blóng ebéléen, ne tey hyu yóm nmoen senta yóm kul nmò yó kem tau gel demsù te tonok. Ne tey mdengen snéen yóm kun nmò Jisas mò lan tekuy ebè Dwata senta yóm gnan. Yó gónón alì hyu yóm kun, abay se alì hyu yóm fasad Dwata bélê tekuy mung du. ⁷ Ke gbeken mit tau ebè Dwata yóm gna lolò le, là kô nan e tenles du. ⁸ Okóm wen duón Dwata kul yó kem tau lemolò yóm gnan, yó gónón mon du, “Wen he kdawen, mon yóm gónó le mogot, wen lomi lan hlolou kul mò lan le ebéléu yó kem tau semfu gu bè Israél ne yó kem tau semfu gu bè Juda. ⁹ Yóm lomi hlolou kul ni, là mkélen bè yóm tehe hlolou yó kem tehe fù le bè yóm tehe kalaku kul gu bè Idyip. Yóm tehe hlolou kul yó, là kô dog lolò le du. Yó gónóhu tódô mayà kul. ¹⁰ Bud mon yóm gónó le mogot, ni se angat nmou bè yó kem tau Israél elem hulin kdaw mò lan le hloni ebéléu. Suu lem hendem le yóm dou hlau, ne bud hnóu lem nawa le snéen. Ne ou se baling kul Dwata, ne lu se baling dou tau. ¹¹ Bè yóm kdaw yó, laen dù tau ke bud toloken kem dumuhen anì tngón le o, abay se deng tódô kdê le gotu temngón do, lemwót bè yóm hol tau glaan kólen bè yóm hol tau hol geta. ¹² Hnifótu yó kem salà le, ne là bud hendemu du ne yó kem sidek gel nmò le.” ¹³ Lemwót bè yóm deng ktulón Dwata du yóm lomi lan nmoen mò gónó tekuy hloni ebéléen, deng hetngónen tekuy ne yóm klaen dù bud muhen du yóm gnan. Bè yóm klaen dù bud muhen yóm yó, kaem tódô lana.