¹ Yóm kdê tehe hlolò Dwata yó kem tau Ju ekni, sundu kô yó du he yóm tahu duhen, olo kem hningón yó kem hyu nmò Krays yóm yó. Bè yóm gnan, tendo sensulit le demsù ebè Dwata ket halay. Lemwót bè yóm kessulit le du yó, tódô dilô tekuy là kô le baling gulit yó kem tau tô hloni ebè Dwata ke mlan bè yóm gel dsù le. ² Ke deng mimot mkó ta le yó kem salà le lemwót bè yóm gel kedsù le, là kô wen bud hendeen dsù le elem hulin kdaw ne, abay se laen dù salà bud hemblat kul. ³ Okóm là. Bè yóm gel kedsù le ket halay, yó se gónó le hemtulón du nawa yó kem salà le. ⁴ Abay se yóm litô gel dsù le lemwót bè safì ne bè kambing, là kô gbeken mkó du yó kem salà le. ⁵ ó gónóm mon, bè yóm móyón kewót Krays elem benwu, yó tehe monen mò ke Dwata, “Là nóen du nawahem yóm ógóf gel dsù tau, ne yó kem dumu gel blay le. Yó se gónóm na hlan do bè yóm lówó tau. ⁶ Là kóen gsengel nawahem du yó kem ógóf gel hkekeb le ebéléem, duhen yó kem dumu gel dsù le mò hkó salà. ⁷ Yó gónóhu mon du, ‘Ni se o, Dwata, nmou he yóm kóm kóyô, hol lómón yóm tehe hsulatem gbak ebéléu bè yóm bok gónón nô yó kem hlauhem.’ ” ⁸ Yóm tanay udél Krays ebè Dwata yó koni, yóm monen, “Là gsengel nawahem du yó kem kdê dsù tau ebéléem, ne yó kem dumu gel blay le kóm, duhen yó kem ógóf gel hkekeb le, ne yó kem dumu dsù le mò hkó salà.” Ewenem yó he, hono lemwót bè yóm gna hlolò Dwata kul yóm gel kedsù le yó. ⁹ Omin Krays bud mon du, monen, “Ni se o, Dwata, nmou ne yóm kóm kóyô.” Bè yóm udél Krays yó, yó gónó tekuy temngón du deng gotu kó Dwata yóm gna gel hedsuen kul, tlesen du yóm kun dsù Krays. ¹⁰ Lemwót bè yóm deng kimón Jisas Krays du yóm kun kóyô Dwata, yó gónó tekuy mólós bè kton Dwata tekuy mlan bè yóm khamà Jisas klowilen bélê tekuy. Tek suléken mò du, ne laen dù bud seefen ne yóm nmoen yó. ¹¹ Yó kem Ju gel demsù ebè Dwata, ket kdaw le mò du yóm kul nmò. Deng hónô solò yóm gel kedsù le, ewenem, là kô gbeken mkó du yó kem salà le. ¹² Okóm ke Krays, tek suléken demsù klowilen mò hkó salà yó kem tau, ne wen ktueden yóm dsuen yó efet kól bè hol sónen. Ne kogol yóm kedsuen, ominen tódô myón fi bè kwanan Dwata, ¹³ hangaten kehto yóm buteng angat gotu kdà Dwata kul elaan yó kem hmohon du. ¹⁴ Duhen yó, olo tek suléken demsù, sana gotu hguliten yó kem tau deng hólósen bè yó kem salà le. Bè yóm kehguliten kul yó, laen dù tul sónen. ¹⁵ Ne yóm Tulus Dwata, bud gemtanud du yóm ktahuhen nim ni. Yó tanay monen, ¹⁶ “Yó mon yóm gónó le mogot, Ni sii nmou bè yó kem dou tau elem hulin kdaw mò lan le hloni ebéléu. Suu lem nawa le yó kem dou hlau, ne bud hnóu lem hendem le snéen.” ¹⁷ Ne ominen bud mon du, “Là kô bud hendemu du ne yó kem salà le ne yó kem dumu sidek gel nmò le.” ¹⁸ Yó gónóm mon, ke deng gotu hnifót Dwata yó kem salà tekuy, laen kô bud mu tekuy du ne ke tô tekuy bud demsù mò hkó salà. ¹⁹ Duhen yó, kem dumuhu setwoli, lemwót bè yóm deng khamà Jisas litóen bè yóm tehe katayen, deng wen lan tekuy ne tódô husek elem tum Dfél gónóhen nô Dwata. ²⁰ Deng lenungkà Jisas bélê tekuy yóm lomi lan yó, yóm lan hlowil tekuy. Bè yóm deng khamaen klowilen bélê tekuy, lómón ke deng kentóhen yóm tehe nes seng bè yóm Dfél hol gónóhen nô Dwata. ²¹ Tey geta yóm fen semblóng tekuy ebè Dwata, yóm fen mogot du yóm kun gónô Dwata. ²² Yó gónóm mon, hol tekuy hloni ebè Dwata dé. Hol hewót tekuy lem but blutut tekuy yóm kehloni tekuy yó, mung du yóm hol kehtahu tekuy béléen. Yakà deng hólósen tekuy Jisas, yó gónón deng mkó ta tekuy ne yó kem salà tehe gel hemblat tekuy. Hol lómón ke deng denyohen tu lem yóm tey él tikaw. ²³ Hol bê tekuy abay tnagaw nawa yóm hendón nefet nawa tekuy, yakà deng tehe fasad Dwata du nim ni, ne là kô tenlesen du hendemen. ²⁴ Hol gel hendem tekuy yó kem dumu tekuy ston nawa anì hol tekuy stóbóng mò du yóm kesbong nawa ne yóm kehyu nmò. ²⁵ Hol bê tekuy abay hentula yóm gel ksimba tekuy, lómón se yóm gel nmò kem dumu tau. Yó dé nmò tekuy, hol tekuy segduf mò du, hol néen nim deng kloni yóm kesfuléken edini yóm gónó tekuy mogot. ²⁶ Ke deng tngón tekuy yóm ktahuhen lemwót gu bè Dwata, okóm sentahen bè yó tódô henlel tekuy mò du yóm sidek, laen kô dù bud dsù tekuy mò hkó du yó kem salà tekuy. ²⁷ Tek sotu gónón e kól yóm nmò yó, duhen yóm tey klikò tekuy igò tekuy mangat du yóm kkukum Dwata tekuy, ne yóm tey ofi angat gónó le meglà yó kem tau là hdon le ke Dwata. ²⁸ Bè yóm tehe kun kdaw Musis ekni, ke wen tau mulé du yóm kun hlau, ne ke wen lewu duhen ke tlu tau kestigus du yóm deng kguléhen du, tek sotu kukumen, tódô hnatay le yóm tau yó. Balù udì ke wen kodu le du. ²⁹ Milud he kegtafaken yóm tau ke deng kenbéen yóm Ngà Dwata, ne ke deng kenféen yóm litóen tehe hamaen béléen mò hkó salaen, ne ke sendekaen yóm Tulus Dwata, yóm tmóbóng du. Wen hol mdengen duón Dwata du yóm tau yó, ne tey sidek ktafaken du. ³⁰ Yakà deng tngón tekuy du se yóm Dwata tehe mon du, “Ou se yóm fen gel meles. Ou se fen gel malà.” Ne bud monen, “Knukum yóm gónó tekuy mogot yó kem kun tau.” ³¹ Ke Dwata fen tmafak tekuy, yóm Dwata laen dù tul katayen, yó se yóm tafak alì knikò. ³² Okóm tekuy, hol hentulón ye nawa yóm tehe kdaw ye ekni, yóm kdaw tehe kehlayag Dwata lem hendem ye. Tey sidek tehe keglayam ye lemwót bè yóm deng kehtahu ye, okóm là gwiten kuy. ³³ Deng tódô henyak le yu bè gónón wen, ne hensidek le yu. Okóm kuy, mom nfi ye yó kem dumu ye hemtahu deng gónó le mò du yóm yó. ³⁴ Ne gel ye gbót glayam bè yóm kegkukub yó kem dumu ye hemtahu. Balù yó kem tau mled kimu ye, là kóen sidek kehedem ye ebélê le, mom wen he yóm kuy kehligal, abay se deng tngón ye wen yóm tey kuy kimu alì hyu laen dù sónen ditu bè longit. ³⁵ Duhen yó, bê ye lensón yóm là klikò ye yó. Ke là gkó ye du, angat wen tey ofol ye. ³⁶ Hol hanay ye nawa ye dé anì gmò ye yóm kun kóyô Dwata, ne anì guta ye yóm tehe fasaden kuy. ³⁷ Abay se deng wen monen bè Sulat Dwata, yó monen, “Là buden legen ne kkól yóm tau nangat ye, laen kô bud gónón ganggà ne. ³⁸ Yó kem dou tau deng baling tedeng kmò le, lemwót bè yóm kehtahu le béléu gónó le hlós mowil. Okóm ke knogol le yóm kehtahu le béléu, la kô wen bud nawahu ebélê le ne.” ³⁹ Okóm tólóng yóm bélê tekuy, là mkél tekuy bè yó kem tau knogol le yóm kehtahu le, ne hlós le lana. Okóm henlel tekuy yóm kehtahu tekuy anì angat tekuy gewà gu lem hatay.