¹ Bè yóm kdaw yó, sónmoen temnù yó kem tau hemtahu bè Jisas. Okóm wen kenbê yó kem tau mudél udél Grik bè yó kem tau mudél udél Hibru, abay se là kóen mdengen yóm gel blay le ket kdaw bè yó kem libun bolu bélê le. ² Timbow tngón yó kem sfolò lewu tehe nélék Jisas yóm kesiwes le yó, gotu senbung le yóm kdê tau hemtahu bè yó, mon le mò kul, “Là hyuhen ke mom gkogol me yóm gel ktolok me du yóm Udél Dwata lan me tlek golun bè yóm mò keblay. ³ Yó dé hyu ni, kem dumu me setwoli, mélék ye kut bè kuy kwen hitu logi, yóm kat gel nadat ne yóm tendo galak bè Tulus Dwata, ne yóm hulung hedem anì blay tekuy ta le yóm nmò ni, ⁴ anì yó laen dù tlek gónó me meglala bè yóm gel kni me bè Dwata, ne bè yóm gel ktulón me yóm kun udél.” ⁵ Ne tahu se, tódô kdê le gotu semkotuk du yóm atul le yó. Ni sii boluy yó kem tau nélék le: Stéfén, sotu tau mbegel kehtahuhen, ne sónmoen galak bè yóm Tulus Dwata. Ne yó boluy yó kem dumuhen, Filip, Prukurus, Nikanur, Timon, Parminas ne Nikulas. Tau lemwót bè Antyok yóm Nikulas ni, là Juhen se kun, okóm deng hemtahu bè yóm kul Dwata yó kem Ju. ⁶ Yó nmò yó kem tau mélék kul, gotu nwit le lu ebè yó kem hógów Jisas. Ne lemwót yó kem hógów Jisas, gotu nenok le lu, ne mni le bélê le bè Dwata. ⁷ Ne sónmoen tendo mból yóm udél Dwata, ne sónmoen se temnù tau hemtahu bè Jisas bè Jirusalim. Tey wen snéen kem tau demsù ebè Dwata baling hemtahu bè Jisas. ⁸ Bong ke Stéfén kun, tey któbóng Dwata du, ne tey dê hentaw ton gel nmoen lem blóng yó kem tau lemwót bè yóm kfasang blay Dwata du. ⁹ Okóm wen se kem tau mélés du nawa. Lu se yó kem Ju mung bè yóm kul gónó gel stifun yó kem Hesek Deng Gewà. Wen se bélê le lemwót bè syudad Sayrin ne syudad Aliksandriya. Wen se lemwót bè prubinsya Silisya ne bè prubinsya Asya. Yó nmò le, nit le skuya mon Stéfén. ¹⁰ Okóm là kô le gemmò béléen, abay se yóm Tulus Dwata bemlay ke Stéfén khulung mudél. ¹¹ Timbow là matù le béléen, wen tau tódô bnayad le mò fen dmelem du kéng. Yó delem le du, mon le, “Nim tau ni, wen gungol me udélen sidek gu ebè Musis ne ebè Dwata snéen.” ¹² Yó gónó le mò du yóm yó mò lan le hesbeweg yó kem tau, ne yó kem tuha gónó le gel gmong, dalang se yó kem tau gel tmolok hlau. Tódô kenfô le Stéfén, ne nwit le ebè yó kem tau hol geta mogot kukum. ¹³ Omin le hudél yó kem tau tmifù du kéng, yó mon le, “Nim tau ni, sónmoen gel sidek kudélen ebè yóm Gónô Dwata skel se ebè yóm hlau Musis. ¹⁴ Yó dumu gel gungol me monen,” mon le, “angat genbà yóm Jisas lemwót bè Nasarit kun yóm Gónô Dwata, ne tenlesen kun yóm adat tehe hlolò Musis kum.” ¹⁵ Yóm igò le kat tmifù kéng ni kem tau dmelem ni, là kô kó mata le ke Stéfén yó kem tau mogot kukum seyón bè yó. Tódô ton le yóm tey klayag gu lem uyóhen, hol lómón ke uyó yóm hógów Dwata gu bè longit.